ފުލުހުން ޔުމްނުއާ ރަސްމީކޮށް ބައްދަލުކުރާކަށް ނޭދޭ އެދުނީ އަމިއްލަ ގޮތުން ބައްދަލުކުރަން: ޔުމްނުގެ އާއިލާ
ބަޔާނުގައިވަނީ ދޮގު މައުލޫމާތު ކަމަށާއި އެ ބަޔާނަކީ ކަން ހިނގި ގޮތާ ޚިލާފަށް މައުލޫމާތު ދީފައިވާ ބަޔާނެއް ކަމަށް ޔުމްނުގެ އާއިލާއިން ބުނެފި
ހ.ފެންޓޮނޯއީ
ހ. މިޓާޒް ގޭގެ ފުރާޅު މައްޗަށް ވެއްޓިފައި އޮއްވާ ފެނުނު ހައްވާ ޔުމްނު ރަޝިދު (21އ)ގެ މައްސަލައިގައި ތަހުގީގަށް އޭނާގެ ބަޔާން ނެގުމަށް އާއިލާއިން އެއްބާރުލުން ނުދޭ ކަމަށް ފުލުހުން ނެރުނު ބަޔާނުގައިވަނީ ދޮގު މައުލޫމާތު ކަމަށާއި އެ ބަޔާނަކީ ކަން ހިނގި ގޮތާ ޚިލާފަށް މައުލޫމާތު ދީފައިވާ ބަޔާނެއް ކަމަށް ޔުމްނުގެ އާއިލާއިން ބުނެފިއެވެ.
ޔުމްނު ވެއްޓުނު ހާދިސާގެ ތަހުގީގަށް އޭނާއާ ސުވާލު ކުރުމުގެ ފުރުސަތު ފުލުހުންނަށް އާއިލާގެ ފަރާތުން ފަހިކޮށްދީފައި ނުވާތީ، މެލޭޝިއާގެ ފުލުހުން މެދުވެރިކޮށް ތަހުގީގަށް ބޭނުންވާ މައުލޫމާތު ހޯދުމުގެ މަސައްކަތް ކުރަމުން އަންނަ ކަމަށް ފުލުހުން ވަނީ މިދިޔަ ބުރާސްފަތި ދުވަހު ބުނެފަ އެވެ.
ފުލުހުން ބުރާސްފަތި ދުވަހު ނެރުނު ބަޔާނާއި ގުޅިގެން ޔުމްނުގެ އާއިލާގެ ފަރާތުން އެކްޓިންގ ޕޮލިސް ކޮމިޝަނަރ ޑެޕިއުޓީ ޕޮލިސް ކޮމިޝަނަރ އިސްމާއިލް ނަވީންއަށް މިއަދު ވަނީ ސިޓީ އެއް ފޮނުވާފަ އެވެ.
އެ ސިޓީގައި ވަނީ، ތަހުގީގަށް އެއްބާރުލުން ނުލިބޭ ކަމަށް ބުނެ ނެރުނު ބަޔާނުގައި، ކަންކަން ބަޔާންކޮށްފައި ވަނީ ކަން ހިނގައިފައިވާ ގޮތާ ޚިލާފަށް ކަމަށެވެ. އެގޮތުން ޔުމްނު ވެއްޓުނު މައްސަލައާ ގުޅިގެން ކަނޑައެޅިގެން ހަގީގަތާ ޚިލާފު މައުލޫމާތު ދީފައިވާ ކަމަށް އެ އާއިލާއިން ތުހުމަތުކުރިއެވެ. އަދި އޭނާ އަމިއްލައަށް ވެއްޓުނީ ކަމަށް ބުނެ ނޫސްވެރިންގެ ބައްދަލުވެއްގައި ބަޔާންދިނީ މައްސަލަ ތަހުގީގު ކުުރުމަކާ ނުލައި ކަމަށާއި އެގޮތަށް ފުލުހުން އަމަލުކޮށްފައިވަނީ ވަކި މަގުސަދެއްގައި ކަމަށް އާއިލާގެ ފަރާތުން ދެކޭ ކަމަށް ސިޓީގައިވެއެވެ.
މީގެ އިތުރުން، ތަހުގީގަށް އެންމެ ނާޒުކު ދަނޑިވަޅުގައި ފުލުހުން އަމަލުކޮށްފައިވާ ގޮތުން، އިންސާފުވެރިކަމާއެކު ތަހުގީގު ކުރިއަށް ގެންދާނެ ކަމުގެ ޔަގީންކަން އާއިލާއަށް ނެތް ކަމަށް އެސިޓިގައިވެއެވެ. އަދި ރާއްޖޭގެ ގާނޫނުތަކާއި ގަވައިދުތަކަށް ތަބާވުމުގެ ގޮތުން ފުލުހުން ކުރިއަށް ގެންދާ އެއްވެސް ތަހުގީގަކަށް ޔުމްނުގެ އާއިލާގެ ފަރާތުން ހުރަސް ނާޅާނެ ކަމަށާއި މިހާތަނަށް ވެސް އެފަދަ ހުރަހެއް ކުރިމަތިކޮށްފައި ނުވާނެ ކަމަށްވެސް އެ ސިޓީގައިވެއެވެ.
ޔުމްނުގެ ސިއްހީ ހާލަތާ ގުޅޭ އެއްވެސް މައުލޫމާތެއް ހިއްސާކޮށްފައި ނުވާ ކަމަށް ފުލުހުންގެ ބަޔާނުގައި ބުނެފައިވީ ނަމަވެސް، އެފަދަ މައުލޫމާތެއް ހޯދަން ފުލުހުން އެދިފައި ނުވާ ކަމަށް ވެސް ޔުމްނުގެ އާއިލާ އިން ވަނީ ބުނެފައެވެ.
އާއިލާއިން ބުނީ މިވަގުތު އެންމެ ބޮޑު މަސްލަހަތެއް އޮތީ ޔުމްނުއަށް އެކަށީގެންވާ ފަރުވާ ލިބިދީ، އޭނާ އަށް އިންސާފު ހޯދަން މަސައްކަތް ކުރުމަށް ކަމަށެވެ. އަދި އެކަމުގައި ފުލުހުންނަށް ދޭންޖެހޭ އެއްބާރުލުން ގާނޫނާއި ގަވައިދާ އެއްގޮތްވާގޮތުގެ މަތިން ދޭނެ ކަމަށް ވެސް ބުނެފައިވެ އެވެ.
ފުލުހުން މަސައްކަތްކުރަނީ ޔުމްނުއަށް އިންސާފު ލިބުނަ ނުދޭން ކަމަށް އާއިލާއިން ވަނީ މީގެކުރިން ބުނެފައެވެ.
ޔުމްނު ވެއްޓުނު މައްސަލައިގައި ފުލުހުން އަމަލު ކޮށްފައިވާ ގޮތުގައި އެއްވެސް ގޯހެއް ފާހަގަނުވާކަމަށް ހޯމްލޭންޑް މިނިސްޓަރު އަލީ އިހުސާން މިފަހުން ވިދާޅުވެފައި ވެއެވެ. އަދި ފުލުހުންގެ ތަހުގީގުގައި މިހާތަނަށް ގިނަ އޮޅުވާލުންތަކެއް ހުރި ކަމަށާއި، ފުލުހުން އާންމުކުރި ސީސީޓީވީއަކީ ވެސް އެޑިޓުކޮށް، އޭގެ އަސްލު ގެއްލުވާލާފައިވާ އެއްޗެއް ކަމަށް އާއިލާއިން ތުހުމަތުކޮށްފައިވެއެވެ.
އޭގެ އިތުރުން ތަހުގީގު ހިނގާ ގޮތާއިމެދު ނުރުހުން ފާޅުކޮށް އެތަހުގީގަށް ސަރުކާރުގެ އިސްބޭފުޅުންތަކެއް ނުފޫޒު ފޯރުވާ ކަމަށް ބުނެ ޒުވާނުންވަނީ މުޒާހަރާތަކެއް ކޮށްފައެވެ.
