މި ސަރުކާރުގެ އަމަލުތައް ހުރި ގޮތުން ކުރިއަށް އޮތްތަނުގައި ރާއްޖޭގައި އޮންނަނީ އެންމެ ކޯޓެއް ކަމަށާއި، އެއީ ރައީސުލްޖުމްހޫރިއްޔާ ޑރ.މުހައްމަދު މުއިއްޒު ކަމަށް ރައްޔިތުން މަޖިލީހުގެ ވައިކަރަދޫ ދާއިރާގެ މެންބަރު ހުސެއިން ޒިޔާދު ވިދާޅުވެއްޖެއެވެ.

ހުކުރު ދުވަހުގެ ރޭ އެމްޑީޕީން ބޭއްވި ކުއްލި އެއްވުމުގައި މެންބަރު ޒިޔާދު ވިދާޅުވީ މަގު ބަންދުވުން އުދަނގޫތަކެއް ކުރިމަތިވާނެ ކަމަށެވެ. ނަމަވެސް މަގުމައްޗަށް ނުކުންނަނީ ގިނަ ސަބަބުތަކެއް ހުރެގެންކަން ފާހަގަކުރައްވައި މެންބަރު ޒިޔާދު ވިދާޅުވީ އެއީ އިންސާފަށް އޮތް ހުރިހާ މަގެއް ބަންދުވުމުގެ އިތުރުން، ހައްގުތައް ގެއްލި، ބޭސްފަރުވާއަށް އޮތް މަގު ބަންދުވެ، ދަތުރުފަތުރުގެ ނިޒާމަށް އޮތް މަގު ބަންދުވުމުން ކަމަށެވެ.

14 މެއި 2025 ގައި ސުޕްރީމް ކޯޓުގެ ފަނޑިޔާރު އަޒްމިރަލްދާ ޒާހިރު އާއި މަހާޒް އަލީ ޒާހިރު ވަކި ކުރެއްވި މައްސަލައަށް އިޝާރާތް ކުރައްވައި މެންބަރު ޒިޔާދު ވިދާޅުވީ މިސަރުކާރުން ނާއިންސާފުން ދެ ފަނޑިޔާރުން ނަގާ އެއްލީ ކަމަށާއި، މިހާރު އެދަނީ ހައިކޯޓުގެ އިތުރުން ދަށު ކޯޓުތަކަށް ވެސް ނުފޫޒު ފޯރުވަމުން ކަމަށެވެ.

މި ސަރުކާރުގެ އަމަލުތައް ހުރި ގޮތުން ކުރިއަށް އޮތްތަނުގައި ރާއްޖޭގައި އޮންނަނީ އެންމެ ކޯޓެއް ކަމަށާއި، އެއީ ރައީސުލްޖުމްހޫރިއްޔާ ކަމަށް މެންބަރު ޒިޔާދު ވިދާޅުވިއެވެ. އަދި ވިދާޅުވީ ރައީސް މުއިއްޒު ބޭނުންފުޅުވާ ގޮތަށް ރައްޔިތުންގެ މަޖިލިސް ވެސް ބަންދުކޮށްފައިވާ ކަމަށާއި، ރައްޔިތުންގެ ހައްގުގައި ވަކާލާތު ކުރާނެ މަޖިލީހެއް ނެތް ކަމަށެވެ.

މެންބަރު ޒިޔާދު ވިދާޅުވީ ގައުމު ގެންދާ މިސްރާބު ހުރިހާ ރައްޔިތުންނަށް އެނގޭ ކަމަށާއި، އެހެންކަމުން މިއަދު ހައްގު ހޯދުމަށް މަގުމަތި ނޫން ތަނެއް ނެތް ކަމަށެވެ.

މަސްވެރިންގެ މުޒާހަރާއަށް އިޝާރާތް ކުރައްވައި މެންބަރު ޒިޔާދު ވިދާޅުވީ މަސްވެރިން މަގުމައްޗަށް ނުކުމެ އަޑު އުފުލުމުން ކޮންމެވެސް ވަރެއްގެ ކުރިއެރުމެއް މަސްވެރިންނަށް ލިބިފައިވާ ކަމަށެވެ. އަދި ވިދާޅުވީ ގެދޮރުވެރިޔާ ސްކީމުން ކުރީ ސަރުކާރުން ދޫކޮށްފައިވާ ފްލެޓުތައް ވެސް ހޯދުމަށް ރައްޔިތުން މަގުމައްޗަށް ނުކުންނަން ޖެހޭ ކަމަށާއި، ގޭގައި ތިބެގެން ހައްގު ނުލިބޭނެ ކަމަށެވެ. ސަރުކާރަށް ދެ އަހަރުވާން ދާއިރު، ކުރީ ސަރުކާރުގައި ދޫކޮށްފައިވާ ފްލެޓުތައް ދޫނުކޮށް ހިފަހައްޓާފައިވަނީ މުޅިން އެހެން މަގުސަދެއްގައި ކަމަށް މެންބަރު ޒިޔާދު ވިދާޅުވިއެވެ.

މެންބަރު ޒިޔާދު ވިދާޅުވީ މިއަހަރަށް ރައްޔިތުން މަޖިލީހުން ފާސްކޮށްފައިވާ ބަޖެޓުން މިއަދާ ހަމައަށް ރައްޔިތަކަށް ލިބުނު މަންފާއެއް، ކުރިއެރުމެއް ނެތް ކަމަށެވެ. ބަޖެޓުގައި އެންމެ ބޮޑު ބައެއްގެ ގޮތުގައި ހިމަނާފައި އޮތީ ރައްޔިތުންނަށްދޭ ސަބްސިޑީ ޑައިރެކްޓް ސަބްސިޑީއަށް ބަދަލުކޮށް އެ އެންމެ ބޭނުންވާ ފަރާތްތަކަށް ދިނުން ކަމަށާއި، ނަމަވެސް މިއަދާ އެކަން ވެސް ކޮށްފައިނުވާ ކަމަށެވެ.

މެންބަރު ޒިޔާދު ވިދާޅުވީ އަޑުނީވޭ ސަރުކާރަކަށް މަގުމައްޗަށް ނުކުތުމުން އަޑު އިވޭ ކަމަށާއި، ވީހާ ވެސް ގިނަ ރައްޔިތުން މަގުމައްޗަށް ނުކުމެ ގިނަ އަޑުތައް އިއްވަންޖެހޭ ކަމަށެވެ. ރައްޔިތުންގެ އަޑާއެކު، ނުހިނގާ ތަރައްގީގެ މަޝްރޫއުތައް ވެސް ބައެއް ރަށްތަކުގައި ހިނގާ ކަމަށް މެންބަރު ޒިޔާދު ވިދާޅުވިއެވެ.