އީރާނުން އެމެރިކާ އާއެކު ކުރިއަށް ގެންދަމުން އަންނަ ނިއުކްލިއާ މަޝްވަރާތަކުން އެއްވެސް ނަތީޖާއެއް ނުފެންނާނެ ކަމަށް ބެލެވޭ ކަމުގައި، އީރާންގެ ރޫހާނީ ލީޑަރު އާޔަތުﷲ އަލީ ޚާމަނާއީ ވިދާޅުވެއްޖެ އެވެ.

އަންގާރަ ދުވަހު ޚާމަނާއީ މިހެން ވިދާޅުވެފައި ވަނީ، އީރާންގެ ޔުރޭމިއަމް އެންރިޗްމަންޓް ޙަރަކާތާ ގުޅޭ ގޮތުން ދެ ޤައުމުގެ ދެ މެދުގައި ދެބަސްވުންތަކެއް އުފެދިފައިވާ ދަނޑިވަޅެއްގަ އެވެ.

ޚާމަނާއީ ވިދާޅުވެފައި ވަނީ އެ މަޝްވަރާތަކުން ނަތީޖާއެއް ފެންނާނެ ކަމަށް ނުދެކޭ ކަމަށެވެ. އެހެން ނަމަވެސް، ކުރިއަށް އޮތް ތަނުގައި ކަންތައް ވާނެ ގޮތެއް ބުނަން ނޭނގޭ ކަމަށް ވެސް ޚާމަނާއީ ވަނީ ވިދާޅުވެފަ އެވެ. އަދި އޭނާ ވިދާޅުވީ ޔުރޭނިއަން އެންރިޗް ކުރުމުގެ ހައްގު އީރާނަށް ނުދޭން ވަކާލާތު ކުރުމަކީ، ބޮޑު ކުށެއް ކަމަށެވެ.

ހުސްވި އޭޕްރީލް މަހުގެ 12 ވަނަ ދުވަހު އީރާނާއި އެމެރިކާއާ ދެމެދު ވަނީ ނިއުކްލިއާ މަޝްވަރާތައް ފަށައިފަ އެވެ. އޮމާން އިން މެދުވެރިއެއްގެ ދައުރު އަދާ ކުރާ މި މަޝްވަރާތަކުގައި ވަނީ މިހާތަނަށް ހަތަރު ބައްދަލުވުމެއް ބާއްވައިފަ އެވެ. 

މިއީ 2015 ވަނަ އަހަރު، ނިއުކްލިއާ އެއްބަސްވުމުން އެމެރިކާ ވަކިވި ފަހުން، ދެ ޤައުމުގެ ދެ މެދުގައި މި ފަދަ މަޝްވަރާތަކެއް ބޭއްވެނު ފުރަތަމަ ފަހަރެވެ. އެންމެ ފަހުން އޮތް ހަތަރު ވަނަ ބުރުގެ މަޝްވަރާ ބައްދަލުވުން ނިންމާލީ، އިތުރު ބައްދަލުވުމެއް ބޭއްވުމަށް ދެ ޤައުމުން ވެސް އެއްބަސްްވެގެންނެވެ. 

މިވަގުތު އީރާނުން އަންނަނީ ޔުރޭނިއަމްގެ 60 އިންސައްތަ އެންރިޗް ކުރަމުންނެވެ. މިއީ 2015 ވަނަ އަހަރުގެ އެއްބަސްވުމުގައި ކަނޑައެޅި މިންވަރަށް ވުރެ 3.67 އިންސައްތަ އިތުރު އަދަދެކެވެ. ނަމަވެސް މިއީ ނިއުކްލިއާ ހަތިޔާރު އުފެއްދުމަށް ބޭނުންވާ 90 އިންސައްތަ އަށް ވުރެ ކުޑަ އަދަދެކެވެ. 

އެކަމާ ގުޅިގެން އެމެރިކާގެ ޚާއްސަ މަންދޫބު ސްޓީވް ވިކްޓޮފް ވިދާޅުވެފައި ވަނީ، އެންރިޗްމަންޓު އެފެއްދުމުގެ އެއް އިންސައްތަ އަށް ވެސް އެމެރިކާ އިން ޤަބޫލު ނުވާނެ ކަމަށެވެ.