އެމެރިކާގެ ސެކްރެޓަރީ އޮފް ސްޓޭޓް މާކޯ ރޫބިއޯ، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫއާ މަޝްވަރާ ކުރައްވައިފި އެވެ.

ހޮނިހިރު ދުވަހު ރޫބިއޯ ވަނީ، ފޯނު މެދުވެރިކޮށް ނަތަންޔާހޫއާ މަޝްވަރާ ކުރައްވައި، ވާހަކަ ދައްކަވައިފަ އެވެ. މިއީ ފާއިތުވި ތިން ދުވަހުގެ ތެރޭގައި، މި ދެ ބޭފުޅުންގެ ދެމެދުގައި ކުރެވުނު ދެ ވަނަ މަޝްވަރާ ކަމަށް މީޑިއާ ރިޕޯޓުތައް ބުނެ އެވެ. 

މި މަޝްވަރާތައް ކޮށްފައި ވަނީ ޣައްޒާ ގައި ހިންގަމުން އަންނަ އޮޕަރޭޝަން އިތުރަށް ފުޅާކޮށް، ހަމާސް ބަލި ކުރެވެންދެން އެކަން ކުރިއަށް ގެންދާނެ ކަމަށް އިސްރާއީލް އިން ހާމަކޮށްފައި ވަނިކޮށެވެ. އަދި އެ އޮޕަރޭޝަންގައި ޣައްޒާ އިން އެތައް ބަޔަކު ޝަހީދު ކޮށްލާފައި ވަނިކޮށެވެ. 

އެމެރިކާގެ ސެކްރެޓަރީ އޮފް ސްޓޭޓްގެ ތަރުޖަމާނު ޓެމީ ބްރޫސް ވިދާޅުވީ ގޮތުގައި، ރޫބިއޯ އާއި ނަތަންޔާހޫ މަޝްވަރާ ކުރެއްވީ ޣައްޒާގެ ޙަލަތާ ގުޅޭ ގޮތުން އަދި ހަމާސްގެ ބަންދުގައި ތިބި ހުރިހާ ރަހީނުން ދޫކޮށްލުމަށް ކުރެވޭނެ މަސައްކަތްތަކާ ގުޅޭ ގޮތުންނެވެ. 

ހޮނިހިރު ދުވަހު ސީބީއެސް އަށް ދެއްވި އިންޓަވިޔުއެއްގައި ރޫބިއޯ ވަނީ، ޣައްޒާ ހަނގުރާމަ ހުއްޓާލުމަށް ވެސް ގޮވާލައްވާފައި އެވެ. އަދި ޣައްޒާގައި އާންމު ރައްޔިތުން ތަހަންމަލު ކުރަމުންދާ ވޭންތަކާއި، ކެކުޅުންތަކަށް ހަމާސް އިން ޒިންމާވާން ޖެހޭނެ ކަމަށް ވެސް ރޫބިއޯ ވަނީ ވިދާޅުވެފަ އެވެ. 

އިސްރާއީލް އިން ޣައްޒާ ގައި ހިންގަމުން އަންނަ ހަނގުރާމައިގައި މިހާތަނަށް ވަނީ އެ ޤައުމުން 53،000 އަށް ވުރެ ގިނަ ރައްޔިތުން ޝަހީދު ކޮށްލައިފަ އެވެ. އަދި އެތައް ހާސް ބަޔަކަށް ވަނީ އެކި ވަރުގެ ޒަޚަމުތައް ވެސް ލިބިފަ އެވެ. މީގެ އިތުރުން އެ ހަނގުރާމައިގެ ސަބަބުން މުޅި ޣައްޒާ މިހާރު ވަނީ ހަލާކުވެފަ އެވެ.

ހަމަލާތައް ދިނުމުގެ އިތުރުން އިސްރާއީލް އިން އަންނަނީ ޣައްޒާ އަށް ބޭނުންވާ އެންމެހައި އިންސާނީ އެހީ ވެެއްދުމަށް ވެސް ހުރަސް އަޅަމުންނެވެ. އެގޮތުން ޣައްޒާ އަށް ބޭނުންވާ ސާފު ބޯފެނާއި، ކާބޯ ތަކެއްޗާއި، އަދި ބޭސް ފަރުވާ އަށް ބޭނުންވާ އެހީ ވެއްދުމަށް ވަނީ ދަތިކޮށްފަ އެވެ.

އެކަމުގެ ސަބަބުން ޣައްޒާގައި އިންސާނީ ބޮޑު ކާރިސާއެއް ކުރިމަތި ވެދާނެ ކަމުގެ އިންޒާރު ބައިނަލްއަޤުވާމީ އިދާރާ ތަކުން ވެސް ވަނީ ދީފަ އެވެ. އަދި ޣައްޒާ އަށް އެހީ ވެއްދުމަށް އިސްރާއީލް އިން ހުރަސް އަޅާފައި ވާތީ، ޤައުމުތަކުން އަންނަނީ އެކަން ކުށްވެރި ވެސް ކުރަމުންނެވެ. 

އިސްރާއީލް އިން މި ފަހުން ބުނެފައިވާ ގޮތުގައި ހަމާސްގެ ބެލުމުގެ ދަށުގައި ތިބި އެ ޤައުމުގެ ހުރިހާ ރަހީނުން ދޫކޮށްލަންދެން ހަނގުރާމަ ކުރިއަށް ގެންދާނެ ކަމަށެވެ. އަދި އެކަމުގެ އިންޒާރު ނަތަންޔާހޫ ވެސް ވަނީ ދެއްވައިފަ އެވެ.