ރާއްޖޭގެ މާލީހާލަތު ރަނގަޅުވާތަން ނުފެންނާތީ މޫޑިޒް އިން ރާއްޖޭއަށް ދީފައިވާ "ޖަންކް" ރޭޓިންގ ދަމަހައްޓައިފި
ރާއްޖޭގެ މާލީ ހާލަތު ރަނގަޅުވާތަން ނުފެނޭ
ބައިނަލްއަގްވާމީ މާލީ އިދާރާ މޫޑީޒް
ރާއްޖޭގެ މާލީ ހާލަތު ރަނގަޅުވާތަން ނުފެންނާތި އަދި ރަނގަޅުކުރުމަށް ހަރުދަނާ ފިޔަވަޅުތަކެެއް އަޅާފައިނުވާތީ ދުނިޔޭގެ އެންމެ ބޮޑު އެއް ކްރެޑިޓް ރޭޓިން އެޖެންސީ، މޫޑީސްއިން ރާއްޖޭގެ "ޖަންކް" ރޭޓިން ދަމަހައްޓައިފިއެވެ.
އޮކްޓޯބަރ 2024 އިން ފެށިގެން ބޭރު ފައިސާގެ ރިޒާވް އިތުރުވަމުން އައިސްފައިވާކަން މޫޑީޒްއިން ވަނީ ފާހަގަ ކޮއްފައެވެ. އަދި މިއީ ބޭރުގެ މާލީ އިދާރާތަކުގެ އެހީތެރިކަމާއި އަދި ބޭރު ފައިސާ އާއި ގުޅޭ ސިޔާސަތުތަކަށް ގެނެވުނު އިޞްލާޙުތަކާއި ބޭރު ފައިސާއިން ލިބޭ ދައުލަތުގެ އާމްދަނީގެ ސިޔާސަތުތައް ތަންފީޒު ކޮށްފައި ވުމުގެ ނަތީޖާކަމަށް ބުނެފައިވެއެވެ.
މިދިޔައަހަރު ރާއްޖޭގެ ރޭޓިން "ސީއޭއޭ 1" ގައި ހުރި ނަމަވެސް މޫޑީސްއިންވަނީ ރާއްޖޭގެ ރޭޓިން 'ސީއޭއޭ 2" އަށް ދަށްކޮށްފައެވެ. ދަރަނި ނުދެއްކޭނެ ކަމުގެ ބިރު ބޮޑުވުމުން މޫޑީސް ރޭޓިންގައި ރާއްޖެ މިހާރު އޮތީ "ނޮން-އިންވެސްޓްމެންޓް" ގްރޭޑުގަ އެވެ.
ދިވެހިރާއްޖެއަށް ދިމާވެފައިވާ އެންމެ ބޮޑު ގޮންޖެހުމަކީ 2026 ވަނަ އަހަރު ދައްކަންޖެހޭ 500 މިލިއަން ޑޮލަރުގެ ސުކޫކް ހިމެނޭގޮތަށް، ބޭރުގެ ދަރަނި އަދާކުރުމަކީ ރާއްޖެއަށް ދިމާވެފައިވާ ގޮންޖެހުމެއް ކަމަށް މޫޑީޒްގެ ރިޕޯޓްގައި ބުނެފައިވެއެވެ.
އެމެރިކާގެ އިޤްތިޞާދީ ސިޔާސަތުތަކާ ގުޅިގެން މާލީ ބާޒާރަށް އޮންނަ ޔަޤީންކަން ދަށްވެފައިވުމާއެކު، ބައިނަލްއަޤްވާމީ މާކެޓުން ފައިނޭންސިންގ ހޯދުމަށް ހުރި ގޮންޖެހުންތައްވެސް މޫޑީޒްގެ ރިޕޯޓްގައި ފާހަގަކޮށްފައި ވެއެވެ.
މީގެ އިތުރުން އޮކްޓޯބަރު 2024، އިން ފެށިގެން ބޭރު ފައިސާގެ ރިޒާވު ރަނގަޅުވަމުން އައި ނަމަވެސް ކުރިއަށް އޮތް ދުވަސްތަކުގައި ދައްކަން ޖެހޭ ދަރަނި ދެއްކުމުގައި ކަންބޮޑުވުންތަކެއް ހުރި ކަމަށް މޫޑީސްއިންވަނީ ފާހަގަކޮށްފައެވެ. އަދި ކުރިއަށް އޮތް ތަނުގައި ވެސް ރޭޓިންގ ރަނގަޅުވާނެ ކަމަށް ނުބެލެވޭ ކަމަށް މޫޑީސްގެ ރިވިއުގައި ފާހަގަކޮށްފައިވެ އެވެ. މާލީ އިސްލާހީ ފިޔަވަޅުތައް ތަންފީޒު ކުރުމުގައި ފަހަތު ފަޔަށް ބުރަވާނަމަ ރޭޓިން ދަށްކުރުމުގެ ފުރުސަތު އޮތް ކަމަށް މޫޑީސްއިން ފާހަގަކޮށްފައިވެ އެވެ.
ހަރަދު ކުޑަކުރުމަށް ކުރީ ސަރުކާރުން މުހިންމު ފިޔަވަޅުތަކެއް އަޅާފައިވެއެވެ. އެގޮތުން ސިޔާސީ މަގާމްތަކާއި މުވައްޒަފުންގެ އަދަދު މަދުކުރުމާއި ސަރުކާރުގެ ދަތުރުތަކަށް ކުރާ ހޭދަ ކުޑަކުރުން ހިމެނެއެވެ. ރައީސް މުއްޒު ވެރިކަމާ ހަވާލުވެވަޑައިގެން ސިޔާސީ މުވައްޒަފުންގެ އަދަދު މަދުކުރައްވާނެ ވާހަކަ ވިދާޅުވިނަމަވެސް ސިޔާސީ މަގާމްތަކާއި މުވައްޒަފުންގެ އަދަދު ގިނަކަން ފާހަގަކޮށްލެވެއެވެ.
