އިތުރަށް ފުރިހަމަކުރުމަށް، ކޮމިޓީ އަށް ފޮނުވި ބަންޑާރަ ނައިބުގެ އޮފީހުގެ ބިލު ފާސްކުރަން ނެގީ 10 ވަރަކަށް މިނިޓް

ބަންޑާރަ ނައިބުގެ އޮފީހުގެ ބިލު، މަޖިލީހުން ފާސްނުކޮށް އިތުރަށް ފުރިހަމަކުރުމަށްޓަކާ ޖުޑީޝަރީ ކޮމިޓީ އަށް ފޮނުވުމުން ބުދަ ދުވަހުގެ ރޭ ޖުޑީޝަރީ ކޮމިޓީގެ ބައްދަލުވުމެއް ބާއްވާ އިސްލާހުތަކާއި އެކު އެ ބިލު ފާސްކޮށްފި އެވެ.

ބަންޑާރަ ނައިބުގެ އޮފީހުގެ ބިލު ސަރުކާރުގެ ފަރާތުން ހުށަހެޅީ ސިވިލް ސަރވިސްގައި ނުހިމެނޭގޮތަށް ބަންޑާރަ ނައިބުގެ އޮފީހުގެ ޚިދުމަތަކީ ވަކި ޚިދުމަތެއްގެ ގޮތުގައި ޤާއިމުކުރުމަށް ކަމަށް ސަރުކާރުން ވަނީ ބުނެފައެވެ. ބުދަ ދުވަހު މަޖިލީހުގެ ތަޅުމުން ވަނީ އެ ބިލު ފާސް ނުކޮށް އިތުރަށް ދިރާސާކުރުމަށް މަޖިލީހުގެ ޖުޑީޝަރީ ކޮމިޓީ އަށް ބިލު ފޮނުވާފަ އެވެ.

ބުދަ ދުވަހުގެ ރޭ 19:57ގައި މަޖިލީހުގެ މީޑިއާ ގްރޫޕްގައި ބުދަ ދުވަހުގެ ރޭ 09:00ގައި ޖުޑީޝަރީ ކޮމިޓީ ބާއްވާކަމާއި އެ ބައްދަލުވުމުގައި ކުރާނީ ބަންޑާރަ ނައިބުގެ އޮފީހުގެ ބިލު ދިރާސާކުރުމުގެ މަސައްކަތް ކަމަށް ހާމަކުރިއެވެ. އެ ބައްދަލުވުން ފެށުނީ ބުދަ ދުވަހުގެ ރޭ22:08 ހާއިރެވެ. އެނގިފައިވާ ގޮތުން ބައްދަލުވުން ނުފެށި ލަސްވީ ބައެއް ލިޔެކިޔުންތައް ހަމަނުވުމުގެ ސަބަބުންނެވެ.

ބުދަ ދުވަހުގެ ރޭގެ ކޮމިޓީގައި އެ ބިލާއި މެދު އެއްވެސް މެމްބަރަކު އިތުރު ކަމެއް ފާހަގަކުރަން ލިބުނު ފުރުސަތުގައި އެއްވެސް މެމްބަރަކު އިތުރު ކަމެއް ފާހަގަކުރައްވާފަ އެއް ނުވެއެވެ. އަދި ހުށަހެޅި އިސްލާހުތަކާއި މެދު ވެސް އިތުރު ހުށަހެޅުމެއް ނުވަތަ ލަފަ އެއް މެމްބަރުން ދީފަ އެއް ނުވެއެވެ. އަދި ބިލަށް ގެނެސްފައިވާ އިސްލާހުތަކަކީ އެއް މާއްދާ އަނެއް މާއްދާ އާއި ފުށު އެރުން ހުރި ކަންކަން އެކަންޏެވެ.

ކޮމިޓީ އަށް ހުށަހެޅި އިސްލާހުތަކާއި އެކު ބިލު ފާސްކުރުމަށް ވޯޓަށް އެހުމުން އެ އިސްލާހުތައް ފާސްކުރަން ފެންނަ ކަމަށް ކޮމިޓީ އަށް ހާޒިރުވި ހުރިހާ މެމްބަރުން ވަނީ ވޯޓުދެއްވާފައެވެ.

ބަންޑާރަ ނައިބުގެ އޮފީހުގެ ބިލު، ސަރުކާރުގެ ފަރާތުން ރައްޔިތުންގެ މަޖިލީހަށް ހުށަހަޅުއްވާފައި ވަނީ 2024 ވަނަ އަހަރުގެ ޑިސެމްބަރ 2 ވަނަ ދުވަހު، މާފަންނު ދެކުނު ދާއިރާގެ މެންބަރު ޢަބްދުﷲ ރިފާޢުއެވެ.

މި ބުލުގައި ބަންޑާރަނައިބުގެ މަގާމަށް އައްޔަން ކުރެވޭ ބޭފުޅެއްގެ ކިބައިގައި ހުންނަންޖެހޭ ޝަރުތުތަކާއި ޒިންމާތަކާއި މަސްއޫލިއްޔަތު ކަނޑައެޅުމާއެކު، ބަންޑާރަނައިބުގެ އޮފީހުގެ ނަމުގައި ސިވިލް ސަރވިސްގައި ނުހިމެނޭ ސަރުކާރުގެ ވަކި އޮފީހެއް ޤާއިމުކުރުމަށް ހުށަހަޅާފައިވެއެވެ. މީގެ ކުރިން ބަންޑާރަ ނައިބުގެ އޮފީސް ހިންގަމުން އައީ ސިވިލް ސަރވިސްގެ ދަށުންނެވެ.