ފުލް ފޯސް އާއެކު ޣައްޒާ އަށް ވަންނާނެ ކަމަސް ނަތަންޔާހޫ ވިދާޅުވެއްޖެ

ޣައްޒާ ގައި އިސްރާއީލް އިން ހިންގަމުން އަންނަ ހަނގުރާމައިގައި، ކުރިއަށް އޮތް ދުވަސްތަކުގެ ތެރޭގައި ފުލް ފޯސް އާއެކު އިސްރާއީލްގެ ސިފައިން ޣައްޒާ އަށް ވަންނާނެ ކަމަށް، އިސްރާއީލްގެ ބޮޑު ވަޒީރު ބެންޖަމިން ނަތަންޔާހޫ ވިދާޅުވެއްޖެ އެވެ. 

އިސްރާއީލްގެ ބޮޑު ވަޒީރުގެ އޮފީހުން އަންގާރަ ދުވަހު ނެރުނު ބަޔާނެއްގައި ބުނެފައި ވަނީ، އިސްރާއީލްގެ އޮޕަރޭޝަން ފުރިހަމަ ކުރުމަކީ ހަމާސް ބަލިކޮށް، އެ ޖަމާއަތް ނައްތާލުން ކަމަށެވެ. 

އެ ބަޔާނުގައި ވަނީ އިސްރާއީލް އިން ޣައްޒާ ގައި ހިންގަމުން އަންނަ ހަނގުރާމަ ހުއްޓާ ނުލާނެ ކަމަށް ވެސް ބުނެފަ އެވެ. އެހެން ނަމަވެސް، ވަގުތީ ގޮތުން ހަނގުރާމަ ހުއްޓާލަފާނެ ކަމަށް ވަނީ ބުނެފަ އެވެ. 

މީގެ އިތުރުން ނަތަންޔާހޫގެ ބަޔާނުގައި ބުނެފައި ވަނީ ޣައްޒާގެ ރައްޔިތުން ބަލައި ގަންނާނެ ޤައުމު ތަކެއް ހޯދުމުގެ މަސައްކަތް ވެސް ކުރަމުން އަންނަ ކަމަށެވެ. އަދި ޣައްޒާގެ ރައްޔިތުން އެ ޤައުމު ދޫކޮށް ދިޔުމުގެ ފުރުސަތު ދީފި ނަަމަ، ފަންސާސް އިންސައްތަ މީހުން ޤައުމު ދޫކޮށް ދާނެ ކަމަށް އަންދާޒާ ކުރެވޭ ކަމަށް ނަތަންޔާހޫގެ ބަޔާނުގައި ވަނީ ބުނެފަ އެވެ. 

އެކަމަށް އިޝާރާތް ކުރައްވާ ފާހަގަ ކޮށްފައި ވަނީ، ޣައްޒާގެ ރައްޔިތުން އެހެން ޤައުމުތަކަށް ފޮނުވުމަށް ކުރަން ޖެހޭ އިދާރީ ކަންކަން މިހާރު ނިމިފައިވާ ކަމަށެވެ. އަދި މިހާރު ބޭނުން ވަނީ ޣައްޒާގެ ރައްޔިތުން ބަަލައި ގަންނާނެ ޤައުމުތަކެއް ކަމަށް ވެސް ބުނެފައިވެ އެވެ. 

އިސްރާއީލް އިން ޣައްޒާގައި ހިންގަމުން އަންނަ ހަނގުރާމަ ވަގުތީ ގޮތުން މެދު ކަނޑާލުމަށް، މިއަހަރުގެ ޖަނަވަރީ މަހުގެ ތެރޭގައި ވަނީ އެއްބަސްވެފަ އެވެ. ނަމަވެސް، އެ އެއްބަސްވުމާ ޚިލާފަށް މާޗު މަހުގެ ތެރޭގައި އިސްރާއީލް އިން ވަނީ އަލުން ޣައްޒާ އަށް ހަމަލާތައް ދޭން ފަށައިފަ އެވެ.

ޣައްޒާ އަށް އަލުން ހަމަލާތައް ދޭން ފެށުމުގެ ކުރިން، އިސްރާއީލް އިން ވަނީ ޣައްޒާ އަށް ބޭނުންވާ އެހީގެ ސާމާނު ވެއްދުމަށް ވެސް ހުރަސް އަޅައިފަ އެވެ. އަދި އެކަމުގެ ސަބަބުން ޣައްޒާގެ ރައްޔިތުންނަށް ބޭނުންވާ އެހީގެ ސާމާނު ފޯރު ކޮށްދިނުމުގައި ވަނީ އިންތިހާ އަށް ދަތިތަކާ ކުރިމަތިލާން ޖެހިފަ އެވެ.

މި ހަނގުރާމައިގައި ވަނީ މިހާތަނަށް ޣައްޒާ އިން 52،000 އަށް ވުރެ ގިނަ މީހުން ޝަހީދު ކޮށްލައިފަ އެވެ. އަދި 119،000 އަށް ވުރެ ގިނަ މީހުންނަށް ވަނީ އެކިވަރުގެ ޒަޚަމުތައް ލިބިފަ އެވެ. އޭގެ ތެރޭގައި ގިނައިން ހިމެނެނީ އަންހެނުންނާއި ކުޑަ ކުދިންނެވެ.

އިސްރާއީލްގެ ހަމަލާތަކުގެ ސަބަބުން ޣައްޒާގެ ބޮޑު އިންސައްތައެއް ވަނީ ވީރާނާވެ، ހަލާކުވެފަ އެވެ. މަދަރުސާތަކާއި، އާންމު ރައްޔިތުންގެ ގެތައް ވަނީ ބިމާ ހަމަކޮށްފަ އެވެ. އަދި އިސްރާއީލް އިން ވަނީ ހޮސްޕިޓަލް ތަކާއި، މިސްކިތްތަަކަށް އަމާޒުކޮށް ވެސް ގިނަ ހަމަލާތަކެއް ދެމުންނެވެ.