ކުރީ ސަރުކާރުގައި ފެށި ފޯސްޓަރ ޕްރޮގްރާމް ވަރަށް ކާމިޔާބު، މިހާތަނަށް 72 ކުދިންނަށް އާއިލީ ވެއްޓެއް ގާއިމްކޮށްދެވިފައިވޭ
އިޖުތިމާއީ ހުނަރުތައް ދަސްކޮށްދިނުމަށް އެންމެ ރަނގަޅީ އާއިލީ ވެއްޓެއް
އެކި ހަރަކާތްތަކާއެކު ކުޑަ ކުދިންނަށް ބޭއްވި ޚާއްސަ ހަވީރެއްގެ ތެރެއިން
ކޮންމެ ކުއްޖަކަށް އާއިލާއެއް ޕްރޮގްރާމުގެ ތެރެއިން މިހާތަނަށް 72 ކުދިންނަށް އާއިލީ ވެއްޓެއް ހޯދާދެވިފައިވާ ކަމަށް އިޖްތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އާއިޝަތު ޝިހާމް ވިދާޅުވެއްޖެއެވެ.
ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި، ޖެންޑަރ މިނިސްޓަރު އާއިޝަތު މުހައްމަދު ދީދީގެ ބެއްލެވުމުގެ ދަށުން ވަނީ ދައުލަތުގެ ބެލުމުގެ ދަށުގައި ތިބޭ ކުދިން ފޯސްޓަރ ކުރުމާގުޅޭ ޚާއްސަ ޕްރޮގްރާމެއް ފަށާފައެވެ. މި ޕްރޮގްރާމް ވަރަށް ކާމިޔާބު ކަމާއެކު ކުރިއަށް ގެންގޮސް، މިކަމަށް އާއްމު ރައްޔިތުން ވަރަށް ބޮޑަށް ހޭލުންތެރި ކޮށްފައިވެއެވެ. ނަމަވެސް ސަރުކާރުން ބަދަލުވެގެން ދިިއުމާއެކު، މިސަރުކާރުން ވަނީ ފޯސްޓަރ ޕްރޮގްރާމްގެ ނަން ބަދަލުކޮށް، ''ކޮންމެ ކުއްޖަކަށް އާއިލާއެއް'' ނަމުގައި ޕްރޮގްރާމެއް ފަށާފައެވެ.
ކުޑަކުދިންގެ ދުވަހާއި ގުޅިގެން ވަޒީރު އާއިޝަތު ޝިހާމް ވިދާޅުވީ ކުދިންގެ ހެދިބޮޑުވުމާއި، ކުދިންގެ ޝަޚުސިއްޔަތު ބިނާކުރުމާއި، އަޚުލާގީ މިންގަނޑުތަކާއި، އިޖުތިމާއީ ހުނަރުތައް ދަސްކޮށްދިނުމަށް އެންމެ ރަނގަޅީ އާއިލާގެ ލޯތްބާއި އަޅައިލުން ލިބޭ ކުދިންގެ ރައްކާތެރިކަން ކަށަވަރުކުރެވިފައިވާ އާއިލީ ވެއްޓެއް ކަމަށެވެ.
މިފަދަ މާހާއުލެއްގައި ކުދިން ބޮޑުވުމަކީ އެކުދިންގެ މުސްތަގުބަލު ބިނާކުރުމަށް އެޅިގެންދާނެ ހަރުދަނާ ބިންގަލެއް ކަމަށް ވަޒީރު ވިދާޅުވިއެވެ. ނަމަވެސް ތަފާތު އެކި ސަބަބުތަކާހުރެ ދައުލަތުގެ ބެލުމުގެ ދަށަށް ކުދިން ނަގަންޖެހޭ ހާލަތްތައް ވެސް މެދުވެރިވާ ކަމަށް ވަޒީރު ވިދާޅުވިއެވެ. އަދި މަރުކަޒުގައި ކުދިން ބެލެހެއްޓުމަކީ ވެސް ކުދިންގެ ހެދިބޮޑުވުމާއި، ކުދިންގެ ނަފްސާނީ އަދި އިޖުތިމާއީ ދުޅަހެޔޮކަމަށް އެންމެ ފައިދާހުރި ގޮތް ނޫންކަން ދިރާސާތަކުން އެނގޭ ކަމަށެވެ.
ކޮންމެ ކުއްޖަކީ ވެސް އާއިލީ ވެއްޓެއްގެ ހިމާޔަތާއި ރައްކާތެރިކަން ލިބިގެން، އާއިލީ ގުޅުންތަކުގެ ތެރެއިން ބޮޑުވާ ކުދިންކަން ކަށަވަރުކުރުމަށް މަސައްކަތްކުރާ ކަމަށް ވަޒީރު ވިދާޅުވިއެވެ. އެކަމަށްޓަކައި، ކޮންމެ ކުއްޖަކަށް އާއިލާއެއް ނަމުގައި ޚާއްސަ ޕްރޮގްރާމެއް ކުރިއަށް ގެންގޮސް، މިހާތަނަށް ދައުލަތުގެ ބެލުމުގެ ދަށުގައި ތިބި 72 ކުދިންނަށް އާއިލީ ވެއްޓެއް ހޯދައިދެވިފައިވާ ކަމަށް ވަޒީރު ވިދާޅުވިއެވެ.
މިއީ އާއިލާތަކުގެ ހާލަތު ބަދަލުކޮށްގެން، ދައުލަތުގެ ބެލުމުގެ ދަށުގައި ތިބި ކުދިންނާއި އެ ކުދިންގެ އުފަން އާއިލާ ގުޅުވައިދިނުމާއި، ފޮސްޓަރިންގ ނިޒާމު ހަރުދަނާކޮށް، ވަގުތީގޮތުން ވެސް ކުދިން ފޮސްޓަރކޮށް އާއިލާގައި ބެހެއްޓޭނެ ނިޒާމު ގާއިމުކޮށް، ކުދިންނަށް އާއިލީ ވެއްޓެއް ހޯދައިދިނުމަށް ކުރެވެން ފެށި ވަރުގަދަ މަސައްކަތެކެއް. އަދި މި މަސައްކަތުގެ ތެރެއިން މިހާތަނަށް ދައުލަތުގެ ބެލުމުގެ ދަށުގައި ތިބި 72 ކުދިންނަށް ވަނީ އާއިލީ ވެއްޓެއް ހޯދައިދެވިފައި. ދައުލަތުގެ ބެލުމުގެ ދަށުގައިވާ ކުދިންނަށް ޢާއިލާއެއް ހޯދައިދިނުމުގެ މަސައްކަތަށް ރައްޔިތުން ދެއްވާ ތަރުޙީބަކީ، ކުޑަކުދިންގެ ރައްކާތެރިކަމަށް މުޖުތަމަޢުން ކުރައްވާ މަސައްކަތްތަކާއި، ކޮންމެ ކުއްޖަކީވެސް ރައްކާތެރި، ލޯބިވެތި މާޙައުލެއްގައި ހެދިބޮޑުވާނެ ކުދިންތަކެއްކަން ކަށަވަރުކުރުމަށް އެންމެން ގުޅިގެން މަސައްކަތްކުރެވޭކަމުގެ ރީތި މިސާލެއް.އިޖްތިމާއީ އަދި އާއިލީ ތަރައްގީއާ ބެހޭ ވަޒީރު ޑރ. އާއިޝަތު ޝިހާމް
މީގެ އިތުރުން ވަޒީރު އާއިޝަތު ޝިހާމް ވަނީ ކުރިއަށް އޮތް ތަނުގައި ކުޑަކުދިންކުދިންގެ ހައްގުތަކާއި ރައްކާތެރިކަން އިތުރަށް ކަށަވަރުކުރުމަށް އެންމެން ގުޅިގެން މަސައްކަތްކުރުމުގެ އަޒުމުގައި ސާބިތުވެ ތިބުމަށް އިލްތިމާސްކުރައްވާފައެވެ.
މިއަހަރުގެ ކުޑަކުދިންގެ ދުވަހުގެ ޝިއާރަކީ "އުފާވެރި ގުޅުން، އުފާވެރި ވަގުތު، އުފާވެރި ކުދިން". މި ޝިއާރެވެ.
