އުއްތަމަ ފަނޑިޔާރު މުއުތަސިމް އަދުނާން ކުއްލި ގޮތަކަށް ރިޓަޔަރ ކުރައްވައިފި
އުއްތަމަ ފަނޑިޔާރު ރިޓަޔާ ކުރައްވަން ނިންމަވާފައި އޮތީ މި އަހަރުގެ ފަހުކޮޅު
ދިވެހިރާއްޖޭގެ ރައީސުލްޖުމްހޫރިއްޔާ ޑރ.މުހައްމަދު މުއިއްޒު އަދި ދިވެހިރާއްޖޭގެ އުއްތަމަ ފަނޑިޔާރު އަލްއުސްތާޛް އަޙުމަދު މުއުތަސިމް އަދުނާން
ދިވެހިރާއްޖޭގެ އުއްތަމަ ފަނޑިޔާރު މުއުތަސިމް އަދުނާން ކުއްލި ގޮތަކަށް ރިޓަޔަރ ކުރައްވައިފި އެވެ.
ރާއްޖެއެމްވީއަށް އިތުބާރުހުރި ފަރާތަކުން ވިދާޅުވީ އުއްތަމަ ފަނޑިޔާރު ރިޓަޔަރ ކުރައްވަން ނިންމަވާފައި އޮތީ މިއަހަރުގެ ފަހުކޮޅު ކަމަށާއި، ނަމަވެސް ބުރާސްފަތި ދުވަހު ރިޓަޔަރ ކުރައްވަން ނިންމެވިކަން ސިޓީއެއްގެ ޒަރީއާއިން ޖުޑީޝަލް ސަރވިސް ކޮމިޝަން (ޖޭއެސްސީ)އަށް ފޮނުއްވާފައިވާ ކަމަށެވެ.
ނަމަވެސް ޖޭއެސްސީން ރައީސް އޮފީހަށް އެ ސީޓީ ފޮނުވި ކަމެއް ކަށަވަރު ކުރެވިފައިނުވެއެވެ. އަދި މިސިޓީއަށް ޖޭއެސްސީން އަދި ޖަވާބެއް ދީފައެއްނުވެ އެވެ.
އުއްތަމަ ފަނޑިޔާރު މުއުތަސިމް ރިޓަޔަރ ކުރައްވަން ނިންމެވިއިރު، ސުޕްރީމް ކޯޓުގެ ދެ ފަނޑިޔާރަކު މަގާމުން ވަކި ކުރުމުގެ މަސައްކަތް ސަރުކާރުން ދަނީ މަސައްކަތް ކުރަމުންނެވެ.
އެއީ ފަނޑިޔާރު މަހާޒް އަލީ ޒާހިރާއި ފަނޑިޔާރު އަޒްމިރާލްދާ ޒާހިރެވެ. އަޒްމިރަލްދާ އާއި މަހާޒް ފަނޑިޔާރު ކަމުން ވަކިކުރާ މައްސަލަ ޖުޑީޝަރީ ކޮމިޓީއަށް ފޮނުވާފައިވަނީ 5 މެއި 2025 ގައެވެ. އެ ދުވަހު ކޮމެޓީގައި ފަނޑިޔާރުން ވަކިކުރާ މައްސަލާގެ ރިޕޯޓު އިތުރަށް ދިރާސާ ކުރުމަށް ނިންމިއެވެ. އަދި އެ މައްސަލަ ކުރިއަށް ގެންދިއުމަށް 6 މެއި 2025 ވީ އަންގާރަ ދުވަހަށް ތާވަލް ކުރުމަށްފަހު، ޖުޑީޝަރީ ކޮމިޓީގެ ބައްދަލުވުން ފަހުވަގުުތު ކެންސަލްކުރިއެވެ. ނަމަވެސް ރައްޔިތުންގެ މަޖިލީހުން ސަބަބެއް ހާމަކޮށްފައިނުވެއެވެ.
މި މައްސަލައާ ގުޅިގެން ކެންދޫ ދާއިރާގެ މެންބަރު އަދި ޖުޑިޝަރީ ކޮމިޓީގައިވެސް ހިމެނިވަޑައިގަންނަވާ ކެންދޫ ދާއިރާގެ މެންބަރު މައުރޫފު ޒާކިރު ވިދާޅުވީ މި މައްސަލާގައި ބާއްވަން ތާވަލްކުރި ކޮމިޓީ ބައްދަލުވުން ފަހުވަގުތު ކެންސަލް ކުރުމުން ދޭހަވަނީ ޖޭއެސްސީން މި މައްސަލަ ބެލުމުގައި ގޯސްތަކެއް ހަދާފައިވާކަން ކަމަށެވެ.
