ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އިން ދެ މަހު އެއް ބިލެއް ގޭބިސީތަކަށް ފޮނުވި މައްސަލައެއް ފެންމަތިވެއްޖެއެއެވެ.

ރާއްޖެއެމްވީއަށް މައުލޫމާތު ދިން މީހުން ބުނީ ސްޓެލްކޯއިން ފޮނުވި ދެ މަހުގެ ބިލު އެއްވަރު ކަމަށާއި، މިއީ އޮޅުވާލައި، ވައްކަން ކުރާ ކަމުގެ އެއްހެކި ކަމަށެވެ. ދެ މަހެއްގައި އެއްވަރަށް ކަރަންޓު ބޭނުން ނުކުރެވޭނެ ކަމަށާއި، ދެން މިއީ އޮޅުމެއް ކަމަށް ސްޓެލްކޯއިން ބުނެ، ހަމަޖެއްސުމަށް މަސައްކަތް ކުރި ނަމަވެސް އެކުންފުންޏަށް އިތުބާރު ނެތް ކަމަށް އެމީހުން ބުނެފައިވެއެވެ.

ރާއްޖެއެމްވީއަށް ވަނީ ގިނަ ގޭބިސީތަކެއްގެ ބިލްތަކުގެ ކޮޕީ ލިބިފައެވެ. އެގެތަކުގެ ދެ މަހުގެ ބިލު ހުރީ އެއްވަރަކަށެވެ. އެގޮތުން 2 އޭޕްރީލް 2025 ގައި ފޮނުވާފައިވާ ބިލާއި، 8 މެއި 2025 ގައި ފޮނުވާފައިވާ ބިލަށް އަރާފައިވަނީ އެއް އަދެދެކެވެ.

އަނެއް ބައި ގޭބިސީތަކަށް ފޮނުވާފައިވާ ބިލުތަކުގައި ލާރީގެ ކުޑަކުޑަ ތަފާތެއް ހުއްޓެވެ. އަދި ކަރަންޓު ވަރަށް މަދުން ބޭނުން ކުރި ނަމަވެސް ބޮޑު ބިލެއް ފޮނުވާފައިވާ ކަމުގެ ޝަކުވާ ވެސް ބައެއް މީހުން ކޮށްފައިވެއެވެ.

މި މައްސަލައާ ގުޅިގެން ސްޓެލްކޯގެ ބަހެއް ވަނީ ލިބޭ ގޮތް ނުވެފައެވެ.

ސްޓެލްކޯއިން ކަރަންޓު ބިލުތައް ހެދުމުގައި އޮޅުވާލުތަކެއް ގެންގުޅޭ ކަމަށް ގިނަ އާއްމު ރައްޔިތުން ދަނީ ތުހުމަތު ކުރަމުންނެވެ. ނަމަވެސް އެކުންފުނިން މީގެ ކުރިން ބުނެފައިވަނީ ބޭނުންނުކުރާ ކަރަންޓަށް ބިލު ނުކުރާނެ ކަމަށާއި، ހޫނު މޫސުމާ ދިމާކޮށް އަބަދުވެސް ބިލުތައް ބޮޑުވާ ކަމުގެ ޝަކުވާ ލިބޭ ކަމަށެވެ. ނަމަވެސް ގަބޫލުނުކުރެވޭ މިންވަރަށް ކަރަންޓު ބިލު ބޮޑުވެފައިވާ ނަމަ އެ މައްސަލަ ހުށަހެޅުމަށް ސްޓެލްކޯއިން ވަނީ އެދިފައެވެ.