ޔަމަންގެ ސަނާ އިންޓަނޭޝަނަލް އެއާޕޯޓަށް އަމާޒުކޮށް އިސްރާއީލް އިން ދިން ހަމަލާއާ ގުޅިގެން، އެ އެއާޕޯޓުގެ އެންމެހާ ޚިދުމަތްތައް މެދު ކަނޑާލައިފި އެވެ. 

ސަނާ އެއާޕޯޓުގެ ޑިރެކްޓަރު ޖެނަރަލް ބުދަ ދުވަހުގެ ހެނދުނު އެކްސްގައި ކުރެއްވި ޕޯސްޓެއްގައި ވިދާޅުވީ، އިތުރު އެންގުމަކާ ނުލައި އެއާޕޯޓުގެ އެންމެހާ ޚިދުމަތްތައް މެދު ކަނޑާލާފައިވާ ކަމަށެވެ. އެހެން ނަމަވެސް، އަލުން ޚިދުމަތް ފެށޭނެ ވަގުތެއް އޭނާ ހާމަކޮށްފައި ނުވެ އެވެ.

އިސްރާއީލްގެ އަސްކަރިއްޔާ އިން ސަނާ އެއާޕޯޓަށް އަމާޒުކޮށް އަންގާރަ ދުވަހު ހަމަލާ ދީފައިވާއިރު، އޭގެ ކުރީ ދުވަހު ވެސް ވަނީ ހަމަލާ ދީފަ އެވެ. މި ހަމަލާތައް އަމާޒު ކޮށްފައި ވަނީ އީރާނާ ގުޅުން އޮންނަ ހޫތީން ޖަމާއަތާ ދެކޮޅަށް ކަމަށް ވަނީ ބުނެފަ އެވެ.

މި ހަމަލާތައް ދީފައިވާއިރު، އިސްރާއީލަށް އަމާޒުކޮށް ހޫތީން އިން ވެސް ވަނީ މި ފަހުން ހަމަލާތަކެއް ދީފަ އެވެ. އެގޮތުން އިސްރާއީލްގެ މައި އެއާޕޯޓަށް އަމާޒުވާ ގޮތަށް ހޫތީން އިން ވަނީ ހަމަލާ ދީފަ އެވެ. 

އިސްރާއީލް އިން ސަނާ އެއާޕޯޓަށް ދިން ހަމަލާގެ ސަބަބުން، އެ އެއާޕޯޓަށް ބޮޑެތި ގެއްލުން ތަކެއް ލިބިފައިވާ ކަމަށް އެއާޕޯޓުގެ އިސްވެރިން ވަނީ ހާމަކޮށްފަ އެވެ. 

ސަލާމަތީ ކަންކަމާއި އެއާޕޯޓުގެ މަރާމާތުތައް ފުރިހަމަ ކުރެވެންދެން، އެއާޕޯޓުގެ ޚިދުމަތްތައް މެދު ކަނޑާލެވިފައި ހުންނާނެ ކަމަށް އެއާޕޯޓުގެ އޮފިޝަލުން ބުނެ އެވެ.