ވިސްނާ ފިކުރު ކުރާ މީހަކަށް މިހުންނަނީވެސް އިބްރަތްތެރި ވާހަކަތަކެވެ. އަޖައިބުވެ އަންތަރީސް ކުރުވާނެހާ ކަންތައްތަކެވެ. ހައިރާންވެ އިނގިލީގައި ދައިގަނެވޭނެ ހާ މަންޒަރުތަކެވެ. މީހަކު މޮޔަވެދާނެހާ އަޑުތަކެވެ.

ރައީސް ޑރ. މުއިއްޒު ވެރިކަމަށް ވަޑައިގަތީއްސުރެ މިއަދާއި ހަމައަށް ސޮއިކުރައްވަމުން ގެންދަވާ އެއްބަސްވުންތަކާއި އެމްއޯޔޫތަކާއި މެދު ވިސްނާ ފިކުރު ހިންގާލުމުން ހަމަ ހަގީގަތުގައިވެސް ލަދުން ބޯހަލާކުވާހާ ވެއެވެ. މީހަކު ފަހަރުގައި ފޮންޏެއް ކަނޑާލަފާނެއެވެ. އަޅިއެއް ބުރުވާލަފާނެއެވެ. ކަރައެއްވެސް ފަޅަލަފާނެއެވެ. އެކަމަކު މީދެން ތަންފުކެއް ބޮޑުވަރެއް ނޫންތޯއެވެ. މިދައްކަނީ މިގައުމުގެ ރައީސުލްޖުމްހޫރިއްޔާގެ ވާހަކަ ވިއްޔާއެވެ. އަންޑަރ ވޯޓަރ ޓަނަލްއިން ފަށަމާތޯއެވެ. ވާހަކަފުޅު ދައްކަވާލެއްވިއިރު ހީވަނީ އޭގެ ތެރެއިން ދަތުރުކުރެވޭ ހެންނެއެވެ. ޓަނަލްގެ ވަށައިގެން ހުރި ބިއްލޫރިތަކުން ބޮޑެތި ރަތްމަހާއި، މާމެއިޑާއި، ކަނޑު ރަސްގެފާނުވެސް ފެންނަމުންދާ ހެންނެއެވެ. ވިދާޅުވީ ކަމުގެ މާހިރުން މިވަގުތުވެސް އެކަމުގެ ފީސިބިލިޓީ ހަދަމުންދާ ކަމަށެވެ. ތިނަދޫގައި އަޅަންބުނި އިންޓަރނޭޝަނަލް އެއަރޕޯޓްގެ ވާހަކަ މިފަދައެވެ. ޓާނިމަލް ހުންނަނީވެސް ފެން މަތީގައެވެ. ބިއްލޫރިންނެއެވެ. އެވާހަކަ އަޑު އިވުނު ދުވަހުވެސް ކުއްލި އަކަށް ހަނދާނަށް އައީ ސުލައިމާނުގެފާނާއި ބަލްގިސް ރަނިންގެ ވާހަކައެވެ. އައްޑޫ މީދޫއާއި ހިތަދޫއާއި ދެމެދު އަޅާ ބްރިޖްވެސް ހަމަ އެފަދައެވެ. ގއ. ވިލިނގިލި ފަޅުތެރޭގައި އަޅާ އިންޓރަނޭޝަނަލް އެއަރޕޯޓްވެސް ހަމަ މިފަދައެވެ. ގީޑީޕީއަށް އަހަރަކު 400 މިލިއަން ޑޮލަރުގެ ނަފާވެރިކަމެއް ލިބޭނެ ކަމަށް ވިދާޅުވެ ފެއްޓެވި ބަންކަރިންގެ ހިދުމަތްވެސް ހަމަ އެފަދައެވެ. ދުނިޔޭގެ އެކި ގައުމުތަކުގެ ކުންފުނިތަކުން އިންވެސްޓްމަންޓް ލޯނުތައް ހޯދަން އަންނާނެ ކަމަށް ވިދާޅުވި، ހުޅުއްވި އިންވެސްޓްމަންޓް ބޭންކް ވެސް ހަމަ މިފަދައެވެ. މިހެންގޮސް ލިސްޓް ދިގު ކުރާކަށް ލިޔާނެ ކަމެއް ނެތެއެވެ.

މޯލްޑިވްސް އިންޓަނޭޝަނަލް ފައިނޭންޝަލް ސެންޓަރުގެ ކުރެހުންތައް އެންމެ ފުރަތަމަ ދައްކާލި ދުވަހުވެސް ހީވީ ފައިދަށުން ބިންގަނޑު ދެމިގެން ހެންނެއެވެ. ކަނޑުމަތީގައި ދުވާ މޮނޯރޭލްތަކާއި، ކޭބަލް ކާރުތަކާއި ގުޅިފައި އޮތް މިސެންޓަރު ފުރަތަމަ ހުރީ މާލެއާއި ހުޅުލެއާއި ދޭތެރޭގައި އޮތް ގުއި ފުނަދޫގައެވެ. ކުރެހުންތައް ދައްކާލިއިރު މަޝްރޫއު އޮތީ ފަށަން ރެޑީވެފައެވެ. ތަރީހުތައްވެސް ދެއްވިއެވެ. ނަމަވެސް މިމަހުގެ ފަސްވަނަ ދުވަހު އަށް ބިލިއަން ޑޮލަރުގެ މާބޮޑު ފޮރިން އިންވެސްޓްމަންޓެއްގައި ސަރުކާރުން ސޮއިކުރި ވާހަކަ އަޑުއިވުމާއި އެކު، މިމަޝްރޫއު އަނެއްކާވެސް ބަލާލަން ބޭނުންވެއްޖެއެވެ. އަނެއްކާވެސް މިފެނުނީ ކުރިން އާދަޔާ ޚިލާފު މޮޅު ކުރެއްހުމެއް ހައްދައިގެން ފޮނަދޫގައި ތަރައްޤީކުރައްވަނީ ކަމަށް ވިދާޅުވެ ދެއްކެވި ފައިނޭންސް ސެންޓަރެއެވެ. ނަމަވެސް މިފަހަރު ފޮނަދޫއަކު ނޫނެއެވެ. އައު ކުރެހުންތައް ހުރީ ހުޅުމާލެއަށެވެ. ތަން ބަދަލުވީ ކިހިއްނެއް ކަމެއް ކުރެހުންތައް ބަދަލުވީ ކިހިއްނެއް ކަމެއް ޕްލޭން ބަދަލުވީ ކިހިއްނެއް ކަމެއް ދެނަހުރި މީހަކު ނެތެއެވެ. އެކްސްޕްރެޝަން އޮފް އިންޓަރެސްޓް ހުށަހަޅަން ސަރުކާރުން ހުޅުވާލިކަން ދެނަހުރި މީހަކުވެސް ނެތެއެވެ. ބީލަމަށް ލީ ކަމެއް ޝަރުތެއް ބެނިފިޓެއް އަދާކުރަންޖެހޭ ޒިންމާއެއް ދެނަހުރި މީހަކު އަމުދުން ނެތެއެވެ.

އެއަށްވުރެ ހައިރާންކުރުވަނިވި ކަމަކީ އަށް ބިލިން ޑޮލަރުގެ މިހާބޮޑު އިންވެސްޓްމަންޓެއް މިރާއްޖޭގައި ކުރަން ސޮއިކުރި ކުންފުނީގެ ވާހަކައެވެ. މިކުންފުންޏަކީ ގަތަރުގެ ޝާހީ އާއިލާއަށް ނިސްބަތްވާ ކުންފުންޏެކެވެ. ނަމަކީ އެމްބީއެސް ގްލޯބަލް އިންވެސްޓްމަންޓްސް އެވެ. އިންޓަރނެޓް ހާވާލުމުން ފެންނަނީ ކުންފުނީގެ ރަޖިސްޓްރީއާއި ކުންފުނީގެ ހެޑް އޮފީސް ދުބާއީގައި ހުއްޓައެވެ. ކުންފުނީގެ ވެރިޔާ އިންވެސްޓް ކުރި އެހެންތަނެއް އެހެން ގައުމެއް ހޯދާ ހޯދާވެސް ނުފެނުނެއެވެ.

ކޮންމެއަކަސް އަށްބިލިއަން ޑޮލަރުގެ މިހާ ބޮޑު އިންވެސްޓްމަންޓެއް ބަޔަކު ރާއްޖޭގައި ކުރާނީ ކޮންމެވެސް ފާއިދާއެއް ވާނެތީތާއެވެ. ގައިމު ފީސަބީލިއްލާހި އަކަށް މިވަރުގެ ކަމެއް ނުކޮށްދޭނެތާއެވެ. ކޮންމެއަކަސް މިކަންވެސް ދާނެހެން ހީވަނީ އަންޑަރވޯޓަރ ޓަނަލްއާއި އޯވަރސީ ޓާމިނަލްއާއި ދިޔަމަގުން ހެންނެއެވެ.

މިހާތަނަށް ސަރުކާރަށް ދޮޅު އަހަރުވީއިރު، ވައުދުވެފައިވާ ޕްރޮޖެޓްގެ ތެރެއިން ކުނި ކޮއްޓެއްވެސް އަދި އަޅާ ނިންމައެއް ނުލެވެއެވެ. ހާރަކަސް ތަރާވީހަކަސް ސަރުކާރަށް ނިންމުނު މަޝްރޫއުއަކަށް އޮތީ ކެޓް ޝެލްޓަރއެވެ. އެވެސް އިއުލާންކުރި ގޮތާއި ދިމާ އިދިކޮޅަށެވެ. އެތަނުގައި ހުންނާނެ ހިދުމަތްތައް އިއުލާންކުރިއިރު އިންސާނުންވެސް ހަސަދަވެރިވާހާވެއެވެ. އެއިރު މަވެސް ބުޅަލެއް ނަމައޭ ބުނެއުޅުނު މީހުންވެސް އުޅުނެއެވެ.

ދޮޅު އަހަރު ތެރޭގައި ސަރުކާރު ހިންދަމާނުލައި މަސައްކަތްކޮށްގެން ކެޓް ޝެލްޓަރއެއް ހުޅުވިތާ 6 އެއްކަ މަސްވާއިރު، އަދި އެތަނަށް ގެންދެވުނު ކަމަށްވީ 30 ބުޅަލެއެވެ. ބާކީ ތިބި ދެހާހެއްހާ ބުޅާ މާލޭގެ މަގުތައް މަތީގައި ދުވެ ނަގަނީއެވެ. މިޕްރޮޖެޓްވެސް އޮތީ މިކަހަލަ ގޮތަކަށެވެ.

ޤަބޫލުފުޅުކުރައްވާށެއެވެ. ދިވެހި ރައްޔިތުންނަކީވެސް ތިޔަ ހީފުޅު ކުރައްވާހާ ގަމާރު ބައެއް ނޫނެއެވެ. އެހާ ޖާހިލުބައެއްވެސް ނޫނެއެވެ. ފާޑު ފާޑު އެއްޗެހީގައި ސޮއިކުރައްވައިގެން ފާޑު ފާޑު ކުރެހުންތައް ދައްކަވައިގެން ފާޑު ފާޑު ވާހަކަ ދައްކަވައިގެން ސަރުކާރުން ދަމާހާ ގުއިރޯނެއްގައި ޖެހޭނެ މާގިނަ ބަޔަކު މިއަދަކު ނޫޅެއެވެ.

މީހުން ބުނަނީ ރަނގަޅެށެއެވެ. ރައީސް މުއިއްޒުއަށް ބޭނުންފުޅުވަނީ ރަނގަޅު ގްރެފިކްސް ޑިޒައިނަރަކާއި، މޮޅު އެނިމޭޓަރަކާއި، ހައި އެންޑް ރެންޑަރިންގ ސިސްޓަމެކެވެ. އޭރުން ހުންނާނީ ރަނގަޅަށެއެވެ. ތަރައްޤީކުރެވިފައެވެ.