"ރާއްޖެ ޓީވީ" ބްރޯޑްކޮމް އަށް ހާޒިރުކޮށްފި
ރާއްޖޭގެ އެންމެ ގިނަ ބައަކު ބަލަމުން އަންނަ ޓީވީ ޗެނަލް 'ރައްޖެޓީވީ' ބްރޯޑްކާސްޓިން ކޮމިޝަނަށް ހާޒިރުކޮށްފައިވަނީ ޒުވާނުންގެ މުޒާހަރާގެ މަންޒަރުތައް ދައްކާތީ
ރާއްޖެ ޓީވީ ބްރޯޑްކޮމްއަށް ހާޒިރުކުރުން: މިކަމާއި ގުޅިގެން ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ރާއްޖެ ޓީވީއަށް އިންޓަވިއު ދެނީ
ރާއްޖޭގެ އެންމެ ގިނަ ބަޔަކު ބަލަމުން އަންނަ ޓީވީ ޗެނަލް ކަމުގައިވާ "ރައްޖެ ޓީވީ" ބްރޯޑް ކާސްޓިންގ ކޮމިޝަނަށް ހާޒިރުކޮށްފިއެވެ.
ރާއްޖެ ޓީވީ ބްރޯޑްކޮމް އަށް ހާޒިރު ކުރީ ޔުމްނު ރަޝީދުގެ މައްސަލައަށް އިންސާފު ހޯދުމަށް ކަމަށް ބުނެ، މިހާރު ޒުވާނުން އިސްނަގައިގެން ސިލްސިލާކޮށް މާލޭގައި ކުރަމުން އަންނަ މުޒާހަރާގެ މަންޒަރުތައް ރާއްޖެ ޓީވީން ގެނެސްދެމުން އައުމާއި ގުޅިގެންނެވެ.
ރާއްޖެ ޓީވީ ބްރޯޑްކޮމް އަށް ހޯމަ ދުވަހު ހާޒިރުކޮށްފައިވާއިރު، އެ ޗެނަލްގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް ވިދާޅުވީ ރާއްޖެ ޓީވީ ބްރޯޑްކޮމްއަށް ހާޒިރުވުމަށް އަންގައި ސިޓީއެއް ފޮނުވީ ކުއްލިއަކަށް ކަމަށާއި އެ ސިޓީގައި ވަނީ އެއްދުވަހުގެ ތެރޭގައި ބްރޯޑްކޮމް އަށް ހާޒިރުވުމަށް ކަމަށެވެ.
ބްރޯޑްކޮމް އަށް ރާއްޖެ ޓީވީ ހާޒުރުވާން އެންގުމާއި ގުޅިގެން، އަޅުގަނޑުމެން ބްރޯޑްކޮމް އަށް މި ހާޒުރުވީ. ދެން ކުއްލިއަކަށް ލިބުނު ސިޓީ އެއް. އެއްދުވަސްތެރޭގައި އަޅުގަނޑުމެންނަށް ހާޒިރުވާން އެންގީމަ އަޅުގަނޑުމެންގެ ލޯޔަރުންގެ ޓީމާއި އެކު މިއައީ.ރާއްޖެޓީވީގެ ހެޑް އޮފް ޕްރޮގްރާމްސް އެންޑް ކޯޑިނޭޝަން އާމިރު ސަލީމް
މިކަމާއި ގުޅިގެން އެ ޗެނަލްގެ ޤާނޫނީ ޓީމުގައި ހިމެނިވަޑައިގަންނަވާ މަޝްހޫރު ޤާނޫނީ ވަކީލް މުހައްމަދު ނިޝާން އިބްރާހިމް ވިދާޅުވީ ރާއްޖެ ޓީވީ ބްރޯޑްކޮމްއަށް ހާޒިރުކުރެވުނު މައިގަނޑު ސަބަބަކީ މިހާރު މާލޭގައި ސިލްސިލާކޮށް ކުރިއަށްދާ ޒުވާނުންގެ މުޒާހަރާތަކާއި ގުޅިގެން ކަމަށެވެ. އަދި ޒުވާނުންގެ އެ މުޒާހަރާގެ މަންޒަރުތައް އާންމުންނަށް ފެންނަ ގޮތަށް ދައްކަމުން އަންނާތީ އެކަމާއި ގުޅިގެން ބްރޯޑްކޮމްގެ ހުރި ކަންބޮޑުވުންތަކާއި ގުޅިގެން ސުވާލު ކުރުމަށް ކަމަށް އޭނާ ވިދާޅުވިއެވެ.
ނިޝާން ވިދާޅުވީ ބްރޯޑްކޮމްއިން ރާއްޖެ ޓީވީއަށް ފޮނުވި ސިޓީގައި ގައި އެއްވެސް ވަރަކަށް އެކަން ސާފުވެފައި ނެތް ކަމަށާއި އެކަން ސާފުކޮށް ޖަވާބުދާރީ ވުމަށް އިތުރުވަގުތު ދިނުމަށް ބްރޯޑްކޮމް ގައި އެދިފައިވާނޭ ކަމަށެވެ.
