އެމެރިކާގެ ރައީސްގެ ޙައްޞިއްޔަތުން އެ ޤައުމުގެ ޤާނޫނު އަސާސީ ދަމަހައްޓައި، ނަގަހައްޓަން ޖެހޭކަން އެނގިވަޑައި ނުގަންނަވާ ކަމަށް، އެ ޤައުމުގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

އެންބީސީ ނިއުސްގެ "މީޓް ދަ ޕްރެސް ވިތު ކްރިސްޓެން ވެލްކަރ" އަށް ދެއްވި އިންޓަވިޔުއެއްގައި ޓްރަމްޕް ވިދާޅުވީ، އެމެރިކާގެ ޤާނޫނު އަސާސީ ދެމެހެއްޓުމަކީ އޭނާގެ މައްޗަށް ލާޒިމު ކަމެއްކަން އެނގި ވަޑައިނުގަންނަވާ ކަމަށެވެ.

ޓްރަމްޕް ވިދާޅުވީ، އެމެރިކާގެ ރައްޔިތުންނާއި، ބިދޭސީންނަށް ޤާނޫނީ ރައްކާތެރިކަން ލިބިދޭން ޖެހޭކަން އޭނާ އަށް އެނގިވަޑައި ނުގަންނަވާ ކަމަށެވެ. އެ ސުވާލު އަމާޒު ކުރެއްވުމުން ޓްރަމްޕް ވިދާޅުވީ، އޭނާ އަކީ ޤާނޫނީ ވަކީލެއް ނޫން ކަމަށާއި، އެހެންވެ އެކަން އެނގިވަޑައި ނުގަންނަވާ ކަމަށެވެ. 

ބިދޭސީން ޤައުމުން ބޭރު ކުރުމުގައި ކޯޓު އަޑު އެހުމެއް ނެތި އަވަސް އަވަހަށް ކުރިއަށް ގެންދިއުމާ މެދު ފާޑު ކިޔުންތައް އަމާޒުވަމުން ދާއިރު، އެއީ ޤައުމީ ކުއްލި ނުރައްކަލުގެ ހާލަތެއްގައި ކުރަންޖެހޭ ކަމެއް ކަމަށް ޓްރަމްޕް ވަނީ ވިދާޅުވެފަ އެވެ.

ރިޔާސީ ތިން ވަނަ ދައުރަކަށް ކުރިމަތިލެއްވުމާ ބެހޭ ގޮތުން ވާހަކަފުޅު ދައްކަވަމުން ޓްރަމްޕް ވިދާޅުވީ، އެއީ ސީރިއަސް ގޮތެއްގައި އޭނާ ވިސްނަވާ ކަމެއް ނޫން ކަމަށެވެ. އެހެން ނަމަވެސް، މީގެ ކުރިން ޓްރަމްޕް ވަނީ އެފަދަ ނިންމެވުމެއް ނިންމަވާފާނެކަން ދޭހަވާ ގޮތަކަށް ވާހަކަ ދައްކަވައިފަ އެވެ.

އެމެރިކާގެ ޤާނޫނުއަސާސީގެ 22 ވަނަ މާއްދާގައި ބުނެފައި ވަނީ އެއްވެސް މީހަކަށް ވެރިކަމުގައި ދެ ދައުރަށް ވުރެ އިތުރަށް ނުހުރެވޭނެ ކަމަށެވެ. މިހާރު ޓްރަމްޕް ފުރުއްވަމުން ގެންދަވަނީ އޭނާގެ ރިޔާސީ ދެ ވަނަ ދައުރެވެ. 

އެ އިންޓަވިޔު ނިންމަވާލެއްވުމުގެ ކުރިން ޓްރަމްޕް ވިދާޅުވީ، އޭނާގެ އުންމީދަކީ މި ދައުރަށް ފަހު ރިޕަބްލިކަން ޕާޓީގެ ޤާބިލު އެހެން ކެންޑިޑޭޓަކު ވެރިކަމަށް ވަޑައިގަތުން ކަމަށެވެ. 

އެގޮތުން ޓްރަމަޕް ވިދާޅުވީ މިހާރު އޭނާގެ ނައިބު ރައީސަކަށް ހުންނެވި ޖޭޑީ ވޭންސް އަދި އޭނާގެ ސަރުކާރުގެ ސްޓޭޓް ސެކްރެޓަރީ މާކޯ ރޫބިއޯ އަކީ ވެސް ޤާބިލު ބޭފުޅުން ކަމަށެވެ. އަދި އެ ނޫން އެހެން ބޭފުޅުން ވެސް ތިއްބެވި ކަމަށް އޭނާ ވިދާޅުވި އެވެ.