އެފްއޭއެމް ލީގު ކަޕް: ޓީސީ އާއި އޮޑީގެ ކުރިމަތިލުން ހަމަހަމަ

ފުޓުބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އިން އިންތިޒާމު ކޮށްގެން ކުރިއަށް ގެންދާ، އެފްއޭއެމް ލީގު ކަޕްގެ ފުރަތަމަ މެޗުގައި ޓީސީ ސްޕޯޓްސް ކުލަބާއި، އޮޑި ސްޕޯޓްސް ކުލަބު ބައްދަލު ކުރި މެޗު އެއްވަރުވެގެން ނިމިއްޖެ އެވެ.

މި މުބާރާތަކީ އެފްއޭއެމް އިން މިދިޔަ މަހު ފަށަން މަސައްކަތް ކުރި ފުޓުބޯޅަ ސީޒަން ފެށިފައި ނުވާތީ، އޭގެ ބަދަލުގައި އެފްއޭއެމް އިން ރޭވި މުބާރާތެކެވެ. ފުޓުބޯޅަ ސީޒަން ފެށުން ލަސް ކުރަން ޖެހުނީ، ދުނިޔޭގެ ފުޓުބޯޅައިގެ މައި އިދާރާ (ފީފާ) އިން އެންގުމުންނެވެ.

މި މުބާރާތުގައި ވާދަކުރަނީ ޖުމުލަ ފަސް ޓީމެވެ. އެއީ ފުރަތަމަ ޑިވިޝަންގެ ތިން ޓީމު އަދި ދެ ވަނަ ޑިވިޝަންގެ ތިން ޓީމެވެ. ބައެއް ޓީމުތަކުން ވަނީ މި މުބާރާތުގައި ބައިވެރި ނުވާން ނިންމައިފަ އެވެ.

ޓީސީ އާއި އޮޑީގެ އިތުރުން، ފުރަތަމަ ޑިވިޝަން އިން މި މުބާރާތުގައި ވާދަކުރަނީ މާޒިޔާ ސްޕޯޓްސް އެންޑް ރެކްރިއޭޝަން އެވެ. ދެ ވަނަ ޑިވިޝަން އިން ވާދަކުރަނީ ނިއު ރޭޑިއަންޓް ސްޕޯޓްސް ކުލަބު އަދި މަހިބަދޫ ސްޕޯޓްސް ކުލަބެވެ.

އާދީއްތަ ދުވަހުގެ ރޭ ގަލޮޅު ރަސްމީ ދަނޑުގައި ޓީސީ އާއި އޮޑި ބައްދަލު ކުރި މެޗު ނިމުނީ އެއްވެސް ޓީމަކަށް ލަނޑެއް ނުޖެހި އެއްވަރު ވެގެންނެވެ. މެޗުގައި ދެ ޓީމަށް ވެސް ވަނީ ލަނޑު ޖަހާނެ ފުރުސަތުތަކެއް ލިބިފަ އެވެ.

މިއީ ގިނަ ދުވަސްތަކަކަށް ފަހު ސީނިއާ ފެންވަރުގެ މެޗެއް ކުޅުނު ފުރަތަމަ ފަހަރެވެ. ގިނަ ދުވަސްތަކެއް ވަންދެން ރާއްޖޭގެ ފުޓުބޯޅަ ސީޒަން ހުއްޓިފައި އޮތް ނަމަވެސް، މިދިޔަ އަހަރު ވަނީ އަމިއްލަ ފަރާތަކުން އިސް ނަގައިގެން މުޅި ރާއްޖެ އަށް ހުޅުވާލައިގެން ގޯލްޑް ކަޕް ފުޓުބޯޅަ މުބާރާތް ބާއްވައިފަ އެވެ.