މައުލޫމާތު ހޯދުމުގައި ނޫސްވެރިންނަށް ދިމާވާ ދަތިތައް ހައްލު ކުރުމަށް ނޫސްވެރިންނާ ގުޅިގެން މަސައްކަތް ކުރާނަން: ފުލުހުން
ފޯރުކޮށްދެވޭ މައުލޫމާތުގެ ސައްހަކަން ކަށަވަރުކުރުމަށް ނޫސްވެރިންނާ ގުޅިގެން މަސައްކަތް ކުރާނަން
ޔުމްނު ފުރާޅަށް ވެއްޓުނު ހާދިސާއާ ގުޅިގެން ބޭއްވި ނޫސްވެރިންގެ ބައްދަލުވުމުގެ ތެރެއިން 24.އޭޕްރީލް.2025
މައުލޫމާތު ހޯދުމުގައި ނޫސްވެރިންނަށް ދިމާވާ ދަތިތައް ހައްލު ކުރުމަށާއި، އޮޅުންއަރާފަދަ މައުލޫމާތު ފެތުރުން މަދުކުރުމަށް ނޫސްވެރިންނާ ގުޅިގެން މަސައްކަތް ކުރާނެ ކަމަށް ފުލުހުންގެ ޚިދުމަތުން ބުނެފިއެވެ.
ބައިނަލްއަގްވާމީ ނޫސްވެރިކަމުގެ މިނިވަންކަމުގެ ދުވަހުގެ މުނާސަބަތާއި ގުޅިގެން ފުލުހުން ވަނީ އިންސާނީ ހައްގުތަކާއި ކަރާމާތް ހިމާޔަތްކޮށް، އަދުލުއިންސާފު ގާއިމުކުރުމުގައި ނޫސްވެރިން އަދާކުރާ އަގުހުރި އަދި މުހިންމު ދައުރު ފާހަގަކޮށްފައެވެ.
ފުލުހުން ނެރުނު ނޫސްބަޔާނެއްގައި ބުނީ މައުލޫމާތު ހޯދުމުގައި ނޫސްވެރިންނަށް ދިމާވާ ދަތިތައް ހައްލުކުރުމަށާއި، ފޯރުކޮށްދެވޭ މައުލޫމާތުގެ ސައްހަކަން ކަށަވަރުކުރުމަށް، އަދި އޮޅުންއަރާފަދަ މައުލޫމާތު ފެތުރުން މަދުކުރުމަށް ނޫސްވެރިންނާ ގުޅިގެން މަސައްކަތްކުރަމުން ގެންދާނެކަމުގެ ޔަގީންކަންދޭ ކަމަށެވެ.
އެގޮތުން، ދިވެހި ފުލުހުންގެ ޚިދުމަތުގެ 2024-2028 ގެ ސްޓްރެޓެޖިކް ޕްލޭންގައި ވާގޮތުގެ މަތިން، ގާބިލު މުވައްޒަފުން ބިނާކުރުމާއި، އަހުލާގީ މިންގަނޑުތައް ކުރިއެރުވުމާއި، ހާމަކަން ބޮޑު އަދި ޓެކްނޮލޮޖީއަށް ބަރޯސާވާ ހައްލުތަކުގެ ޒަރީއާއިން ހިންގުން ހަރުދަނާކުރުމުގެ ތެރެއިން، އެކަށޭނަ ވަގުތުގައި، ސައްހަ އަދި ޒިންމާދާރު ގޮތެއްގައި މައުލޫމާތު ފެތުރުމަށް މީޑިއާއާއެކު ގާތުން މަސައްކަތްކުރެވޭ ގޮތަށް މަސައްކަތްތައް ރޭވެމުންދާ ކަމަށް ފުލުހުން ބުނެއެވެ.
މީގެ އިތުރުން ފުލުހުން ބުނީ، އެ ޚިދުމަތުގެ މަސައްކަތުގައި، ކުށް ހުއްޓުވުމާއި، އާންމު ރައްކާތެރިކަމާއި، މުޖުތަމައުގެ ބައިވެރިވުން އިތުރުކުރުމުގައި މީޑިއާއަކީ މުހިންމު ބައިވެރިއެއް ކަމަށާއި، ނާޒުކު ހާލަތްތަކުގައި ވެސް، އާންމުންނަށް މައުލޫމާތު ފޯރުކޮށްދީ، މުއައްސަސާތައް ޖަވާބުދާރީކުރުވުމަށް ތެދުވެރިކަމާއެކު މަސައްކަތްކުރާ ނޫސްވެރިންގެ އަގު ވަޒަންކުރާ ކަމަށެވެ.
އަދި ނޫސްވެރިންނަށް ބިރުވެރިކަމެއް، ފުރައްސާރައެއް ނުވަތަ ހުރަހެއްނެތި ވާޖިބު އަދާކުރެވޭނެ ރައްކާތެރި މާހައުލެއް ގާއިމުކުރުމަށް، އެއްބާރުލުން ލިބެމުންދާނެކަމުގެ ޔަގީންކަން ފުލުހުން ވަނީ ދީފައެވެ.
މައުލޫމާތު ހޯދުމުގައި ނޫސްވެރިންނަށް ދިމާވާ ދަތިތައް ހައްލު ކުރުމަށާއި، އޮޅުންއަރާފަދަ މައުލޫމާތު ފެތުރުން މަދުކުރުމަށް ނޫސްވެރިންނާ ގުޅިގެން މަސައްކަތް ކުރާނެ ކަމަށް ފުލުހުން ބުނެފައިވާއިރު، މިފަހުން ފުލުހުންގެ ފަރާތުން މައުލޫމާތު ހޯދުމަށް އުދަނގޫކަމަށް ބުނެ ގިނަ ނޫސްވެރިން ކަންބޮޑުވުން ފާޅުކޮށްފައިވެއެވެ. އަދި މިފަހުން ފުރާޅެއްގެ މައްޗަށް ވެއްޓިފައި އޮއްވާ ފެނުނު ހައްވާ ޔުމްނުގެ މައްސަލާގައި ވެސް ފުލުހުން މައުލޫމާތުތައް ހާމަނުކޮށް ސިއްރުކޮށްފައިވާ ކަމަށް ބުނެ، ޒިންމާދާރު ކަމާއެކު ނޫސްވެރިންނަށް މައުލޫމާތު ހިއްސާ ކޮށްދިނުމަށް ނޫސްވެރިން ގޮވާލާފައިވެއެވެ.
