އިސްރާއީލުން ސީރިއާގެ ތިން ސަރަހައްދަކަށް ހަމަލާ ދީފި
3 މެއި 2025 | ހޮނިހިރު 05:46އިސްރާއީލްގެ އަސްކަރިއްޔާގެ ބަޔާނެއްގަައި ބުނެފައި ވަނީ، ސީރިއާގެ އަސްކަރީ މަރުކަޒުތަކާއި، އެންޓި-އެއާކްރާފްޓް ކެނަންތައް އަދި މިސައިލް އިންފްރާންސްޓްރަކްޗާ އަށް އަމާޒުކޮށް ހަމަލާ ދީފައިވާ ކަމަށެވެ.
އިސްރާއީލް އިން ހަމާ ސަރަހައްދަށް އަމާޒުކޮށް މީގެ ކުރިން ދީފައިވާ ހަމަލާގައި ހަލާކުވެފައިވާ ބައެއް ތަކެތި ފެންނަ މަންޒަރެއް | އޭޕީ
އިސްރާއީލް އިން ސީރިއާގެ ތިން ސަރަހައްދަކަަށް އަމާޒުކޮށް، ވައިގެ މަގުން ހަމަލާ ދީފައިވާ ކަމަށް ސީރިއާ ސަރުކާރުގެ ނޫސް އެޖެންސީ ސަނާ އިން ބުނެފި އެވެ.
ސަނާ އިން ބުނެފައިވާ ގޮތުގައި ހުކުރު ދުވަހުގެ ރޭ އިސްރާއީލް އިން ވަނީ ސީރިއާގެ ދަމަސްކަސް، ހަމާ އަދި ދަރާ ސަރަހައްދަށް އަމާޒުކޮށް ވައިގެ މަގުން ހަމަލާ ދީފަ އެވެ.
މި ހަމަލާގައި ދަމަސްކަސް ސަރަހައްދުން އާންމު ރައްޔިތަކު މަރުވެފައިވާ ކަމަށް ވެސް ވަނީ ބުނެފަ އެވެ. މީގެ އިތުރުން ހަތަރު މީހަކަށް އެކި ވަރުގެ ޒަޚަމުތައް ލިބިފައިވާ ކަމަށް ވެސް ހާމަކޮށްފައިވެ އެވެ.
އިސްރާއީލްގެ އަސްކަރިއްޔާގެ ބަޔާނެއްގަައި ބުނެފައި ވަނީ، ސީރިއާގެ އަސްކަރީ މަރުކަޒުތަކާއި، އެންޓި-އެއާކްރާފްޓް ކެނަންތައް އަދި މިސައިލް އިންފްރާންސްޓްރަކްޗާ އަށް އަމާޒުކޮށް ހަމަލާ ދީފައިވާ ކަމަށެވެ.
މި ހަމަލާތައް ދިނުމުގެ ކުރިން އިސްރާއީލް އިން ވަނީ، ދަމަސްކަސްގައި ހުންނަ ރިޔާސީ ގަނޑުވަރު ހިމެނޭ ސަރަހައްދަށް ވެސް ހަމަލާ ދީފަ އެވެ.
މިއީ ސީރިއާގެ އައު ވެރިކަމަށް އަމާޒުކޮށް އިސްރާއީލް އިން ދިން އެންމެ ފުރަތަމަ އިންޒާރު ކަމަށް ވެސް ވަނީ ފާހަގަ ކޮށްފަ އެވެ.
ސީރިއާގެ ކުރީގެ ރައީސް ބައްޝާރުލް އަލް އައްސަދު ވެރި ކަމުން ވައްޓާލި ފަހުން، އިސްރާއީލް އިން ސީރިއާ އަށް ދެމުން އަންނަ ހަމަލާތައް އިތުރުވެފައިވާ ކަމަށް ފާހަގަ ކޮށްފައިވެ އެވެ.
އައްސަދުގެ ވެރިކަމުގައި ވެސް އިސްރާއީލުން ވަނީ ސީރިއާ އަށް އަމާޒުކޮށް ހަމަލާތަކެއް ދީފަ އެވެ. ސީރިއާގެ އައު ސަރުކާރަކީ އިސްރާއީލަށް ނުރައްކަލެއް ކަމަށް ބަލައި، އެ ސަރަޙައްދުގައި އަސްކަރީ ޙަރަކާތްތައް އިތުރު ކުރުމަށް އިސްރާއީލުން ނިންމާފައިވާ ކަމަށް މަޝްރަހު ދިރާސާ ކުރާ ފަރާތްތަކުން އަންނަނީ ބުނަމުންނެވެ.
