ރައީސް މުއިއްޒު މަސައްކަތް ކުރައްވަނީ އާއްމު ރައްޔިތންގެ އަޑު ކަނޑުވާލުމަށް: ފައްޔާޒް
2 މެއި 2025 | ހުކުރު 20:32މަސައްކަތްތެރިންގެ ފަރާތުން ރާވާ އިންތިޒާމްކުރި މޭޑޭ ރެލީއަށް ފުލުހުން ވަނީ ހުރަސްއަޅާފައި
އެމްޑީޕީގެ ޗެއަރޕާސަން ފައްޔާޒް އިސްމާއިލް، އެމްޑީޕީން ބޭއްވި ގައުމީ މަޖިލީހުގެ ތެރެއިން ވާހަކަ ދައްކަވަނީ
ރައީސް ޑރ. މުހައްމަދު މުއިއްޒު މުއައްސަސާތަކުގެ ބާރު ކަނޑުވާލުމަށް ކުރަމުންދާ މަސައްކަތަށްފަހު، މިހާރު މަސައްކަތް ކުރައްވަނީ އާއްމު ރައްޔިތންގެ އަޑު ކަނޑުވާލުމަށް ކަމަށް އެމްޑީޕީގެ ޗެއަރޕާސަން ފައްޔާޒް އިސްމާއިލް ވިދާޅުވެއްޖެ އެވެ.
އެމްޑީޕީން ހުކުރު ދުވަހުގެ ރޭ ބޭއްވި ގައުމީ މަޖިލީހުގެ ކުއްލި ބައްދަލުވުމުގައި ވާހަކަ ދައްކަވަމުން ފައްޔާޒް ވިދާޅުވީ ގައުމީ މަޖިލީހުގެ ޖަލްސާއެއް ބާއްވަން ނިންމަން ޖެހުނީ އެއްވެ އުޅުމުގެ މިނިވަންކަން ނަގާލުމަށްޓަކައި މިއަދުގެ ސަރުކާރުން ރައީސް މުއިއްޒު އަޅުއްވާ ހުރަސްތަކަށް، ކަންބޮޑުވުން އޮތުމުން އެކަމުގެ މަޝްވަރާތައް ކުރުމުގެ ގޮތުން ކަމަށެވެ.
އެގޮތުން މަސައްކަތްތެރިންގެ ފަރާތުން ރާވާ އިންތިޒާމްކުރި މޭޑޭ ރެލީއަށް ފުލުހުން ވަނީ ހުރަސްއަޅާފައި ކަމަށާއި އަދި ޒުވާނުން ކުރަމުންދިޔަ ސުލްހަވެރި އިހްތިޖާޖަށް ފުލުހުން ހުރަސް އަޅައި ބާރުގެ ބޭނުންކޮށް، ދެމީހަކު ހައްޔަރުކޮށް އެއްވުން ރޫޅާލި މަންޒަރު ކަމަށާއި، އެގޮތުން އެމްޑީޕީއަކީ އަބަދުވެސް އެއްވެ އުޅުމުގެ މިނިވަންކަން ނަގަހައްޓާ ދަމަހައްޓަން ވަކާލާތުކުރާ ޕާޓީއެއް ކަމަށެވެ.
މިއަދު މިގައުމުގައި އެތައް ކަމެއް ގޯހުންދާއިރުގައި، ބަސް ކިޔަން އޮތް ހުރިހާ މުއައްސަސާއެއްގެ ކޮންޓްރޯލް ނަގަމުން ކަމަށާއި، ރައްޔިތުންގެ މަޖިލީހުގެ އަޑު ކަނޑުވާލާފައި ކަމަށާއި ކޯޓްތަކުގެ ބާރު ކަނޑުވާލާފައިވާއިރު މިނިވަން މުއައްސަސާއެއް މިއަދު ނެތް ކަމަށް ފައްޔާޒު ވިދާޅުވި އެވެ.
ހަމަ އެކަނި ރައްޔިތުންގެ ފަރާތުން ބަހެއް ބުނަން އޮތީ އެމްޑީޕީއާއި އަދި އިތުރު ބައެއް ސިޔާސީ ޕާޓީތަކުން ކަމަށާއި ގައުމު އެއްކޮށް ކަނޑުވާލުމަށް ރައީސް މުއިއްޒު ދަނީ މަސައްކަތްކުރަމުން ކަމަށްވެސް ފައްޔާޒު ވިދާޅުވި އެވެ.
އެހެންކަމުން މިކަންކަން ގޯހުން ގޯހަށްދާއިރު މިކަން ބަލަން ނުތިބެވޭނެ ކަމަށްވެސް ފައްޔާޒު ވިދާޅުވި އެވެ.
