އައިސީޖޭ ގައި ރާއްޖެ އިން ފަލަސްޠީނުގެ ދިފާއުގައި ބަޔާން ދީފި
އައިސީޖޭގައި ބަޔާން ދެއްވަމުން ބަންޑާރަ ނަައިބު އުޝާމް ވިދާޅުވީ، ފަލަސްޠީނުގެ ރައްޔިތުންގެ ޙައްގުގައި ރާއްޖެ އިން ކެނޑިނޭޅި ވަކާލާތު ކުރައްވާނެ ކަމަށް.
އައިސީޖޭގެ އަޑު އެހުމުގައި ބަންޑާރަ ނައިބު އަޙުމަދު އުޝާމް ބަޔާން ދެއްވަނީ
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި ދިވެހި ރާއްޖެ އިން ފަލަސްޠީނުގެ ދިފާއުގައި ބަޔާން ދީފި އެވެ.
އައިސީޖޭގައި ދިވެހި ރާއްޖޭގެ ފަރާތުން ފަލަސްޠީނުގެ ދިފާއުގައި ބަޔާން ދެއްވާފައި ވަނީ، ބަންޑާރަ ނައިބު އަލްއުސްތާޛް އަޙުމަދު އުޝާމް އެވެ.
އައިސީޖޭގައި ބަޔާން ދެއްވަމުން ބަންޑާރަ ނަައިބު އުޝާމް ވިދާޅުވީ، ފަލަސްޠީނުގެ ރައްޔިތުންގެ ޙައްގުގައި ރާއްޖެ އިން ކެނޑިނޭޅި ވަކާލާތު ކުރައްވާނެ ކަމަށެވެ.
އުޝާމް ވިދާޅުވީ ފަލަސްޠީނުގެ ރައްޔިތުންނަށް އިންސާނީ އެހީތެރިކަން ފޯރުކޮށްދޭވެކަން ކަށަވަރު ކުރުމަކީ މުހިންމު ކަމެއް ކަމަށެވެ.
އަދި އިސްރާއީލުން އަންރުވާ ރޫޅާ ލުމަށް އަޅާފައިވާ ފިޔަވަޅުތަކާ މެދު ކަންބޮޑުވާ ކަމަށާއި، އިންސާނީ ޙައްގުތައް ހޯދުމަށް ފަލަސްޠީނުގެ ރައްޔިތުން ކުރަމުން އަންނަ މަސައްކަތަށް ދިވެހި ރާއްޖެ އިން އަބަދު ވެސް އެއްބާރުލުން ދެއްވާނެ ކަމަށް ވެސް އުޝާމް ވިދާޅުވި އެވެ.
ބުރާސްފަތި ދުވަހު އޮތް އަޑު އެހުމުގައި ރާއްޖޭގެ ފަރާތުން ތަމްސީލު ކުރި ބައިނަލްއަޤުވާމީ ޤާނޫނީ ވަކީލުން ވެސް ވަނީ ބަޔާން ހުށަހަޅައިފަ އެވެ.
އެ ބަޔާނުގައި ވަނީ ބައިނަލްއަޤުވާމީ މުއާހަދާތަކުގެ ދަށުުން، ޒިންމާތަކުން ރެކުމަށްޓަކައި، ޤައުމީ ސަލާމަތް އަދި ހަނގުރާމަވެރި ބޭނުންތެރިކަން ސަބަބެއްގެ ގޮތުގައި އިސްރާއީލުން ދައްކަނީ ބައިނަލްއަޤުވާމީ ޤާނޫނުތަކާ ޚިލާފަށް ކަމަށެވެ.
މީގެ އިތުރުން، އިސްރާއީލް އާއި އަންރުވާއާ ދެމެދު 1967 ވަނަ އަހަރު ސޮއިކޮށްފައިވާ އެކްސްޗޭންޖް އޮފް ލެޓާސް އިން އިސްރާއީލް ނިކުތުމުގެ ޤާނޫނީ ނަތީޖާތަކަށް ވެސް ވަނީ އަލި އަޅުއްވާލައްވާފައި އެވެ.
އެ އަޑު އެހުމުގައި ރާއްޖެ އިން ވަނީ، ފަލަސްޠީނާއި އިސްރާއީލާ ދެމެދު އޮތް މައްސަލަ އަށް އޮތް ހަމައެކަނި ދެމެހެއްޓެނިވި ޙައްލަކީ، 1967 ވަނަ އަހަރުގެ ކުރިން އޮތް ސަރަހައްދީ އިންތަކުގެ މައްޗަށް ބިނާކޮށް،އިރުމަތި ޤުދުސް ވެރި ރަށެއްގެ ގޮތުގައި ކަނޑަ އަޅައި، މިނިވަން، މުސްތަޤިއްލު، އަދި އަމިއްލަ ސިޔާދަތީ ބާރު ހިނގާ ފަލަސްޠީނުގެ ދައުލަތެއް ޤާއިމު ކުރުން ކަމަށް ތަކުރާރު ކޮށްފަ އެވެ.
އަދި ހަމަ އެހެންމެ، އެ ޙައްލު ހޯދުމަށް ފަލަސްޠީނުގެ ރައްޔިތުން ކުރާ މަސައްކަތަށް އެއްބާރުލުން ދިނުމުގައި ދިވެހި ރާއްޖެ ސާބިތުކަމާ އެކު ދެމި އޮންނާނެ ކަމުގެ ޔަގީންކަން ވެސް ވަނީ އެ އަޑު އެހުމުގައި ދީފަ އެވެ.
މިއީ އިސްރާއީލްގެ ބާރުގެ ދަށަށް ގެނެސްފައިވާ ފަލަސްޠީނުގެ ބިންތަކުގައި، އދ އާއި ބައިނަލްއަޤުވާމީ އެހެނިހެން ޖަމިއްޔާތަކާއި، އެހެން ޤައުމުތައް ތިބުމާއި، އެ ބިންތަކުގައި އެ ފަރާތްތަކުން ހިންގާ ޙަރަކާތްތަކާ ގުޅިގެން އިސްރާއީލްގެ އިންތިޒާމުތަކާ ގުޅޭ ގޮތުން އައިސީޖޭގެ އިޝްތިހާރީ ލަފަޔަކަށް އެދި ހުށަހަޅާފައިވާ މައްސަލަ އެކެވެ،
