ފުލުހުން ބާރުގެ ބޭނުންކުރަން ވާނީ ގާނޫނާ އެއްގޮތަށް: ބަންޑާރަނައިބު އުޝާމް
ފުލުހުންގެ ތެރޭގައި އެލްރެޑު ބޭނުންކުރުމާ ގުޅޭ ވަކި އުސޫލެއް އޮތްކަން ޔަގީންނުވޭ
ބަންޑާރަނައިބު އަހުމަދު އުޝާމް މަޖިލީހުގެ ޖަލަސާގައި މެމްބަރުންގެ ސުވާލުތަކަށް ޖަވާބުދެއްވަނީ: ވިދާޅުވީ ފުލުހުން ވެސް ބާރުގެ ބޭނުން ކުރަން ޖެހޭނީ ގާނޫނާ އެއްގޮތަށް ކަމަށް
އިދިކޮޅު އެމްޑީޕީން އޮކްޓޯބަރު 3 ވަނަ ދުވަހުގެ ރޭ މާލޭގައި ބޭއްވި ބޮޑު އެއްވުމުގައި ބައިވެރިންނާ ދެކޮޅަށް ފުލުހުން ބޭނުންކުރި ބާރުގަދަ އަޑު އިއްވާ "ސޮނިކް ވެޕަން" އެއް ކަމަށްވާ ލޯންގް ރޭންޖް އެކޯސްޓިކް ޑިވައިސް (އެލްރެޑު) ބޭނުންކުރުމާ ގުޅޭގޮތުން ރައްޔިތުންގެ މަޖިލީހުގައި ކުރެވުނު ސުވާލަކަށް ޖަވާބުދެއްވަމުން ފުލުހުން ބާރުގެ ބޭނުންކުރަން ޖެހޭނީ ގާނޫނާ އެއްގޮތަށް ކަމަށް ބަންޑާރަ ނައިބު އަހުމަދު އުޝާމް ވިދާޅުވެއްޖެ އެވެ.
ބުދަ ދުވަހު އޮތް މަޖިލިސް ޖަލްސާގައި އިދިކޮޅު އެމްޑީޕީއަށް ނިސްބަތްވާ ގަލޮޅު ދެކުނު ދާއިރާގެ މެންބަރު މީކާއިލް އަހުމަދު ނަސީމް ވަނީ އުސޫލެއްނެތި ފުލުހުން މިފަދަ ހަތިޔާރެއް ބޭނުން ކުރުމާމެދު އުޝާމްގެ ވިސްނުންފުޅު ހުރިގޮތް ސާފުކުރުމަށް ސުވާލު ކުރައްވާފަ އެވެ.
މީކާއިލް ނަސީމުގެ މި ސުވާލަށް ޖަވާބުދެއްވަމުން ބަންޑާރަބައިނު އުޝާމް ވިދާޅުވެފައިވަނީ އެ ހަތިޔާރާ ގުޅޭގޮތުން ފުލުހުންގެ ތެރޭގައި ވަކި އުސޫލެއް އޮތްކަން ޔަގީންނުވާ ކަމަށެވެ. އެހެން ނަމަވެސް ފުލުހުންގެ ބާރުތައް ބޭނުން ކުރަން ވާނީ ގާނޫނާއި ގަވާއިދާ އެއްގޮތްވާ ގޮތުގެ މަތިން ކަމަށެވެ.
ކަންމިހެން އޮތްއިރު، އެލްރެޑު ބޭނުން ކުރުމުގައި ވެސް ފުލުހުންގެ އެތެރޭގެ ޕޮލިސީތަކެއް ހުންނަންވާނެ ކަމަށް ގަބޫލުކުރައްވާ ކަމަށް ވެސް އުޝާމް ވިދާޅުވިއެވެ.
އަޅުގަނޑު ގަބޫލުކުރާ ގޮތުގައި، ފުލުހުންގެ ބާރުތައް ބޭނުން ކުރަން ވާނީ ގާނޫނާއި ގަވާއިދާ އެއްގޮތްވާ ގޮތުގެ މަތިން. އެހެންވީމާ، އެލްރެޑު ބޭނުން ކުރުމުގައި ވެސް ފުލުހުންގެ އެތެރޭގެ ޕޮލިސީތަކެއް ހުންނަންވާނެ ކަމަށް އަޅުގަނޑު ގަބޫލުކުރަނީބަންޑާރަނައިބު އަހުމަދު އުޝާމް
ސޮނިކް ވެޕަން ބޭނުންކުރަން ޖެހޭ ހާލަތްތަކާއި ބޭނުން ކުރާނެ ގޮތުގެ އުސޫލުތައް ފުލުހުން އާންމުކޮށްފައެއް ނުވެއެވެ.
ފުލުހުންގެ ހަތިޔާރު ބޭނުންކުރުމުގެ ގަވާއިދުގައި ބަޔާންކޮށްފައިވާ ގޮތުން، ހަތިޔާރެއް ބޭނުންކުރުމުގެ ކުރިން "ހަތިޔާރު ބޭނުން ކުރަނީ" މި އިބާރާތް ބޭނުންކޮށް މުޒާހަރާގެ ބައިވެރިންނަށް އިންޒާރު ދޭންޖެހެއެވެ. ނަމަވެސް، އޮކްޓޯބަރު 3 ގެ މުޒާހަރާގައި ސޮނިކް ވެޕަން ބޭނުން ކުރުމުގެ ކުރިން މިފަދަ އިންޒާރެއް ފުލުހުން ދީފައެއް ނުވެއެވެ.
ބާރު އަޑެއް އިއްވާ މި ނުރައްކާތެރި ހަތިޔާރު ބޭނުން ކުރުމުގެ ސަބަބުން މުޒާހަރާގެ ބައިވެރިންނާއި، އެ ސަރަހައްދުގެ ގެތަކުގައި ދިރިއުޅޭ އާއިލާތަކާއި ކުޑަކުދިންނަށް އޭގެ ނޭދެވޭ އަސަރު ކޮށްފައިވާ ކަމަށް ގިނަ ބަޔަކު ވަނީ ބުނެފައެވެ.
މިކަމާ ގުޅިގެން އިދިކޮޅު ފަރާތްތަކާއި އާންމުންގެ ގިނަ ބައެއް ކަންބޮޑުވުމް ފާޅުކޮށް ސޯޝަލް މީޑިއާގެ ޕްލެޓްފޯމްތަކުގައި ކޮމެންޓް ކޮށް އެކި ގޮތްގޮތުން ނުރުހުން ފާޅުކޮށްފައި ވެއެވެ.
މިކަމާއި ގުޅިގެން އާންމުންގެ ފަރާތުން ފާޅުކުރެވުނު ކަންބޮޑުވުންތަކަށް ޖަވާބުދެމުން ފުލުހުން ނެރުނު ނޫސްބަޔާނުގައި ބުނެފައިވަނީ މުޒާހަރާގައި ބާރުގެ ބޭނުން ކޮށްފައި ވަނީ ކަނޑައެޅިފައިވާ ގާނޫނުތަކާއި ގަވާއިދުތަކުގެ ތެރެއިން ކަމަށެވެ.
އޮކްޓޫބަރު 3 ގެ މުޒާހަރާގައި ބައިވެރިވި ބައިވެރިންނާއި ދެކޮޅަށް ފުލުހުން ހާލަތާއި ނުބައްދަލު ބާރުގެ ބޭނުންކޮށް ބޮޑެތި އަނިޔާތަކެއް ދީ ގިނަ ބަޔަކު ހައްޔަރު ވެސް ކުރި އެވެ. އޭގެ ތެރެއިން ހަ މީހަކު އަދިވެސް ތިބީ ޖަލުގައެވެ.
