ހައްވާ ޔުމްނު ރަޝީދަށް އިންސާފު ހޯދުމަށް ގޮވާލާ ކުރިއަށްގެންދާ "ދުލެއް ނުކުރާނަން" އިހްތިޖާޖްގެ ބައިވެރިން ޓުވިޓަރގައި ޝުއޫރު ފާޅުކޮށްފައިވާއިރު، ބޮޑު އިހްތިޖާޖް ބުދަ ދުވަހުގެރޭ އޮންނާނެ ކަމަށް އިހްތިޖާޖް އިންތިޒާމްކުރާ ފަރާތުން ބުނެފި އެވެ.

ޓުވިޓާގައި ގިނަ އަދަދެއްގެ ބަޔަކު ބައިވެރިވި މި ޝުއޫރު ފާޅުކުރުމުގެ ހަރަކާތުގައި ޒުވާނުން ބުނެފައިވަނީ މިގޮތަށް ޓުވިޓާގައި ޝުޢޫރުފާޅުކުރުމުގެ ގޮތުން ޓުވިޓާރގައި މިކަން އިންތިޒާމްކުރީ ރާއްޖެއިން ބޭރުގައި ތިބި އެތައް ބަޔަކަށް މިކަމުގައި ހުރި ކަންބޮޑުވުންތައް ހިއްސާކުރުމުގެ ފުރުޞަތު ދިނުމުގެ ބޭނުމުގައި ކަމަށެވެ.

އެހެންނަމަވެސް ބުދަ ދުވަހުގެ ރެއިން ފެށިގެން ބޮޑު އެއްވުމެއް ބާއްވާނެ ކަމަށާއި އަދި ޒުވާނުން ކޮށްފައިވާ 10 ޑިމާންޑް ފުރިހަމަ ވަންދެން މި އިހްތިޖާޖް ކުރިއަށްގެންދާނެ ކަމަށް ޒުވާނުންވަނީ ބުނެފައެވެ.

ހ. ފެންޓެނޯއީ ގޭގެ ނުވަ ވަނަ ފަންގިފިލާގެ ފެންލައިޓަކުން ވެއްޓުނު އުމުރުން 21 އަހަރުގެ އަންހެން ކުއްޖާގެ މި ހާދިސާއަށް ހަފްތާއެއް ވާން ކައިރިވި ފަހުން ފުލުހުން ވަނީ ބުރާސްފަތި ދުވަހު އިރާކޮޅު އެ މައްސަލައިގައި ތުހުމަތުކުރެވޭ ރައުދު އަަހުމަދު ޒިލާލް 21، ހައްޔަރުކޮށްފަ އެވެ. މީގެއިތުރުން އެ މައްސަލައިގައި ހިމެނޭ ކަމަށް ތުހުމަތު ކުރެވޭ ހަތް މީހެއްގެ ފޯނު ވެސް ހިފަހައްޓާފައިވާ ކަމަށް ފުލުހުން ބުނެއެވެ.

ބައެއް ފަރާތްތަކުން ބުނާ ގޮތުގައި އެ އަންހެން ކުއްޖާ ވެއްޓުނު މި މައްސަލަ ސީރިއަސް މައްސަލައެއްގެ ގޮތުގައި ފުލުހުން ތަހުގީގު ކުރަމުން ގޮސްފައެއް ނުވެ އެވެ.

އެހެން ނަމަވެސް ގިނަ ބަޔަކު މަގުތަކަށް އެއްވެ މުޒާހަރާކޮށް، އަޑުއުފުލަން ފެށުމުން ފުލުހުން ވަނީ މި މައްސަލަ ތަހުގީގުކުރަން ފަށާފައެވެ. އަދި ޔުމްނު ވެއްޓުނު ހާދިސާ ތަހުގީގު ކުރުމަށް، "ރައީސުލްޖުމްހޫރިއްޔާގެ ޚާއްޞަ ކޮމިޝަން" އެއް އުފައްދަވައި، ކޮމިޝަނުގެ ރައީސަކަށް ޑރ މުނައްވަރު ވަނީ އައްޔަންކުރައްވައިފާ އެވެ.