ހ. ފެންޓެނޯއީ ގޭގެ 9 ވަނަ ބުރިން އިމާރާތެއްގެ މައްޗަށް ވެއްޓިފައި އޮއްވާ ފެނުނު 21 އަހަރުގެ ހައްވާ ޔުމްނު ރަޝީދު ވައްޓާލުގައި އަތެއް އޮތްކަމަށް ތުހުމަތު ކުރެވުނު ރައުދު އަހުމަދު ޒިލާލު ތަހުގީގަށް އެއްބާރުލުން ދޭން ފަށާފައިވާ ކަމަށް ފުލުހުން ބުނެފިއެވެ.

ހ. ފެންޓެނޯއީ ގޭގެ މަތިން ފުރާޅު މައްޗަށް ވެއްޓުނު 21 އަހަރުގެ ހައްވާ ޔުމްނު ރަޝީދާއެކު އެރޭ އެގޭތެރޭގައި އުޅުނު، ރައުދު އަހުމަދު ޒިލާލު ކޯޓް އަމުރެއްގެ ދަށުން ހައްޔަރުކުރީ 24 އެޕްރީލް 2025 ވީ ބުރާސްފަތި ދުވަހުއެވެ. 18 އޭޕްރިލް ވަނަ ދުވަހު ހ.މިތާޒް ގޭގެ ފުރާޅު މައްޗަށް އަންހެނަކު ވެއްޓުނު މައްސަލައާއި ގުޅިގެން ކޯޓް އަމުރެއްގެ ދަށުން ގ. އެރިއަދޫ، ރައުދު އަހްމަދު ޒިލާލް 21، އަހަރު ކޯޓް އަމުރެއްގެ ދަށުން ބުރާސްފަތި ދުވަހުގެ 18:20 ގައި ހައްޔަރުކޮށްފައިވާ ކަމަށް އެއިރު ފުލުހުން ބުނެފައިވެއެވެ.

ރައުދު ހައްޔަރުކުރީ ހާދިސާ ހިނގިއިރު މަސްތުގެ ހާލަތުގައި ހުރުމާއި، ޔުމްނު ވެއްޓުމުގައި އޭނާގެ ބައިވެރިވުމެއް ވުމާއި، ޖިންސީ ބޭނުންހިފުމުގެ ކުށަށް އަރައިގަތް ކަމަށް ބުނެ އެވެ. އަދި ފުލުހުން މީގެ ކުރިން ބުނެފައިވަނީ އޭނާ ތަހުގީގަށް އެއްބާރުލުން ނުދޭ ކަމަށެވެ. އަދި އޭނާ ހައްޔަރުކުރަން އަމުރަކަށް އެދުނީ ވެސް އެއްބާރުލުން ނުދޭތީއެވެ. އެއީ ހާދިސާ ހިގިތާ 6 ވަނައަށްވީ ދުވަހުއެވެ.

ނަމަވެސް ހޯމަ ދުވަހު ފުލުހުން ބުނީ ރައުދުގެ ފަރާތުން ތަހުގީގަށް އެއްބާރުލުން ލިބެމުންދާ ކަމަށެވެ. އިތުރު ތަފްސީލެއް ހާމައެއް ނުކުރެއެވެ.

ޔުމްނު ވެއްޓުނު ހާދިސާއާއި ގުޅިގެން 9 މީހެއްގެ ޕާސްޕޯޓް ހިފަހައްޓާ ފުރުން ވަނީ މަނާކޮށްފައެވެ.

ރައުދު ބަންދުކުރި އަމުރުގައިވާ ގޮތުން ޔުމްނު ވެއްޓުނުކަމަށް ބެލެވޭ ވަގުތުގެ ކުރިން މީނާއާއެކު ހަރަކާތްތެރިވާ މަންޒަރު ފުޓޭޖުން ފެންނަކަމަށާއި، ވެއްޓުނުކަމަށް ބެލެވޭ ވަގުތަށްފަހު އަނިޔާ ލިބުނު ފަރާތަށް ގޮވައި ހޯދަން އުޅޭ މަންޒަރު ފެންނަ ކަމަށާއި ނަމަވެސް މީނާ މިކަމާ ގުޅޭ ރިޕޯޓެއް އެއްވެސް ފަރާތަކަށް ހުށަހަޅާފައިނުވާކަމަށް އައިއޯ ފާހަގަކުރިއެވެ. އަދި އޭނާގެ ކުޑަކަމުދާ ތަކެތި ކެނިބިސްއަށް ޕޮޒިޓިވްއެވެ.

މީގެ އިތުރުން ތަހްގީގަށް އިތުރަށް އެނގިފައިވާ ގޮތުގައި އަނިޔާ ލިބުނު ފަރާތާއި މީނާއާ ދެމެދު އެރޭ ހަމަނުޖެހުންތަކެއް ހިނގާފައިވާ ކަމާއި އަނިޔާލިބުނު ފަރާތް ވެއްޓުނު ހާދިސާއަށްފަހު، އޭގެ މާ ގިނަ އިރުތަކެއް ނުވަނީސް އަނިޔާ ލިބުނުފަރާތް ކޮބައިތޯ ސުވާލުކުރު މުން ވީތަނެއް ނޭނގޭކަމަށާއި، ވެއްޓުނީކަމަށް ބެލެވޭކަމަށް މީނާ ބުނެފައިވާކަމަށް ތަހުގީގުގައި ފާހަގަކޮށްފައިވެއެވެ.

ރައުދު ބަންދުކުރީ ދުވަހަށެވެ. އޭނާގެ ބަންދުގެ މުއްދަތު ހަމަވާނީ 30 އެޕްރީލްގައެވެ.