ހޯމަ ދުވަހަށް ތާވަލުކުރި ޔާމީންގެ ޝަރީއަތުގެ އަޑުއެހުމުގައި ހެކިބަސް ނުދޭން ނަރީޝް އާއި ޝުއާއު ނިންމައިފި

ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުންކޮށް ރިޝްވަތު ނެގި މައްސަލައިގައި ކުރީގެ ރައީސް އަބްދުﷲ ޔާމީނާއި އިތުރު ފަރާތްތަކެއްގެ މައްޗަށް އުފުލާފައިވާ ދައުވާގެ ޝަރީއަތުގެ ހެކިބަސް ނެގުން ހޯމަ ދުވަހަށް ތާވަލުކޮށްފައި އޮއްވާ ހެކިބަސް ދޭން ތިބި އެޑްވައިޒަރ ޓު ޔޫތް މިނިސްޓަރ އަހުމަދު ނަރީޝްއާއި ފިއުލް ސަޕްލައި މޯލްޑިވްސް (އެފްއެސްއެމް) ގެ ޑެޕިޔުޓީ މެނޭޖިންގ ޑިރެކްޓަރ ޝުއާއުﷲ ސައީދު ހެކިބަސް ނުދޭން ނިންމައިފިއެވެ.

އެންމެ ފަހުން މި މައްސަލައިގެ އަޑު އެހުމެއް ބޭއްވީ މިދިޔަ އަހަރުގެ އޮގަސްޓް މަހުގެ ތެރޭގައެވެ. އެއީ މައްސަލަ ކުރިއަށް ނުގޮސް އޮންނަތާ އަހަރެއްހާ ދުވަހުގެ މެދުކެނޑުމަކަށް ފަހު ބޭއްވި އަޑު އެހުމެކެވެ. މި މައްސަލައިގެ ހެކިންގެ ހެކިބަސް ނެގުމަށް ތާވަލުކޮށްފައިވަނީ ހޯމަ ދުވަހުގެ ހެނދުނު 9:00 ގައެވެ.

ނަމަވެސް ރައީސް ޔާމީންގެ ފަރާތްޕުޅުން ދިފާއީ ހެކިންގެ ގޮތުގައި ހެކިބަސްދޭން ތިބި ނަރީޝް އަދި ޝުއާއު ވަނީ ހެކިބަސްދޭން އުޒުރުވެރިފައެވެ. އަދި އެ ދެމީހުން މިހާރު ތިބީ ވެސް ރާއްޖެއިން ބޭރުގައެވެ.

ރ. ފުއްގިރި ކުއްޔަށް ދޫކުރުމުގެ މުއާމަލާތުގެ ތެރެއިން, މަގާމުގެ ނުފޫޒު ބޭނުން ކުރައްވައިގެން ރިޝްވަތު ނެންގެވި ކަމަށް ކުރީގެ ރައީސް ޔާމިންގެ މައްޗަށް ވަނީ ތުހުމަތުކުރެވިފައެވެ. މި މައްސަލައިގައި ކްރިމިނަލް ކޯޓުން ރައީސް ޔާމީންގެ މައްޗަށް 11 އަހަރުގެ ޖަލު ހުކުމެއް 2022 ވަނަ އަހަރު އިއްވާފައިވެ އެވެ.

އެހެންނަމަވެސް ހައި ކޯޓުން އެ މައްސަލަ ބެލުމަށްފަހު ނިންމާފައި ވަނީ ކްރިމިނަލް ކޯޓުން އެ މައްސަލަ އަލުން ބަލަން ޖެހޭ ކަމަށެވެ. ހައި ކޯޓުން އެ މައްސަލައިގައި ކުރި ހުކުމުގެ ބައެއް ސުޕްރީމް ކޯޓުގައި ވަނީ އިސްތިއުނާފްކޮށްފައެވެ. އިސްތިއުނާފްކޮށްފައި ވަނީ ރައީސް ޔާމީންގެ މައްޗަށް އުފުލާފައިވާ ހިޔާނާތުގެ ދައުވާތައް ސާބިތު ކުރުމަށް ކްރިމިނަލް ކޯޓުގައި ދައުލަތުން ހުށަހާޅައިވާ ހެކިތައް އެއްފަރާތް ކޮށްފައިވާތީ އެ ބައެވެ.

ރައީސް ޔާމީން 11 އަހަރަށް ޖަލަށްލުމަށާއި ފަސް މިލިއަން ޑޮލަރުން ޖޫރިމަނާ ކުރުމަށް ކްރިމިނަލް ކޯޓުން ހުކުމްކޮށްފައި ވަނީ ޑިސެމްބަރު 25 2022 ގައެވެ. އެ ހުކުމް އިސްތިއުނާފް ކޮށްފަިއ ވަނީ މާޗު، 2023 ގައެވެ.