ކަސްޓަމްސްގެ ބެލުމުގެ ދަށުގައި ހުރި އެއް މިލިއަނަށް ވުރެ ގިނަ ސިނގިރޭޓް ނައްތާލައިފި
26 އެޕްރީލު 2025 | ހޮނިހިރު 05:23މި މަހުގެ 19 ވަނަ ދުވަހު 130،155 ސިނގިރޭޓް ސްޓިކްސް އަތުލައިގަނެފައިވޭ
ކަސްޓަމްސްއިން ގިނަ އަދަދެއްގެ ސިނގިރޭޓް ނައްތާލަނީ
ކަސްޓަމްސްގެ ބެލުމުގެ ދަށުގައި ހުރި އެއް މިލިއަނަށް ވުރެ ގިނަ ސިނގިރޭޓް ނައްތާލައިފިއެވެ.
މިތަކެތި ނައްތާލާފައިވަނީ 24 އޭޕްރީލް 2025 ގައި ކ.ދޫނިދޫގައެވެ.
ކަސްޓަމްސްއިން ބުނީ މި ތެކެއްޗަކީ ގާނޫނާ ގަވައިދާ ޚިލާފަށް ރާއްޖެއަށް އެތެރެކުރަން އުޅެނިކޮށް އެ އިދާރާއިން އަތުލައިގަނެފައިވާ ތަކެތި ކަމަށެވެ. އަދި ނައްތާލި ތަކެތީގެ ތެރޭގައި 1,359,180 (އެއް މިލިއަން ތިން ސަތޭކަ ފަންސާސް ނުވަހާސް އެއް ސަތޭކަ އަށްޑިހަ) ސިނގިރޭޓް ސްޓިކް ހިމެނޭ ކަމަށް ކަސްޓަމްސްއިން ބުނެއެވެ.
މީގެ އިތުރުން މިމަހުގެ 19 ވަނަ ދުވަހު ވެސް ރާއްޖެއަށް ސިއްރުން އެތެރެކުރަން އުޅުނު ގިނަ އަދަދެއްގެ ސިނގިރޭޓް އަތުލާގަނެފައިވެއެވެ. އެއީ 130،155 ސިނގިރޭޓް ސްޓިކްސް ކަމަށް ކަސްޓަމްސްއިން ބުނެއެވެ.
މިތަކެތި އަތުލާގަނެފައިވަނީ ގަން އިންޓަރނޭޝަނަލް އެއަރޕޯޓުންނެވެ.
މި ސަރުކާރުން ދުންފަތް ކޮންޓްރޯލުކުރުމާބެހޭ ގާނޫނަށް ގެނައި ބަދަލާ ގުޅިގެން ރާއްޖެއަށް ސިއްރުން ދުންފަތުގެ ބާވަތްތައް އިތުރުކުރާ މިންވަރު ވަނީ އިތުރުވެފައެވެ. ކަސްޓަމްސްއިން މިފަހުން ވެސް ރާއްޖެއަށް އެތެރެކުރި ވޭޕާއި، އޭގެ އާލަތްތަކެއް އަތުލާގަނެފައިވެއެވެ.
ކަސްޓަމްސްއިން ދަނީ ގަވައިދާއި ޚިލާފައި ރާއްޖޭ އެތެރެކުރާ ސިނގިރޭޓް ފަދަ ތަކެތީގެ އިތުރުން، ބަނގުރާ އަދި މަސްތުވާތަކެތި ފަދަ ތަކެތި ނައްތާލަމުންނެވެ.
