ޔުމްނު ފުރާޅަށް ވެއްޓުން: ފުރުން މަނާކުރި މީހުންގެ ތެރެއިން އެކަކު މެލޭޝިޔާއަށް ފުރި ކަމަށް ދެކެވޭ ވާހަކަތައް ދޮގުކޮށްފި
މި މައްސަލައާ ގުޅިގެން ޔުމްނުއާއެކު އުޅުނު ރައުދު ކޯޓް އަމުރެއްގެ ދަށުން ވަނީ ހައްޔަރުކޮށްފައި
އައިޝަތު ލަޔާލީ އިގުބާލް
ޔުމްނު ރަޝީދު ފުރާޅަށް ވެއްޓުނު ހާދިސާއާ ގުޅިގެން ފުރުން މަނާކުރި މީހުންގެ ތެރެއިން އެކަކު މެލޭޝިޔާއަށް ފުރި ކަމަށް ދެކެވޭ ވާހަކަތައް ފުލުހުންގެ ޚިދުމަތުން ދޮގު ކޮށްފިއެވެ.
ސޯޝަލް މީޑިއާގައި މެލޭޝިޔާއަށް ދިޔަ ކަމަށް ތުހުމަތުކޮށްފައިވަނީ 22 އަހަރުގެ، ގ. ނޯތުބްރީޒް، އައިޝަތު ލަޔާލީ އިގުބާލް އެވެ.
ހުކުރު ދުވަހު ފުލުހުން ބުނީ އޭޕްރީލް 18 ވަނަ ދުވަހު ހ.މިޓާޒްގޭގެ ފުރާޅު މައްޗަށް އަންހެނަކު ވެއްޓުނު މައްސަލައާ ގުލިގެން ފުރުން މަނާކޮށްފައިވާ އަންހެނަކު މެލޭޝިޔާ އަށް ފުރާފައިވާ ކަމަށް ބުނެ ސޯޝަލް މީޑިއާގައި ދައުރު ކުރަމުންދާ ވާހަކަތަކަކީ ހަގީގަތާ ހިލާފު މައުލޫމާތެއް ކަމަށެވެ.
މި މައްސަލައާ ގުޅިގެން ޔުމްނުއާއެކު އުޅުނު ގ. އެރިއަދޫ، 21 އަހަރުގެ ރައުދު އަހްމަދު ޒިލާލް، ކޯޓް އަމުރެއްގެ ދަށުން 24 އޭޕްރީލް 2025 ވީ ބުރާސްފަތި ދުވަހުގެ 18:20 ގައި ވަނީ ހައްޔަރުކޮށްފައެވެ.
މީގެ އިތުރުން، ރައުދާއި، ޔުމްނު ހިމެނޭހެން ޖުމްލަ 7 މީހެއްގެ ފޯނު ވަނީ ކޯޓް އަމުރެއްގެ ދަށުން ހިފަހައްޓައި، އެ އެންމެން ވެސް ފުރުން ވަނީ މަނާކޮށްފައެވެ.
މިމައްސަލައާއި ގުޅިގެން މާންދޫގޭ ދެކުނުގެ ޓެރަސްއާއި ދެވަނަ އަދި 4 ވަނަ ފަންގިފިލާގެ އިތުރުން ކަށިވެލި 3 ވަނަ ފަންގިފިލާވަނީ ބަލާ ފާސްކޮށްފައިވެއެވެ. މިތަންތަން ބަލާ ފާސްކޮށް ފުލުހުންގެ ބެލުމުގެ ދަށަށް އެއްޗެއް ގެންދިޔަ ކަމެއް ފުލުހުން ހާމަކޮށްފައެއް ނުވެއެވެ.
ޔުމްނު ފުރާޅަށް ވެއްޓުނު ހާދިސާގައި ފުލުހުން އަމަލުކޮށްފައިވަނީ ތަފާތުކޮށް ކަމަށް ބުނެ، ގިނަ ބައެއްގެ ފާޑުކިޔުން ފުލުހުންގެ އިތުރުން ސަރުކާރަށް ވަނީ އަމާޒުވެފައެވެ.
ޔުމްނު ފުރާޅު މައްޗަށް ވެއްޓިފައި އޮއްވާ ފެނުނީ 18 އޭޕްރީލް 2025 ވަނަ ދުވަހުގެ ހެނދުނުގެ ވަގުތެއްގައެވެ.
