ޔުމްނު އަށް އިންސާފު ހޯދަން ނުކުތް ޒުވާނުންނަކީ ސިޔާސީ އޮއިވަރެއްގައި ޖެހިފައި ތިބި ބައެއް - ރައީސް މުއިއްޒު

ހ. ފެންޓެނޯއީ ގޭގެ މަތިން ގެ އެއްގެ ފުރާޅަށް، 21 އަހަރުގެ ހައްވާ ޔުމްނު ރަޝީދު ވެއްޓުނު ހާދިސާއާ ގުޅިގެން އޭނާއަށް އިންސާފު ހޯދަން ނުކުތް ޒުވާނުންނަކީ ސިޔާސީ އޮއިވަރެއްގައި ޖެހިފައި ތިބި ބައެއް ކަމަށް ރައީސް ޑރ. މުހައްމަދު މުއިއްޒު ވިދާޅުވެއްޖެއެވެ.

ބުރާސްފަތި ދުވަހުގެރޭ ބޭއްވި ފުލުހުންގެ 92 ވަނަ އަހަރީ ދުވަހުގެ ރަސްމިއްޔާތުގައި ރައީސް ވިދާޅުވީ ޔުމްނު ވެއްޓުނު ހާދިސާއަށް ވިސްނާލާއިރުވެސް، މިކަމުގެ އެންމެ ބޮޑު ޒިންމާއެއް ނަގަންޖެހޭނީ، އެމަނިކުފާނު ގަބޫލުކުރައްވާގޮތުގައި، އަދި އިންސާފަށް ލޯބިކުރާ ކޮންމެ މީހަކުވެސް ގަބޫލުކުރާނެގޮތުގައި، ބިރަކާނެތި، ބިރަކާނުލައި މަޖާކުރުމަކީ، ކޮންމެހެން ކުރަންޖެހޭނެ ކަމެއްގޮތުގައި މީގެ އަހަރުތަކެއް ކުރިންޕްރޮމޯޓްކުރި މީހުން ކަމަށެވެ.

އަދި އަޅުގަނޑުމެންގެ މާތްވެގެންވާ އިސްލާމްދީނުގައި ކަނޑައެޅިފައިހުރި އިންތަކާއި، މިންތަކާއި، އުސޫލުތަކާއި، ހަމަތަކަކީ އެއީ މާ މުހިންމު ކަމެއް ނޫނޭ، މަޖާކުރާށޭ. ޒުވާންކަމުގައި ތިޔަކުދިން ބޭނުންގޮތަކަށް އުޅޭށޭ ކިޔާފައި އެ ހިތްވަރުދިން މީހުން، މިއަދު ސިޔާސީ ބޭނުމެއްގައި ނުކުމެ، އެކުދިން މިސްޔޫސް ކުރަމުންދާ ދިޔުން، ލޯ ހުޅުވައި ބަލަންއެބަޖެހޭ ކަމަށެވެ.

ލޯހުޅުވައި ބަލަންޖެހޭ. އެކުދިން އެ މަގުން ދިޔައީ، ސިޔާސީ އޮއިވަރެއްގައި ޖައްސައިގެން. މި ޤައުމުގައި އޮތް މާތްވެގެންވާ އިސްލާމްދީނުގެ ހަމަތަކާއި، އުސޫލުތަކާއި، އަޅުގަނޑުމެންގެ ތެރޭގައި އޮތް ރީތި އާދަތަކުން ބޭރަށް މި ޤައުމު ނެރެ، އެހެން މަގަކުން ގެންދަން ކުރި މަސައްކަތުގެ ނަތީޖާއެއްގެ ސަބަބުން. އޭގައި ވިކްޓިމައިޒް ވެފައި ތިބި ޒުވާނުންތަކެއްގެ ބޭނުންކޮށްގެން، ސިޔާސީ ފައިދާނަގަން އުޅޭ އުޅުމުގެ ތެރެއަށް ދިވެހި ލޮބުވެތި ރައްޔިތުން ވެއްދުމަކީ، ކޮށްގެންވާނެ ކަމެއްނޫން. އެއަށްވުރެ އަޅުގަނޑުމެންގެ ލޯ ހުޅުވެންޖެހޭނެ. އަޅުގަނޑުމެން ވާންޖެހޭނެ، ތެދާއި ދޮގު ވަކިކުރަން އެނގޭ ބަޔަކަށް. އަޅުގަނޑުމެން ވެގެންނުވާނެ ޖޯޝުގައި ޖެހިގެން، އިމޯޝަނަލްވެގެން ބަޔަކު ދައްކާހާ ވާހަކައެއްގެ ތެރެއަށް އަޅުގަނޑުމެންގެ ސިކުނޑި ދޫކޮށްލާ ބަޔަކަށް ވެގެން ނުވާނެ. އަމިއްލަ ސިކުނޑިން ވިސްނަންޖެހޭނެ. އަމިއްލަ ސިކުނޑިން ވިސްނައިގެން، އަމިއްލައަށް ކަންކަމާމެދުގައި ތެދު ދޮގު ބެލޭ ބަޔަކަށް އަޅުގަނޑުމެން ވާންޖެހޭނެ. ކާކުކަން ނޭނގޭ މީހުން ފަތުރާ އެކި ކަހަލަ ދޮގު ވާހަކަތަކުގައި ޖެހި، އެ ދޮގުތަކުގެ އަޅުންގެ ގޮތުގައި އަޅުގަނޑުމެން ވެގެން ނުވާނެ.

ރައީސް ޑރ. މުހައްމަދު މުއިއްޒު

ރައީސް ވިދާޅުވީ اللهُ سُبْحَانَهُ وَتَعَالَى އަޅުގަނޑުމެންނަށް ދެއްވާފައިވާ ބުއްދީގެ ބޭނުން ހެޔޮގޮތުގައި ހިފުމަކީ، އަޅުގަނޑުމެންނަށް އޮތް އޮޕްޝަނެއް، ޗޮއިސްއެއް ޒިންމާއެއްނޫން ކަމަށާއި، އެއީ ވާޖިބެއް ކަމަށެވެ. އަދި ރާއްޖޭގައި ތިބީ މުސްލިމުން ކަމަށާއި، މިއީ 100 ޕަސެންޓް އިސްލާމީ ޤައުމެއް ކަމަށެވެ.

އެހެންކަމުން އަޅުގަނޑުމެން ކޮންމެ މީހަކަށްވެސް ސުވާލުކުރެވި، ޖަވާބުދާރީ ވާންޖެހޭ ދުވަސް އަންނައިރުގައި، ބުއްދީގެ ބޭނުން ހެޔޮގޮތުގައި ނުހިފައިފިނަމަ އެ ދުވަހަކު ދޭނެ ޖަވާބެއް ނޯންނާނެ ކަމަށެވެ.

ރައީސް ވިދާޅުވީ ބަޔަކު ދައްކާހާ ވާހަކައަކީ، ތިމަންނަގެ ސިކުނޑިއަށް ވައްދައިގެން ގަބޫލުކުރާނެ ކަމެއް ކަމުގައި ދިޔަ ނުދޭނެކަމުގެ ޢަޒުމުކަނޑައަޅަން ޖެހޭ ކަމަށެވެ. އެއީ، އަޅުގަނޑުމެންނަށާއި، ދަރިންނަށާއި، ރަޙުމަތްތެރިންނަށާއި، އަވަށްޓެރިންނަށާއި، މުޅި މުޖުތަމަޢަށްޓަކައި ކޮށްދެވޭނެ ވަރަށް ބޮޑު ހެޔޮކަމެއް ކަމަށެވެ. އަދި ފުލުހުންނަށް، ފުލުހުންގެ ޚިދުމަތް އަދާކުރުމުގައިވެސް ދެވޭނެ އެންމެ ބޮޑު އެހީތެރިކަމަށްވާނީ އެކަންތައް ކަމަށް ރައީސް ވިދާޅުވިއެވެ.