ގުޑް ގޭމްސް އިން ހުރާ ކޮމިއުނިޓީ ބަލިކޮށްފި

މިހާރު ކުރިއަށްދާ ޤައުމީ ވޮލީ ބޯޅަ ލީގުގައި ހުރާ ކޮމިއުނިޓީ ކުލަބާ ދެކޮޅަށް ކުޅުނު މެޗުން، ގުޑް ގޭމްސް ސްޕޯޓްސް އެކަޑަމީ މޮޅުވެއްޖެ އެވެ.

ލީގުގައި ގުޑް ގޭމްސް އިން ކުޅުނު ފުރަތަމަ މެޗުގައި ވަނީ ސިޓީ ފްރެންޑްސް ކުލަބު އަތުން ބަލިވެފަ އެވެެ. ހުރާގެ ފުރަތަމަ މެޗުގައި ވަނީ ކުލަބު ވެމްކޯ އަތުން ބަލިވެފަ އެވެ.

ޒުވާނުންގެ މަރުކަޒުގެ އެތެރޭ ކޯޓުގައި ހޯމަ ދުވަހުގެ ރޭ ކުޅުނު މެޗު ގުޑް ގޭމްސް އެކަޑަމީ އިން ކާމިޔާބު ކުރީ ތިން ސެޓު ދެ ސެޓުންނެވެ.

މެޗުގެ ފުރަތަމަ ސެޓު ގުޑް ގޭމްސް އެކަޑަމީ އިން ކާމިޔާބު ކުރީ 25-21 އިންނެވެ. ނަމަވެސް، ހުރާ އިން ވަނީ 17-25 އިން ދެ ވަނަ ސެޓު ކާމިޔާބު ކޮށްފަ އެވެ. ޖެހިގެން ކުޅުނު ތިން ވަނަ ސެޓުގައި ވެސް ހުރާ އިން ވަނީ 17-25 އިން ކުރި ހޯދައިފަ އެވެ.

ނަމަވެސް ހަތަރު ވަނަ ސެޓު 25-20 އިން ކާމިޔާބުކޮށް، ގުޑް ގޭމްސް އެކަޑަމީ އިން ވަނީ ސެޓުގެ ގޮތުން ހަމަހަމަ ކޮށްފަ އެވެ. ނަތީޖާ ނެރުމަށް ކުޅުނު ފަސް ވަނަ ސެޓުގައި ގުޑް ގޭމްސް އެކަޑަމީ އިން ވަނީ 15-11 އިން ހުރާގެ މައްޗަށް ކުރި ހޯދައި މެޗުން މޮޅުވެފަ އެވެ.

މެެޗުގެ މޮޅު ކުޅުންތެރިޔަކަށް ހޮވުނީ ގުޑް ގޭމްސް އެކަޑަމީގެ ބިދޭސީ ކުޅުންތެރިޔާ ރޯލީ ޕަތަކް އެވެ.

ލީގުގައި ގުޑް ގޭމްސްގެ ތިން ވަނަ މެޗުގައި ނިކުންނާނީ ކުލަބު ވެމްކޯއާ ދެކޮޅަށެވެ. އަދި ހުރާގެ ތިން ވަނަ މެޗުގައި އެ ޓީމު ނިކުންނާނީ ފްލެކްސާ ސްޕޯޓްސް ކުލަބާ ދެކޮޅަށެވެ.