އިނގިރޭސި ވިލާތުގެ އެވަޓަން މި ސީޒަނުގެ ޔުއެފާ އިޔުރޯޕާ ލީގަށް ކޮލިފައިވެއްޖެއެވެ.

އެވަޓަން އިން އިޔުރޯޕާ ލީގުގެ ޖާގައެއް ކަށަވަރު ކުރީ ކްރޮއޭޝިއާގެ ހަޑުކް ސްޕްލިޓު 3-1 ގެ އެގްރިގޭޓް ނަތީޖާއަކުން ބަލިކޮށްގެންނެވެ. އެވަޓަން އިން ވަނީ އަމިއްލަ ދަނޑުގައި ކުޅުނު ފުރަތަމަ ލެގުގެ މެޗު 2-0 ގެ ނަތީޖާއަކުން ކާމިޔާބު ކޮށްފައެވެ. ބުރާސްފަތި ދުވަހުގެ ރޭ ކުޅުނު ދެވަނަ ލެގުގެ މެޗު ނިމުނީ 1-1 އަކުން އެއްވަރުވެގެންނެވެ.

މެޗުގެ ފުރަތަމަ ހާފުގައި ހަޑުކްއިން ވަނީ މޮޅު ކުޅުމެއް ދައްކައި އެވަޓަންގެ ގޯލަށް ބާރުބޮޑު ކޮށްފައެވެ. އެގޮތުން އެ ޓީމުގެ ފުރަތަމަ ގޯލު މެޗުގެ 43 ވަނަ މިނުޓުގައި ކާމިޔާބު ކޮށްދިނީ މިޑްފީލްޑާ ޖޯސެޕް ރަޑޮސެވިޗްއެވެ. ފުރަތަމަ ހާފު ނިމިގެން ދިޔައީ 1-0 ގެ ނަތީޖާއަކުން އެވަޓަންގެ މައްޗަށް ހަޑުކް ކުރީގައި އޮވެގެންނެވެ.

އެހެން ނަމަވެސް މެޗުގެ ދެވަނަ ހާފުން 14 ސިކުންތު ނުކުޅެވެނީސް އެވަޓަންއަށް ނަތީޖާ ހަމަހަމަ ކޮށްދިނީ އެ ޓީމާއި އަލަށް ގުޅުނު މިޑްފީލްޑާ ގިލްފީ ސިގަޑްސަންއެވެ. އޭނާ މި ގޯލު ކާމިޔާބު ކޮށްދިނީ ހާފުގެ މެދުން ފޮނުވާލި ބާރު ހަމަލާއަކުންނެވެ. މި ލަނޑާއި އެކު ހަޑުކްގެ ސަޕޯޓަރުންގެ އަޑު ކެޑިގެން ދިޔައިރު ހަޑުކްއަށް ލީޑު ނަގަން ލިބުނު ޕެނަލްޓީވެސް އެވަޓަންގެ ކީޕަރު ޖޯޑަން ޕިކްފޯޑް ވަނީ ދިފާއު ކޮށްފައެވެ.

އެވަޓަންއިން އިޔުރޯޕާ ލީގުގެ ޖާގައެއް ކަށަވަރު ކޮށްފައިވާއިރު އެ ޓީމުން ގްރޫޕް ސްޓޭޖުގައި ވާދަކުރާ ޓީމުތަށް އެގިގެން ދާނީ ހުކުރު ދުވަހު އޮންނަ ޔުއެފާ އިޔުރޯޕާ ލީގުގެ ގްރޫޕް ސްޓޭޖުގެ ގުރު ނެގުމުގެ ރަސްމިއްޔާތުގައެވެ.