ސްޕެނިޝް ލީގުގައި އެތުލެޓިކް ބިލްބާއޯއާ ދެކޮޅަށް ކުޅުނު މެޗުން ރެއާލް މެޑްރިޑު މޮޅުވެއްޖެ އެވެ.

ރެއާލްގެ އަމިއްލަ ދަނޑުގައި އާދީއްތަ ދުވަހުގެ ރޭ ދަންވަރު ކުޅުނު މެޗު އެ ޓީމުން ކާމިޔާބު ކުރީ 1-0 އިންނެވެ. ރެއާލުން މެޗުގައި ލަނޑު ޖެހީ ވެސް މެޗުގެ އެންމެ ފަހު ވަގުތުގެ ތެރޭގަ އެވެ.

ބިލްބާއޯއާ ދެކޮޅަށް ރެއާލް އިން ކުޅުނު މެޗުގައި އެ ޓީމަށް ކުޅެމުން އަންނަ ފްރާންސްގެ ކެޕްޓަން ކީލިއަން އެމްބާޕޭ ނުކުޅެ އެވެ. އެއީ އެންމެ ފަހުން ލީގުގައި ރެއާލް އިން ކުޅުނު މެޗުގައި އެމްބާޕޭ އަށް ދެއްކި ރަތް ކާޑުގެ ސަބަބުން، އޭނާ ސަސްޕެންޝަންގައި ހުރުމުންނެވެ.

މެޗުގައި ރެއާލް އިން ވަނީ ލަނޑު ޖެހުމަށް ވަރަށް ބޮޑަށް މަސައްކަތް ކޮށްފަ އެވެ. މެޗުގެ ފުރިހަމަ ވަގުތު ހަމަވެ، އިތުރަށް ދެއްކި ވަގުތުގައި އުރުގުއޭގެ ފެޑެރިކޯ ވަލްވާޑޭ ޖެހި ލަނޑުން ރެއާލް ވަނީ މޮޅުވެފަ އެވެ.

މޮޅާއެކު ރެއާލް އޮތީ ލީގު ތާވަލްގެ ދެ ވަނަ މަގާމުގަ އެވެ. އެއީ މިހާތަނަށް ލީގުގައި އެ ޓީމުން ކުޅެފައިވާ 32 މެޗުން 69 ޕޮއިންޓާ އެކު އެވެ. ރެއާލް އާއި އެއް ވަނައިގައި އޮތް ވާދަވެރި ބާސެލޯނާއާ ދެމެދު އޮތީ ހަތަރު ޕޮއިންޓުގެ ފަރަގެކެވެ.

ލީގުގައި މިހާތަނަށް ކުޅެފައިވާ 32 މެޗުން ބާސެލޯނާ އަށް ލިބެނީ 73 ޕޮއިންޓެވެ.