ފުލުހުން ތެދުވެރިކަމާއި އިންޓެގްރިޓީއާއެކު މަސައްކަތް ކުރުމަށް ކޮމިޝަނަރ އޮފް ޕޮލިސް ގޮވާލައިފި
19 އެޕްރީލު 2025 | ހޮނިހިރު 09:53ފުލުހުން ނަމޫނާ މަސައްކަތްތައް އަބަދުވެސް ކުރޭ
''ތިން ބްލޫ ލައިން- އަ ސައުތު ސައިޑް ސެލެބްރޭޝަން'' ހަފްލާގައި ކޮމިޝަނަރ އޮފް ޕޮލިސް އަލީ ޝުޖާއު
ދިވެހި ފުލުހުން ތެދުވެރިކަމާއި އިންޓެގްރިޓީއާއެކު މަސައްކަތް ކުރުމަށް ކޮމިޝަނަރ އޮފް ޕޮލިސް އަލީ ޝުޖާއު ގޮވާލައިފި އެވެ.
އައްޑޫ ސިޓީ ފުލުހުންނާއި އައްޑޫ ސިޓީގައި މަސައްކަތްކުރަމުން އަންނަ ސައުތު ޕޮލިސްގެ ސްޕެޝަލިސްޓް ޓީމުތަކުގެ ފުލުހުން 2024 ވަނަ އަހަރު ކޮށްފައިވާ މަސައްކަތްތަކުގެ އަގުވަޒަންކުރުމުގެ ގޮތުން ''ތިން ބްލޫ ލައިން- އަ ސައުތު ސައިޑް ސެލެބްރޭޝަން'' ގެ ނަމުގައި ސްޓާފް އެޕްރިސިއޭޝަން ނައިޓް އައްޑޫ ސިޓީގައި ބޭއްވި ހަފްލާ ޝަރަފުވެރިކޮށް ދެއްވައި ކޮމިޝަނަރ އޮފް ޕޮލިސް އަލީ ޝުޖާއު ވިދާޅުވީ ފުލުހުންގެ މަސައްކަތްތަކަކީ ވަރަށް މާތް މަސައްކަތެއް ކަމަށާއި، ތެދުވެރިކަމާއި އިންޓެގްރިޓީއާއެކު މަސައްކަތް ކުރަންޖެހޭ ކަމަށެވެ.
މީގެ އިތުރުން ކޮމިޝަނަރ ޝުޖާއު ވިދާޅުވީ ފުލުހުންގެ މަސައްކަތުގެ އަގުވަޒަން ކުރުމަކީ ގިނަ ފަހަރަށް ނުކުރެވި ދޫކޮށްލެވޭ ކަމެއް ކަމަށާއި، ނަމަވެސް ފުލުހުން ނަމޫނާ މަސައްކަތްތައް އަބަދުވެސް ކުރަމުން ގެންދާ ކަމަށެވެ.
މީގެ އިތުރުން މި ހަފްލާގައި ސައުތު ޕޮލިސް ކޮމާންޑަރު އެސިސްޓެންޓް ކޮމިޝަނަރ އޮފް ޕޮލިސް އަހުމަދު ޝަމީމް ވަނީ ސައުތު ޕޮލިސްގެ ތަރައްގީއަށް ކުރެވިފައިވާ މުހިންމު މަސައްކަތްތަކުގެ މައްޗަށް އަލިއަޅުއްވާލައްވާ ވާހަކަ ދައްކަވާފައެވެ. އަދި ރީޖަންގެ ތެރޭގައި ހަމަޖެހިފައިވާ އެކިއެކި ނިޒާމުތަކުގެ ސަބަބުން މަސައްކަތަށް ލިބިފައިވާ ފަސޭހަކަމާއި ކުރިއެރުންތައް ހިއްސާކުރެއްވި އެވެ.
އައްޑޫ ސިޓީގައި މަސައްކަތްކުރާ ފުލުހުންނާއި ސައުތު ޕޮލިސްގެ އެކި ޔުނިޓުތަކުގައި އައްޑޫ ސިޓީގައި މަސައްކަތްކުރާ ފުލުހުންގެ ތެރެއިން އެންމެ ރަނގަޅަށް މަސައްކަތްކޮށްފައިވާ ފުލުހުންނަށާއި އެންމެ ރަނގަޅަށް މަސައްކަތްކޮށްފައިވާ އާއްމު މުވައްޒަފުން އަދި ޓެކްނިކަލް މުވައްޒަފުންގެ އަގުވަޒަންކޮށް ހަނދާނީ ލިޔުން ދީފައިވެ އެވެ. އަދި ޑިޕާޓްމަންޓުތަކާއި ޔުނިޓުތަކުން ކޮށްފައިވާ މަސައްކަތުގެ އަގުވަޒަންކޮށް ހަނދާނީ ލިޔުން ދީފައިވެ އެވެ.
