ރާއްޖޭގައި ހުންނަ އެމެރިކާގެ އެމްބަސީ ބަންދުކުރަން ނިންމައިފި
ރާއްޖޭގައި އެމެރިކާގެ އެމްބަސީއެއް ހުޅުވީ 2023 ވަނަ އަހަރުގެ ސެޕްޓެމްބަރު މަހު
އެމެރިކާއިން ދިވެހިރާއްޖެއަށް ކަނޑައެޅި ރާއްޖޭގައި ހުންނަވާ ފުރަތަމަ ސަފީރު ރައީސުލްޖުމްހޫރިއްޔާއަށް ފަތްކޮޅު އެރުވުމުގެ ރަސްމިއްޔާތުގެ ތެެރެއިން
ދިވެހިރާއްޖޭގައި ހުންނަ އެމެރިކާގެ އެމްބަސީ ބަންދު ކުރަން އެމެރިކާ ސަރުކާރުން ނިންމައިފިއެވެ.
މި ނިންމުން އައިސްފައިވަނީ، އެމެރިކާގެ ރައީސް ޑޮނަލްޑް ޓްރަމްޕް ގެންގުޅުއްވާ ހަރަދު ކުޑަކުރުމުގެ ސިޔާސަތުގެ ދަށުންނެވެ. ނައިޓައިމްގައި ރިޕޯޓްކޮށްފައިވާ ގޮތުން ޓްރަމްޕްގެ ސަރުކާރުން 10 އެމްބަސީއަކާއި 17 ކޮންސިއުލޭޓް ބަންދުކޮށް، ބޭރުގެ އެހެން ބައެއް މިޝަންތަކުގެ މުވައްޒަފުން މަދުކޮށް ނުވަތަ އެއްކުރުމަށް ވިސްނަމުންދާ ކަމަށް އެމެރިކާގެ ޚާރިޖީ ވުޒާރާގެ އެތެރޭގެ މެމޯއެއްގައި ބުނެފައިވެއެވެ.
މީގެ އިތުރުން ތަންތަން ބަންދުކޮށް ހަރަދު ކުޑަކުރުމަކީ ސަރުކާރުގެ އެކި ކަންކޮޅުތަކުގައި ފެޑެރަލް ޚަރަދުތައް ކުޑަކުރުމަށް ރައީސް ޓްރަމްޕް ގެންގުޅުއްވާ ވިސްނުންފުޅާއި، އެ ޑިޕާޓްމަންޓުގެ ޚަރަދުގެ ގާތްގަނޑަކަށް 50 އިންސައްތަ ކުޑަކުރުމަށް ސްޓޭޓް ޑިޕާޓްމަންޓްގެ ލީޑަރުން ވިސްނަވަމުން ގެންދަވާ ހުށަހެޅުއްވުމާ އެއްގޮތްވާ ގޮތުގެ މަތިންނެވެ.
މެމޯގައި ބަންދުކުރަން ހުށަހަޅާފައިވާ އެމްބަސީތަކުގެ ތެރެއިން ހަ އެމްބަސީއަކީ އެފްރިކާގައި ހުންނަ އެމްބަސީއެވެ. އޭގެތެރޭގައި ސެންޓްރަލް އެފްރިކަން ރިޕަބްލިކް، އެރިޓްރިއާ، ގެމްބިއާ، ލެސޯތޯ، ރިޕަބްލިކް އޮފް ކޮންގޯ އަދި ސައުތު ސޫދާން އެވެ. އެ މެމޯގައި ވަނީ އެ މީހުންގެ މަސައްކަތްތައް ކައިރި ގައުމުތަކުގައި ހުންނަ އެމްބަސީތަކަށް ބަދަލުކުރުމަށް ލަފާދީފަ އެވެ.
މީގެ އިތުރުން ޔޫރަޕްގައި ހުންނަ ކުދި ދެ އެމްބަސީ ކަމަށްވާ ލަގްޒެމްބާގް އަދި މޯލްޓާގެ އިތުރުން ގްރެނާޑާ އާއި ރާއްޖޭގައި ހުންނަ ޑިޕްލޮމެޓިކް މިޝަންތައް ބަންދުކޮށް، ކައިރި ގައުމުތަކަށް ވެސް އެ އެމްބަސީތައް ބަދަލުކުރުމަށް މެމޯގައި ވަނީ ލަފާދީފަ އެވެ.
ބަންދުކުރުމަށް ލަފާދޭ ގިނަ ކޮންސިއުލޭޓްތައް ހުރީ ޔޫރަޕުގައި ކަމަށާއި އޭގެ ތެރޭގައި އެމެރިކާގެ މީހުންގެ މެދުގައި މަގުބޫލު ގިނަ ޓޫރިސްޓު މަންޒިލްތައް ވެސް ހިމެނެ އެވެ.
ރާއްޖޭގައި އެމެރިކާގެ އެމްބަސީއެއް ހުޅުވީ 2023 ވަނަ އަހަރުގެ ސެޕްޓެމްބަރު މަހުއެވެ. އަދި އެމްބެސެޑަރަކަށް އައްޔަން ކުރެއްވީ ހޫގޯ ޔޮންއެވެ. ރާއްޖެގައި އެމެރިކާގެ އެމްބަސީއެއް ގާއިމް ކުރުމުގެ ކުރިން ރާއްޖޭގެ ކަންކަން ބަލަހައްޓަމުން ދިޔައީ ސްރީލަންކާގައި ހުންނަ އެމެރިކާގެ އެމްބަސީ މެދުވެރިކޮށެވެ.
