ގައުމާއި ހަވާލުވެ ހުރީ މަޖިލީހުގެ ރައީސް އަބްދުއްރަހީމް އަބްދުﷲ ކަމަށާއި މި ދައުރު ފެށުނީއްސުރެ އަދި ބަންޑާރަ ނައިބު އަހުމަދު އުޝާމް ފޮނުވި މަސައްކަތެއް އަދި ރައްޔިތުންގެ މަޖިލީހުން ނުކުރާ ކަމަށް ފާހަގަކުރައްވާ ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދު އެކަމަށް ފާޑު ވިދާޅުވެއްޖެއެވެ.

އޭނާ އެފަދައިން ވިދާޅުވީ އަޒަރުބައިޖާންގެ ސަފީރުކަމަށް ރިޓަޔާޑް އަބްދުއްރަހީމް އަބްދުއްލަތީފަށް ރުހުން ދިނުމުގެ މައްސަލަ ކޮމިޓީން ނިންމި ގޮތުގެ ރިޕޯޓަށް ބަހުސްކުރައްވަމުންނެވެ.

ސަރުކާރު ތެރެއިން ވެސް މިނިސްޓްރީ އަކުން ވެސް މަސައްކަތްތައް ރަނގަޅަސް ނުވާ މަންޒަރު މިހާރު ވެސް ފެނިގެންދާ ކަމަށް ޒިޔާދު ވިދާޅުވިއެވެ. ސަރުކާރަށް ކަންކަން ނުކުރެވުމުން އެކަން ފޫބެއްދުމަށް ރައީސް ޑރ.މުހައްމަދު މުއިއްޒު ނުކުމެވަޑައިގެން ވާހަކަދައްކަވާ ކަމަށް ވެސް އޭނާ ވިދާޅުވިއެވެ. އޭނާ ވަނީ މަޖިލިސް މެމްބަރުން އަމިއްލަ އަށް ގުރުބާން ވެގެން ވަޒީރުން ހިމާޔަތްކުރާތީ އެކަމަށް ވެސް ފާޑު ވިދާޅުވެފައެވެ.

ޒިޔާދުގެ އެ ވާހަކަތަކަށް މަޖިލީހުގެ ޕީއެންސީގެ ޕީޖީ ލީޑަރ އިބްރާޙިމް ފަލާހު ވަނީ ރައްދު ދެއްވާފައެވެ. އެއީ އެމްޑީޕީން ދައްކާ ސިޔާސީ ވާހަކަތަކެއް ކަމަށް ފަލާހު ވަނީ ސިފަކުރައްވާފައެވެ.

ހޯމަ ދުވަހު މަޖިލީހުގައި ދިވެހިރާއްޖެއިން އަޒަރުބައިޖާނަށް ކަނޑައަޅުއްވާ ނޮން-ރެޒިޑެންޓް ސަފީރުކަމަށް ލެފްޓެނަންޓް ޖެެނެރަލް (ރިޓަޔަރޑް) ޢަބްދުއްރަހީމް ޢަބްދުލްލަޠީފް ޢައްޔަނުކުރެއްވުމަށް ވަނީ ރުހުން ދީފައެވެ.

އަޒަރބައިޖާނަށް ނޮން-ރެޒިޑެންޓް ސަފީރެއްގެ ގޮތުގައި ޢަބްދުއްރަހީމް ޢަބްދުލްލަޠީފް އައްޔަންކުރެއްވުމަށް ރައީސުލްޖުމްހޫރިއްޔާ ނިންމަވާފާވާއިރު، އޭނާ އަކީ މިހާރު ތުރުކީވިލާތަށް ރާއްޖެއިން ކަނޑައަޅުއްވާފައި ހުންނަވާ ސަފީރެވެ.