ޤާސިމް ތިން އަހަރަށް ޖަލަށް، ގޮނޑި ގެއްލިއްޖެ!
24 އޯގަސްޓު 2017 | ބުރާސްފަތި 20:24ހުކުމް ކުރީ ޣައިރު ޙާޒިރުގައި
ޤާސިމް އިބްރާހީމް
ޖުމްހޫރީ ޕާޓީގެ ލީޑަރ އަދި މާމިގިލީ ދާއިރާގެ މެންބަރ ޤާސިމް އިބްރާހީމްގެ މައްޗަށް ރިޝްވަތު ދިނުމަށް ހުށަހެޅުމުގެ ކުށް ސާބިތުކޮށް ތިން އަހަރާއި ދެ މަހާއި 12 ދުވަހަށް ޖަލަށް ލުމަށް ޣައިރު ހާޒިރުގައި ކްރިމިނަލް ކޯޓުން ހުކުމް ކޮށްފިއެވެ.
މިހުކުމާއެކު ޤާސިމް އިބްރާހީމް ފުރުއްވަމުން ގެންދެވި ރައްޔިތުންގެ މަޖިލީހުގެ ގޮނޑި ގެއްލިގެންދާނެއެވެ. ގާނޫނު އަސާސީގެ 73 ވަނަ މާއްދާގައި ބުނާ ގޮތުން ޖިނާއީ ކުށެއް ސާބިތުވެ 12 މަސްދުވަހަށް ވުރެ ދިގު މުއްދަތެއްގެ ހުކުމެއް ތަންފީޒުކުރަން ޖެހިއްޖެނަމަ ރައްޔިތުންގެ މަޖިލީހުގެ މެންބަރުކަމުގެ ގޮނޑި ގެއްލޭއެވެ.
ބުރާސްފަތި ދުވަހުގެ ދަންވަރު ގާސިމްގެ މައްޗަށް ޣައިރު ހާޒިރުގައި ހުކުމް ކުރިއިރު، އެމަނިކުފާނު އޮންނެވީ އާލާސްކަންފުޅާ އައިޖީއެމްއެޗްގައި އެޑްމިޓް ކުރެވިފަ އެވެ. ގާސިމް އެޑްމިޓް ކުރެވުނީ ބުރާސްފަތި ދުވަހުގެ މެންދުރު ބޭއްވި އަޑުއެހުމަށް ވަޑައިގެން ކޯޓުގައި ހުންވަނިކޮށް ކޯޓު ތެރެއަށް ވެއްޓުމުންނެވެ. ބުރާސްފަތި ދުވަހުގެ ހެނދުނު ވެސް އަޑުއެހުމެއް ބޭއްވި އެވެ.
ގާސިމަށް ހުކުމް ކޮށްފައިވަނީ ގާނޫނީ ވަކީލުންގެ ވެސް ޣައިރު ހާޒިރުގަ އެވެ. ވަކީލުން ވިދާޅުވީ ކޯޓަށް ވަޑައިނުގެންނެވީ ގާސިމްގެ ޣައިރު ހާޒިރުގައި ޝަރީއަތް ބާއްވާތީ ކަމަށާއި އެއީ ޤާނޫނު އަސާސީއާ ހިލާފު ކަމެއް ކަމުގައެވެ.
ގާސިމް ތިން އަހަރާއި ދެ މަހާއި 12 ދުވަސް ވަންދެން ޖަލަށް ލުމަށް ހުކުމް ކޮށްފައިވަނީ، ރައްޔިތުންގެ މަޖިލީހުގެ ރައީސް އަބްދުﷲ މަސީހުގެ އިތުބާރު ނެތް ކަަމަށް 27 މާޗް ގައި ނަގަން އޮތް ވޯޓުގެ ކުރިން، މާޗް 26 ވަނަ ދުވަހުގެ ރޭ ޖުމްހޫރީ ޕާޓީގެ އޮފީސް، މ. ކުނޫޒުގައި ބޭއްވި ޖަލްސާގައި ވާހަކަ ދައްކަވަމުން މަޖިލިސް މެންބަރުންނަށް ނުފޫޒު ފޯރުވައި، މެންބަރުންނަށް ރިޝްވަތި ހުށަހެޅުއްވި ކަމަށް ވުނެ ދައުލަތުން އުފުލި ރިޝްވަތު ދިނުމަށް ހުށަހެޅުމުގެ ދައުވާގަ އެވެ.
އެ ދައުވާ ކޮށްފައިވަނީ ގާނޫނުލްއުގޫބާތުގެ 510 ވަނަ މާއްދާގެ (ށ)އާ ހަވާލާދީ، އެމާއްދާގެ (ރ)ގެ ދަށުންނެވެ. އެ ކުށަކީ ޖިނާޔަތުގެ ތިން ވަނަ ދަރަޖައިގެ ކުށެކެވެ. ކުށުގެ އަސާސީ އަދަބަކީ ތިން އަހަރާއި ދެ މަހާއި 12 ދުވަހުގެ ޖަލު ހުކުމެކެވެ.
ކްރިމިނަލް ކޯޓް ހިންގެވުމާ ވަގުތީ ގޮތުން ހަވާލުވެ ހުންނެވި ގާޒީ އާދަމް އާރިފް ކުރެއްވި ހުކުމުގައި ބުނެފައިވަނީ ދައުލަތުގެ މުވައްޒަފަކު ރަސްމީ ހައިސިއްޔަތުން އަދާކުރަންޖެހޭ ވާޖިބަކަށް ނުފޫޒު ފޯރުވުމުގެ ގޮތުން، ނުވަތަ ރަސްމީހައިސިއްޔަތުން ކުރަންޖެހޭ ކަމެއް ކުރުމުގެ ގޮތުން، ނުވަތަ ނުކޮށް ދޫކޮށްލުމުގެ ގޮތުން ގާނޫނު ހުއްދަނުކުރާ މަންފާއެއް ހުށަހެޅުމަކީ ރިޝްވަތު ދިނުމަށް ހުށަހެޅުމުގެ ކުށުން ކުށްވެރިވާކަމެއް ކަމަށެވެ. އަދި ރައްޔިތުންގެ މަޖިލީހުގެ މެންބަރުންގެ ޒިންމާ ވަކިގޮތަކަށް އަދާކޮށްފިނަމަ، އެމެންބަރުންނަށް ދާއިރާގެ ޓިކެޓުދޭނެ ކަމަށް ހުށަހެޅުމަކީ އެމެންބަރުންނަށް ހުށަހެޅޭ މަންފާއެއް ކަމާއި، އެމަންފާ ހުށަހެޅެނީ ވޯޓުލާގޮތަކަށް ރިޢާޔަތްކޮށް، ޙާސިލްކޮށްދެވޭ ގޮތުންނަމަ، އެމަންފާއަކީ، ހުއްދަވެގެންނުވާ މަންފާއެއް ކަމަށް ވެސް ބުނެފައިވެއެވެ.
ހުކުމުގައި ބުނެފައިވަނީ މި ކުށަކީ ކަމެއް ހުށަހެޅުމުގެ ޠަބީޢަތް ލިބިފައިވާ ކުށެއް ކަމަށް ވީހިނދު، އެކުށަކީ ބުނާ ބަހަކުން އެކަނި ފުރިހަމަވެދާނެ ކުށެއްކަން އެނގެން އޮންނަ ކަމަށެވެ. ރައްޔިތުން މަޖިލީހުގެ ރައީސްގެ އިތުބާރު ނެތްކަމުގެ ވޯޓު ނެގުމުގެ ކުރިން އެވޯޓު ނެގުމާ ގުޅުވައިގެން މަޖިލީހުގެ އެހެން ދާއިރާތައް ތަމްސީލުކުރައްވާ މެންބަރުން މަސީހް ބޭރުކުމަށް ވޯޓު ދެއްވައިފިނަމަ، އެމެންބަރަކު ހިމެނިވަޑައިގަންނަވާ ދާއިރާއެއްގެ ޓިކެޓު ދެއްވާނެ ކަމަށާއި، އެހެން ހުރިހާ ގޮތަކުންވެސް އެހީތެރިވެދާނެ ކަމަށް ބުނެ، ދައްކަވާފައިވާ ވާހަކައަކީ، ވަކި ބަޔަކަށް އަމާޒުކޮށް ޚާއްޞަ ކުރެވިގެން ދައްކަވާފައިވާ ވާހަކައެއް ކަމާއި އާންމު ރައްޔިތުންނަށް އަމާޒުކޮށްގެން ސިޔާސީ ފަރާތްތަކުން ކުރަމުންދާ ސިޔާސީ ވައުދުތަކާއި ޤާސިމް ރައްޔިތުންގެ މަޖިލީހުގެ މެންބަރުންނަށް ޚާއްޞަކޮށް ދީފައިވާ ދައުވަތުގެ ޢިބާރާތާއި، ތަފާތު ވެގެންވާ ކަމަށް ވެސް ބުނެފައިވެއެވެ.
ޤާސިމް ބޭނުންކުރެއްވި، ޢިބާރާތަކީ ދިވެހިރާއްޖޭގެ ސިޔާސީ މަސްރަޙުގެ ޢުރުފު ޤަބޫލުކޮށްފައިވާ ފަދަ ޢިބާރާތެއްކަން ނުވަތަ ޤާސިމްގެ ފަރާތުން ދައްކާފައިވާ ވާހަކަ އަކީ ޤާނޫނު އަސާސީއާއި ޤާނޫނީ އިމުގެ ތެރެއިން ދައްކާފައިވާ ވާހަކައެއްކަން ނުވަތަ އެނޫންވެސް ދިފާޢެއް ޤާސިމަށް ލިބިގެންވާކަން ދިފާޢު އިން ސާބިތުކޮށްދޭންޖެހޭ މިންގަނޑަށް ސާބިތުކޮށްދެވިފައިނުވާ ކަމަށް ވެސް ހުކުމުގައި ބުނެފައިވެއެވެ.
މީގެ އިތުރުން ހުކުމުގައި ބުނެފައިވަނީ ޤާސިމަށް ޝަރީޢަތަށް ހާޒިރުވުމަށް އަންގައި، ޗިޓް ފޮނުވުމުން ގިނަ ފަހަރު ތަކުގައި ގާސިމް ޝަރީޢަތަށް ހާޒިރުވެފައިނުވަނީ، ޝަރީޢަތަށް ހާޒިރުނުވެވޭ ފަދަ ބައްޔެއް ހުރެގެންކަން ޤާސިމްގެ ފަރާތުން ކޯޓަށް އަންގާފައިނުވާ ކަމަށެވެ. އެހެން ނަމަވެސް، ޤާސިމްގެ ހުރި ބައްޔެއް ދެނެގަތުމަށްޓަކައި ރާއްޖެއިން ހެދެން ނެތް ޓެސްޓުތަކެއް ހެދުމަށް ރާއްޖެއިން ބޭރަށް ފޮނުވަންޖެހޭ ކަމަށް ޤާސިމް ބެއްލެވި ޑޮކްޓަރު ލަފާދީފައިވާކަމަށް ހުށަހަޅާފައިވާ ލިޔުންތަކުން އެނގެން އޮންނަ ކަމަށް ހުކުމުގައި ބުނެފައިވެއެވެ.
އެކަން ފާހަގަކޮށް ހުކުމުގައި ބުނެފައިވަނީ ގާސިމްގެ މައްޗަށް ސާބިތުވާ ކުށުގެ އަދަބު ތަންފީޒުކުރަމުންދިޔަ ނަމަވެސް، އަދި ޤާސިމްގެ މައްޗަށް ސާބިތުވި ކުށުގެ އަދަބު ތަންފީޒުކުރުމަކީ، ރާއްޖެއިން ބޭރުން ހެދުމަށް ޤާސިމް ބެއްލެވި ޑޮކްޓަރު ލަފާދެއްވާފައިވާ ޓެސްޓުތައް ހެދުމާއި، ލިބެންޖެހޭ ފަރުވާ ޤާސިމަށް ލިބުމަށްއޮތް ހުރަހަކަށްވެގެން ނުވާނެ ކަމަށާއި، އެފަރުވާތައް ޤާސިމަށް ރާއްޖެއިން ބޭރުން ހޯދޭނެ އިންތިޒާމް ހަމަޖައްސައި ދިނުމަށް ކަމާބެހޭ އިދާރާތަކުގެ މައްޗަށް އަމުރުކޮށް، ޤާސިމްގެ ޣައިރު ޙާޒިރުގައި ނިޔާކަނޑައަޅާ ކަމަށެވެ.
މި ހުކުމާ ގުޅިގެން ގާސިމްގެ ގާނޫނީ ވަކީލުންގެ ޓީމުގައި ހިމެނިވަޑައިގަންނަވާ ކުރީގެ ޑެޕިއުޓީ ޕްރޮސެކިއުޓަރ ޖެނެރަލް ހުސެއިން ޝަމީމް ވިދާޅުވީ މިހާރު އަމަލު ކުރަމުންދާ ޤާނޫނު އަސާސީއަށް ޢަމަލުކުރަން ފެށިފަހުން މިއީ ޖިނާއީ މައްސަލައެއްގައި މިގޮތަށް ޣައިރު ޙާޒިރުގައި ހުކުމްކުރި ފުރަތަމަ ފަހަރު ކަމަށެވެ. އަދި މިހުކުމަކީ ޤާނޫނާ އެއްގޮތަށް ކޮށްފައިވާ ހުކުމެއްކަމަށް ޤަބޫލުނުކުރައްވާ ކަމަށްވެސް ޝަމީމް ވިދާޅުވިއެވެ.
ގާސިމްގެ ޝަރީއަތްތަށް ތާވަލު ކުރަމުންދިޔަ ގޮތާއި، އެމަނިކުފާނުގެ ސިއްހީ ހާލުކޮޅާ ގުޅޭ ގޮތުން ވަކީލުން ނެރުނު ބަޔާނުގައި ބުނެފައިވަނީ ގާސިމްގެ ހާލު ސީރިއަސްވެ ހޮސްޕިޓަލަށް ގެންދިއުމުން ވެސް ވަކީލުން ކޯޓުގެ ތެރޭގައި މަޑު ކުރުވާފައިވާ ކަމަށެވެ. ނަމަވެސް ގާސިމްގެ ޣައިރު ހާޒިރުގައި ޝަރީއަތް ހިންގުމަށް އިންކާރުކޮށް، ގާސިމް ނެތް މަޖީލިހެއްގައި ވަކީލުންގެ ހަސިއްޔަތުން ނުތިބޭނެ ކަމަށް އަންގާފައިވާނެ ކަމަށް ވަކީލުންގެ ބަޔާނުގައި ބުނެފައިވެ އެވެ.
