ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ)ގެ ވަގު ގޯތީގެ މައްސަލާގައި ގިނަ ތުހުމަތުތަކެއް ކުރެވިފައިވާ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު މުހައްމަދު ފަޒީލް ރަޝީދު ހުޅުމާލެއިން ފްލެޓެއް ބައްލަވައިގެންފި އެވެ.

ފަޒީލް ހުޅުމާލެއިން ފްލެޓެއް ބައްލަވާގަތްކަން ހާމަވީ އޭނާގެ ނަމަށް އެ ފްލެޓުގެ ރަޖިސްޓްރީ ބަދަލުކުރުމަށް އެޗްޑީސީން ސިވިލް ކޯޓަށް ހުށަހެޅުމުންނެވެ.

ރާއްޖެއެމްވީއަށް މައުލޫމާތު ލިބިފައިވާ ގޮތުގައި ފަޒީލް ފްލެޓު ބައްލައްވާގަތީ ހައުސިން ޑިވެލޮޕްމަންޓް ފައިނޭންސް ކޯޕަރޭޝަން (އެޗްޑީއެފްސީ)ން ލޯނެއް ނަންގަވައިގެންނެވެ. 1.18 މިލިއަނަށް ވުރެ ގިނަ ރުފިޔާ މި ފްލެޓަށް ދައްކަވާފައިވާއިރު، އެއްބައި ފައިސާ ދައްކަވާފައިވަނީ ލޯނުގެ ފައިސާއިންނެވެ. އަދި އަނެއް ބައި ދައްކަވާފައިވަނީ އަމިއްލަ ރުފިޔާއިން ކަމަށް މައުލޫމާތު ލިބެއެވެ.

އިތުބާރުހުރި މަސްދަރަކާ ހަވާލާދީ ދައުރުގައި ބުނެފައިވަނީ ފަޒީލް ފްލެޓެއް ބައްލަވައިގަތީ ބެޗް ކޮންސްޓްރަކްޝަނުން ހުޅުމާލޭގައި ހަދާފައިވާ މެރީނާ ވިއުއިން ކަމަށެވެ.

ފަޒީލްއަކީ، ވަގު ގޯތީގެ މައްސަލަ ފެންމަތިވުމާ ގުޅިގެން އެޗްޑީސީގެ މެނޭޖިން ޑިރެކްޓަރު ކަމުން އިސްތިއުފާދެއްވި ފަޒުލް ރަޝީދުގެ ބޭބެ އެވެ. އަދި މިމައްސަލައާ ގުޅިގެން 19 ޑިސެންބަރު 2024 ވަނަ ދުވަހުން ފެށިގެން ފަޒީލު ވަނީ އެމްޑަބްލިއުއެސްސީގެ ޑެޕިއުޓީ މެނޭޖިން ޑިރެކްޓަރު ކަމުން ސަސްޕެންޑް ވެސް ކޮށްފައެވެ. އަދި ވެސް އޭނާ ހުންނެވީ އޮފީހަށް ނުނިކުމެވޭ ގޮތަށް ސަސްޕެންޝަންގައެވެ.