އެމްޑީޕީގެ އާދަޔާ ހިލާފު ކޮންގްރެސްއެއް ބާއްވަން ގައުމީ މަޖިލީހަށް ހުށަހަޅަން ނިންމައިިފިއެވެ.

އިދިކޮޅު މައި ސިޔާސީ ޕާޓީ މޯލްޑިވިއަން ޑިމޮކްރަޓިކް ޕާޓީ (އެމްޑީޕީ) އިން އާދަޔާ ހިލާފު ކޮންގްރެސް ބޭއްވުމުގެ މަސައްކަތް ފެށުމަށްޓަކައި އެ ޕާޓީގެ ގައުމީ މަޖިލީހަށް ހުށަހަޅަން ނިންމާފައިވާއިރު، ޕާޓީގެ ގައުމީ މަޖިލީހުގެ ބައްދަލުވުމެއް ހޮނިހިރު ދުވަހުގެ ރޭ ބޭއްވުމަށް ވަނީ ނިންމާފައެވެ.

އެމްޑީޕީން ބުނީ ގައުމީ މަޖިލީހުގެ ޖަލްސާ އޮންނާނީ އެޕްރީލް 12 ވާ ހޮނިހިރު ދުވަހުގެރޭ 8:30 ގައި ކަމަށެވެ. ޖަލްސާ ބާއްވަން ނިންމާފައިވަނީ އެމްޑީޕީގެ ހަރުގޭގައެވެ.

ހޮނިހިރު ދުވަހު ބާއްވާ ގައުމީ މަޖިލީހުގެ ޖަލްސާގެ އެޖެންޑާގައިވާ ކަންތައްތަކުގެ ތެރޭގައި އާދަޔާ ހިލާފު ކޮންގްރެސްއެއް ވީ އެންމެ އަވަހަކަށް ބާއްވަން ނިންމައި، ތާރީހެއް ކަނޑައެޅުން ހިމެނެއެވެ. އަދި އެ މަސައްކަތުގެ އިދާރީ ކަންކަން ކުރުމަށް ކޮމިޓީއެއް ނެގުމަށް ވެސް ވަނީ ހިމަނާފައެވެ.

އެމްޑީޕީން އާދަޔާ ހިލާފު ކޮންގްރެސްއެއް ބޭއްވުމަށް ތާރީހެއް ކަނޑައަޅާ އެ މަސައްކަތް ކުރުމަށް ނިންމާފައިވާ މި ދަނޑިވަޅަކީ، އެމްޑީޕީއާއި، ދަ ޑިމޮކްރެޓްސް ގުޅިގެން މަސައްކަތް ކުރުން ކަމަށް އެމްޑީޕީގެ ކުރީގެ ރައީސް މުހައްމަދު ނަޝީދު ވެސް ވިދާޅުވެފައުވާ ދަނޑިވަޅެއްގައެވެ.

އެމްޑީޕީގެ އަސާސީ ގަވާއިދު ބުނާގޮތުން ކޮންގްރެސްއެއް ބޭއްވޭނީ ކޮންމެ 5 އަހަރަކުންނެވެ. ނަމަވެސް ބޭނުންވެއްޖެ ހާލަތެއްގައި އާދަޔާ ހިލާފު ކޮންގްރެސްއެއް ބޭއްވުމަށް އަސާސީ ގަވާއިދު ތަންދެއެވެ. އެންމެފަހުން އެމްޑީޕީގެ ކޮންގްރެސްއެއް ބޭއްވީ 2022 ވަނަ އަހަރުއެވެ.