އެފްޑީއެސް ފުޓުބޯޅަ މުބާރާތް: ފައިނަލްގެ ފުރަތަމަ ޖާގަ ފަރުކަން އަށް، އަލް ޙަދީދަށް އިންތިޒާރެއް
8 އެޕްރީލު 2025 | އަންގާރަ 14:58މި މެޗާ ކުރިމަތިލީއިރު، މެޗު އެއްވަރު ކޮށްލައިގެން ވެސް މުބާރާތުގެ ފައިނަލަށް ދިޔުމުގެ ފުރުސަތު އަލް ޙަދީދަށް އޮތެވެ. ނަމަވެސް މެޗުން ބަލިވުމުން، އެ ޓީމު ޖެހެނީ ލީގު ބުރުގެ ފަހު މެޗުގައި ޑީޓެން އެކްސްޕްރެސް އަދި ކެމަލް ބައްދަލު ކުރާ މެޗަށް އިންތިޒާރު ކުރާށެވެ.
އެފްޑީއެސް ފުޓުބޯޅަ މުބާރާތުގައި ފަރުކަން އަދި އަލް ޙަދީދު ކުޅުނު މެޗުގެ ތެރެއިން
ފީއަލީ ޑިވެލޮޕްމަންޓް ސޮސައިޓީ (އެފްޑީއެސް) އިން އިންތިޒާމު ކޮށްގެން ކުރިއަށް ގެންދާ ފުޓުބޯޅަ މުބާރާތުގައި އަލް ޙަދީދާ ދެކޮޅަށް ކުޅުނު މެޗުން މޮޅުވެ، ފަރުކަން ސްޕޯޓްސް ކުލަބުން މުބާރާތުގެ ފައިނަލްގެ ޖާގަ ކަށަވަރު ކޮށްފި އެވެ.
އަންގާރަ ދުވަހުގެ ހަވީރު ފީއަލީ ފުޓުބޯޅަ ދަނޑުގައި ކުޅުނު މެޗު ފަރުކަން އިން ކާމިޔާބު ކުރީ 2-0 އިންނެވެ. މެޗުގެ ފުރަތަމަ ހާފުގައި އެ ޓީމުން އެއް ލަނޑު ޖެހިއިރު، އަނެއް ލަނޑު ޖެހީ ދެ ވަނަ ހާފުގަ އެވެ.
މެޗުގައި ފަރުކަންގެ ދެ ލަނޑު ވެސް ޖެހީ ޝާއިފް އަބްދުލް ޙަމީދު އެވެ. މެޗުގެ މޮޅު ކުޅުންތެރިޔަކަށް ހޮވުނީ ވެސް އޭނާ އެވެ.
މި މެޗާ ކުރިމަތިލީއިރު، މެޗު އެއްވަރު ކޮށްލައިގެން ވެސް މުބާރާތުގެ ފައިނަލަށް ދިޔުމުގެ ފުރުސަތު އަލް ޙަދީދަށް އޮތެވެ. ނަމަވެސް މެޗުން ބަލިވުމުން، އެ ޓީމު ޖެހެނީ ލީގު ބުރުގެ ފަހު މެޗުގައި ޑީޓެން އެކްސްޕްރެސް އަދި ކެމަލް ބައްދަލު ކުރާ މެޗަށް އިންތިޒާރު ކުރާށެވެ.
އެ މެޗުން މޮޅުވެ ފައިނަލަށް ދިޔުމުގެ ފުރުސަތު ކެމަލް އަށް އޮންނާނެ އެވެ. މެޗު އެއްވަރުވި ނަމަވެސް، ކެމަލް މުބާރާތުން ކަޓާނަ އެވެ.
ފަސް ޓީމު ވާދަ ކުރާ މުބާރާތުގެ ފައިނަލްގެ ޖާގަ ލިބެނީ ލީގު ބުރުގެ އެއް ވަނަ ޓީމު އަދި ދެ ވަނަ ޓީމަށެވެ.
