ފ. މަގޫދޫ އެއަރޕޯޓުގެ މަސައްކަތް ހުއްޓާލާ ވަގަށް ސާމާނު ބާލާތީ ރައްޔިތުން އިހުތިޖާޖަށް ނިކުމެއްޖެ އެވެ.

ރާއްޖެއެމްވީއަށް މައުލޫމާތު ދެމުން މަގޫދޫއިން ވާހަކަ ދެއްކި މީހަކު ބުނީ މަގޫދޫ އެއަރޕޯޓުގެ މަސައްކަތް މި ސަރުކާރު ވެރިކަމަށް އައި ފަހުން ހުއްޓާލާފައިވާ ކަމަށެވެ. ގާތްގަނޑަކަށް 75 އިންސައްތަ މަސައްކަތް ނިމިފައި އޮތް އިރު، އެ މަސައްކަތް ހަވާލުކޮށްފައިވާ އެމްޓީސީސީގެ ސައިޓް ސުޕަވައިޒަރުވެސް އެރަށުން ގެންގޮސްފައިވާ ކަމަށެވެ.

ރާއްޖެއެމްވީއާއި ވާހަކަ ދެއްކި މީހާ ބުނީ ރަށު ކައުންސިލަކަށްވެސް ރައްޔިތަކަށް ވެސް އަދި މަގޫދޫ އެއަރޕޯޓް ސައިޓުގައި ތިބި އެމްޓީސީސީ މުވައްޒަފަކަށްވެސް އެއާޕޯޓުގެ އަޕްޑޭޓެއް ނޭނގޭ ކަމަށެވެ. އަދި މި ވެރިކަން އައި ފަހުން ބޮޑުހިލަ ހުސްވެފައި އޮތްކަމަށް ބުނެ މަސައްކަތް ހުއްޓާލިގޮތަށް އެއްވެސް މަސައްކަތް ނުކޮށް އޮއްވާ ދާދި ފަހުން ބޮޑުހިލަ ގެނެސްފައިވާ ކަމަށެވެ. އަދި އެއަޕޯޓުގެ މަސައްކަތަށް ގެނައި ސާމާނުތައް ގެންގޮސް ސައިޓުން ސާމާނު ހުސްވެފައިވާ ކަމަށެވެ. އޭނާ ބުނީ ރައްޔިތުންނަށް އެނގެން ބޭނުންވަނީ އެއާޕޯޓް މިހާރު އޮތީ ހުއްޓާލާފައިތޯ ނޫނީ ކުރިއަށް ގެންދާނެތޯ ކަމަށެވެ. ނަމަވެސް މިކަމުގެ ތަފްސީލެއް މިހާތަނަށް ވެސް ލިބިފައި ނުވާ ކަމަށެވެ.

މީގެ އިތުރުން އީދުގެ ފަހުންވެސް ބައެއް ސާމާނުތައް ގެންގޮސްފައިވާ އިރު، އަނެއްކާ އަންގާރަ ދުވަހު އެތަނުގައި ހުރި ސާމާނުތައް ބަލައި ބާޖެއް ބަނދަރަށް ލަފާފައިވާ އިރު، އެއިން އެއްވެސް ސާމާނެއް ގެންދެވެނޭނީ ރައްޔިތުންނަށް އެނގިގެން އެ މައުލުމާތު ލިބިގެންކަމަށް ބުނެ އާންމުން އިހިތިޖާޖު ކުރަމުން އަންނަ ކަމަށެވެ.

ރާއްޖެއެމްވީއާއި ވާހަކަ ދެއްކި މީހާ ބުނީ ކައުންސިލަށްވެސް އަދި އެމްޓީސީސީ ސައިޓުގައި ތިބި މުވައްޒަފަކަށް ވެސް ނޭނގި އެތަނުގައި ހުރި ސާމާނު ގެންދިއުމަކީ ވައްކަން ކުރުން ކަމަށެވެ. އަދި އެތަނުން އެންމެ ސާމާނެއްވެސް ގެންދެވޭނީ އެއައޕޯޓުގެ މަސައްކަތް ކުރާނަމަ އެކަން ވެސް އަންގާ ނުވަތަ ނުކުރާނަމަ މަސައްކަތް ހުއްޓާލިކަން އެންގުމަށްފަހުގައި ކަމަށް ރައްޔިތުން ނުކުމެ އަޑު އުފުލަމުންދާ ކަމަށެވެ.

އޭނާ ބުނީ ސައިޓުގައި ހުރި ސާމާނު ބަލައި ބާޖު އައުމުގެ ކުރިން ތަކެތި ޕިކަޕަށް އަޅާ ހުރީ ތައްޔާރުކޮށްފައި ކަމަށެވެ. އަދި ބާޖު ބަނދަރުކުރުމާއެކު ސާމާނު އަރުވާގޮތަށް ނިންމާފައިވާ ކަމަށާއި، އެއީ ސީދާ ވައްކަން ކުރަން އުޅޭ ބަޔަކު އަމަލުކުރާނެ ގޮތް ކަމަށް އޭނާ ކިޔައިދިނެވެ.

ރާއްޖެއެމްވީއާއި ވާހަކަ ދެއްކި އެހެންމީހަކު ބުނީ އެއަރޕޯޓުގެ މަސައްކަތް ހުއްޓިފައި އޮންނަތާ މިހާރު އަހަރަކަށްވުރެ ގިނަ ދުވަސްވެފައިވާ އިރު އެމްޓީސީސީއިންވެސް މިކަމުގައި ޖަވާބުދާރީވާން ބޭނުން ނުވާ ކަމަށެވެ. އެއަރޕޯޓުގެ 75 އިންސައްތަ މަސައްކަތް ނިމިފައިވާ އިރު ތާރު އަޅަން، އޭބީސީ ފަށަލަ ނިންމާފައިވާ ކަމަށެވެ. މީގެ އިތުރުން ޓާމިނަލް ހިޔާކުރުމުގެ މަސައްކަތް ނިންމާ ފަޔަރ ބިލްޑިންގެ މަސައްކަތް ވެސް އެއްކޮށް ނިމިފައިވާ ކަމަށެވެ. އަދި މަގޫދޫ އެއަރޕޯޓުގެ މަސައްކަތް ހުއްޓިފައި އޮތް އިރު، ރައީސްގެ ކޮއްކޯފުޅު ސައުދާ ކުރިމަތިލެއްވި ނިލަންދޫ ދާއިރާގެ ނިލަންދޫގައި ހަދަން ފެށި އެަރޕޯޓުގެ މަސައްކަތް ބަރާބަރަށް ކުރިއަށްދާ ކަމަށް މައުލޫމާތު ދިން މީހާ ބުނެފައިވެއެވެ.

މީގެ އިތުރުން މަގޫދޫގައި ހުރި އެމްޓީސީސީގެ ސައިތް ސުޕަވައިވަރުވެސް ނިލަންދޫއަށް ގެންގޮސްފައިވާ ކަމަށާއި، ނިލަންދޫ އެއަރޕޯޓު ހިއްކަން މަގޫދޫ ފަޅުން ވެލިވެސް ނަގަނީ އީޕީއޭއިން ހުއްދަ ނުހޯދާ އީއައިއޭވެސް ނަހަދާ ކަމަށް މައުލޫމާތު ދިން މީހާ ބުނެފައިވެއެވެ.

އަދި ރައްޔިތުން އެންމެފަހުން އިހުތިޖާޖަށް ނުކުމެފައިވަނި ރައްޔިތުންނަށް ވާނުވާފައި ބައިތިއްބައިގެން، މަސައްކަތް ކުރިއަށް ނުގެންގޮސް އެއަރޕޯޓު ހަދަން ގެނައި ސާމާނު ގެންދާނީ ރައްޔިތުން މުޒާހަރާ ކުރަމުންދާ ކަމަށެވެ. އަދި މިއީ ސީދާ ވައްކަން ކުރުން ކަމަށް ވެސް ރަށުން ވާހަކަ ދެއްކި މީހުން ވަނީ ބުނެފައެވެ.