މަޖިލީހަށް ގަރާރު ހުށަހެޅުމުގެ މަގު ހަނިކުރަން ފަލާހް ވަކާލާތުކުރައްވައިފި
7 އެޕްރީލު 2025 | ހޯމަ 12:56ކުއްލި މައްސަލަ އާއި އެއްގޮތަށް ގަރާރަށް ބަހުސްކުރަން ފެނޭތޯ ވޯޓަށް އެހުމަށް މަޖިލީހުގެ ގަވާއިދަށް ބަހުސްކުރުމަށް އޭނާ ވަކާލާތުކުރެއްވި
އިނގުރައިދޫ ދާއިރާގެ މެންބަރު އިބްރާހިމް ފަލާހު
އިދިކޮޅު މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެމްބަރުން މަޖިލީހަށް ހުށަހަޅާ ގަރާރުތަކަށް ބަހުސް ކުރުމަކީ ބޭނުންތެރި ކަމެއް ނޫން ކަަމަށް ސިފަކުރައްވާ ގަރާރު ހުށަހެޅުމުގެ މަގު ހަނިކުރުމަށް ޕީއެންސީގެ ޕީޖީ ލީޑަރު އިބްރާހިމް ފަލާހު ގޮވާލައްވައިފި އެވެ.
ވެރިކަންކުރާ ޕާޓީގެ ޕީޖީ ލީޑަރ މިގޮތަށް ގޮވާލައްވާފައި ވަނީ ހޯމަ ދުވަހު މަޖިލީހުގައި ބަހުސް ކުރި ގަރާރަކަށް ވާހަކަދައްކަވަމުންނެވެ. މޯލްޑިވްސް މަނިޓަރީ އޮތޯރިޓީ (އެމްއެމްއޭ) އިން ބިމެއް ގަތުމަށްޓަކާ ކަމަށް ބުނެ ފައިސާ ޗާޕުކުރަން ނިންމާފައިވާ މައްސަލަ އާއި މެދު ހުށަހަޅާފައިވާ ގަރާރަށް ބަހުސްކުރައްވަމުން ފަލާހު ވަނީ އެފަދަ ގަރާރުތަކަކީ ބޭކާރު ގަރާރުތަކެއް ކަމަށް ސިފަކުރައްވާފައެވެ.
އެމްޑީޕީ އަށް ނިސްބަތްވެވަޑައިގަންނަވާ ހުޅުމާލެ ދެކުނު ދާއިރާގެ މެންބަރު ޑރ. އަހުމަދު ޝަމްހީދު ހުށެހުޅުއްވި ގަރާރަށް ބަހުސްކުރައްވަމުން ފަލާހު ވަނީ އިދިކޮޅުން ހުށަހަޅާ ގަރާރުތަކަށް ފުރުސަތު ހަނިކުރުމަށް މަގުފަހިވާ މޭރުމަކުން އަމަލުކުރުމަށް ތާއީދުކޮށް ވާހަކަދައްކަވާފައެވެ.
އެގޮތުން ކުއްލި މައްސަލަ އާއި އެއްގޮތަށް ގަރާރަށް ބަހުސްކުރަން ފެނޭތޯ ވޯޓަށް އެހުމަށް މަޖިލީހުގެ ގަވާއިދަށް ބަހުސްކުރުމަށް އޭނާ ވަކާލާތުކުރެއްވިއެވެ. ފަލާހުގެ އިތުރުން ޕީއެންސީ އަށް ނިސްބަތްވާ އެހެނިހެން މެމްބަރުން ވެސް ވަނީ އިދިކޮޅު އެމްޑީޕީން ހުށަހަޅާ ގަރާރާއި ކުއްލި މައްސަލަތައް ހުށަހަޅާ މަގްސަދާއި މެދު ސުވާލު އުފައްދާ އެއީ ބޭކާރު ކަމެއް ކަމަށް ސިފަކޮށްފައެވެ.
ޑރ. ޝަމްހީދު އެ ޤަރާރު ހުށަހަޅުއްވަމުން ވިދާޅުވެފައި ވަނީ އެއީ ޤާނޫނުއަސާސީ އާއި، ކަމާގުޅޭ ޤާނޫނުތަކާއި އަދި މި އަހަރަށް ރައްޔިތުންގެ މަޖިލީހުން ފާސްކޮށްފައިވާ ދައުލަތުގެ ބަޖެޓާއި ހިލާފަށް، ސަރުކާރާއި މޯލްޑިވްސް މަނިޓަރީ އޮތޯރިޓީން ކުރަމުންގެންދާ ކަންކަމާމެދު ރައްޔިތުންގެ މަޖިލީހުގެ މެންބަރުން ދެކެވަޑައިގަންނަވާ ގޮތެއް ދެނެގަތުމަށްޓަކައި ހުށަހަޅާ ޤާރާރެއް ކަމަށެވެ.
