"ލާމަރުކަޒީ ޤާނޫނު ފަދަ ޤާނޫނުތަކުގެ ތެރެއިން އިންކްލޫސިވް ގޮތަކަށް ޤައުމު ކުރިއެރުވުމަށް މަޖިލީހުން ވަނީ ކުރިއެރުންތަކެއް ހޯދާފައި"
އަބްދުއްރަހީމް ވަނީ "ނާމް" މެންބަރު ޤައުމުތަކުން އެއްބައިވެ، ސުލްޙައާއި، އިސްތިގުލާލާއި، އިންސާފު ދިފާޢުކުރުމަށް ގޮވާލައްވާފަ
އުޒްބަކިސްތާނުގެ ތަޝްކެންޓުގައި ކުރިއަށްދާ އިންޓަރ-ޕާލިމެންޓަރީ ޔުނިއަންގެ 150 ވަނަ އެސެމްބްލީގެ ހަވާސާގައި ކުރިއަށްދާ ނަން-އެލައިންޑް މޫވްމެންޓް ޕާލިމެންޓަރީ ނެޓްވޯރކްގެ 4 ވަނަ ކޮންފަރެންސްގައި ރައްޔިތުންގެ މަޖިލީހުގެ ރައީސް، އޮނަރަބަލް ޢަބްދުއްރަޙީމް ޢަ
އިޖްތިމާޢީ ރައްކާތެރިކަމުގެ ޤާނޫނާއި، ލާމަރުކަޒީ ޤާނޫނު ފަދަ ޤާނޫނުތަކުގެ ތެރެއިން އެންމެން އެކުލެވޭ ގޮތަށް ގައުމު ކުރިއެރުވުމަށް ރައްޔިތުންގެ މަޖިލީހުން ކުރިއެރުންތަކެއް ހޯދާފައިވާ ކަމަށް ރައްޔިތުންގެ މަޖްލިސްގެ ރައީސް އަބްދުއްރަހީމް އަބްދުﷲ ވިދާޅުވެއްޖެއެވެ.
އަބްދުއްރަހީމް އެފަދައިން ވިދާޅުވީ އިންޓަރ ޕާލަމެންޓްރީ ޔޫނިއަން ގެ، ނޮން އެލައިންޑް މޫވްމަންޓް (އެންއޭއެމް) ޕާލަމެންޓްރީ ނެޓްވޯކްގެ 4 ވަނަ ކޮންފަރެންސްގައި ތަގުރީރުކުރައްވަމުންނެވެ.
އުޒްބެކިސްތާނުގެ ތާޝްކެންޓްގައި ބޭއްވި އެ ކޮންފަރެންސްގައި ވާހަކަދައްކަވަމުން އަބްދުއްރަހީމް ވަނީ މި ކޮންފަރެންސްގެ މައުޟޫޢު ކަމަށްވާ، "ބަންޑުންގ އުސޫލުތަކަށް 70 އަހަރު ފުރުން: ބަންޑުންގ އުސޫލުތައް ދެމެހެއްޓުމުގައި މަޖިލިސްތަކުގެ ދައުރު" މި މައުޟޫޢަށް ވާހަކަދައްކަވާފައެވެ.
އެގޮތުން ބަންޑުންގ އުސޫލުތަށް ދެމެހެއްޓުމަށް ދިވެހިރާއްޖެއިން ކުރަމުންދަނީ އިޚްލާޞްތެރި މަސައްކަތްތަކެއް ކަމަށް އެ މަނިކުފާނު ވިދާޅުވިއެވެ. މީގެ އިތުރުން މިނިވަންކަމާއި ސިޔާދަތާއި އިސްތިޤުލާލު ދެމެހެއްޓުމަށް ޕާލިމެންޓްރީ ފިޔަވަޅުތައް މުހިންމުކަމަށް އެ މަނިކުފާނު ވަނީ ފާހަގަކުރައްވާފައެވެ. ހަމައެހެންމެ ބައިނަލްއަޤްވާމީ އެއްބާރުލުމުގެ އަގުތައް ދެމެހެއްޓުމަށް ޕާލިމެންޓަރީ ފިޔަވަޅުތަކެއް އަލުން އެޅުމަށް އެ މަނިކުފާނު ވަނީ ގޮވާލައްވާފައެވެ.
މީގެއިތުރުން، މިއަދުގެ ދުނިޔޭގައި ދިމާވާ ގޮންޖެހުންތަކަށް ހައްލެއް ހޯދައިދިނުމުގައި، ނުފޫޒު ނުފޯރުވުމާއި، ސުލްހަވެރިކަމާއެކު މައްސަލަތައް ހައްލުކުރުމަށް ބާރު އަޅުއްވާ އެ މަނިކުފާނު ވަނީ ވާހަކަދައްކަވާފައެވެ. އެގޮތުން ވިޔަފާރިއާއި ސަގާފަތުގައި އެއްބާރުލުން ދިނުމުގެ ބޭނުން ހިފުމުގައި ބަންޑުންގ އުސޫލުތަކުގެ މުހިންމުކަން މަޖިލީހުގެ ރައީސް ފާހަގަކުރެއްވިއެވެ.
އަބްދުއްރަހީމް ވަނީ "ނާމް" މެންބަރު ޤައުމުތަކުން އެއްބައިވެ، ސުލްޙައާއި، އިސްތިގުލާލާއި، އިންސާފު ދިފާޢުކުރުމަށް ގޮވާލައްވާފައެވެ.
އެ ކޮންފަރެންސްގައި ވާހަކަދައްކަވަމުން ކުދި ޖަޒީރާ ޤައުމުތަކުގެ ނާޒުކުކަމަށް ވެސް މަޖިލީހުގެ ރައީސް އަލިއަޅުއްވާލެއްވިއެވެ. އެ މަނިކުފާނު ވިދާޅުވީ މޫސުމަށް އަންނަ ބަދަލުތަކާ ގުޅޭގޮތުން ދުނިޔޭގެ އެއްބާރުލުން ދިނުމަށް އެދިވަޑައިގަންނަވާ ކަމަށެވެ. އަދި އެކަމަކީ ދިވެހިރާއްޖެއަށް ސީދާ ގޮތެއްގައި އަސަރުކުރާ އަދި ދުވަހުން ދުވަހަށް ނުރައްކާތެރިކަން އިތުރުވަމުންދާ ކަމެއް ކަމުގައި އަބްދުއްރަހީމް ވަނީ ވިދާޅުވެފައެވެ. ވަކިން ޚާއްޞަކޮށް އެންމެ ބޮޑަށް ނުރައްކާތެރިކަމުގެ ތެރޭގައިވާ ޤައުމުތަކަށް، ތިމާވެށީގެ އިންސާފު ގާއިމުކުރުމަށް ނަން-އެލައިންޑް މޫވްމެންޓް (ނާމް)ގެ މެންބަރު ޤައުމުތަކުން ދޭ އަހައްމިއްޔަތުކަން އިތުރަށް ހަރުދަނާކުރުމަށްވެސް އެމަނިކުފާނު ވަނީ އިލްތިމާސްކުރައްވާފައެވެ.
އިޖްތިމާޢީ ރައްކާތެރިކަމުގެ ޤާނޫނާއި ލާމަރުކަޒީ ޤާނޫނު ފަދަ ޤާނޫނުތައް މެދުވެރިކޮށް އިންކްލޫސިވް ޑިވެލޮޕްމަންޓް ކުރިއެރުވުމުގައި ރައްޔިތުންގެ މަޖިލީހުން ކުރިއެރުންތައް ހޯދާފައިވާ ކަމަށް ފާހަގަކުރައްވާ އެކަންކަން އަބްދުއްރަހީމް ވަނީ ހިއްސާކުރައްވާފައެވެ.
މީގެ އިތުރުން މި ޤާނޫނުތަކުގެ ސަބަބުން މުޖުތަމަޢުތަކަށް ބާރު ލިބި، ހަމަހަމަކަން ކުރިއަރާފައިވާކަމަށްވެސް މަޖިލީހުގެ ރައީސް ފާހަގަކުރެއްވިއެވެ. އަދި ޤައުމީ ސިޔާސަތުތަކާ އެއްގޮތްވާ ގޮތުގެ މަތިން ކަންތައްތައް ކުރިއަށްދޭތޯ ބެލުމުގައި ރައްޔިތުންގެ މަޖިލީހުގެ ކޮމިޓީތަކުން، ޚާއްޞަކޮށް ޤައުމީ ތަރައްޤީއާއި ތަރިކައިގެ ކޮމިޓީއާއި ހިއުމަން ރައިޓްސް އެންޑް ޖެންޑަރ ކޮމިޓީއިން ވަރަށް މުހިންމު ދައުރެއް އަދާކުރާކަމަށްވެސް އެމަނިކުފާނު ފާހަގަކުރެއްވިއެވެ.
