އެކްޓިވިޓީ ޔުނީފޯމް ނުލިބިގެން ސްކޫލުތަކުގެ ބެލެނިވެރިން ރަތަށް!
ސްކޫލު ހުޅުވެން އެންމެ ދެ ދުވަހަށް ވެފައިވާއިރު ދަރިވަރުންގެ އެކްޓިވިޓީ ޔުނީފޯމު ގަންނަން ނުލިބިގެން ގިނަ ބެލެނިވެރިން ކަންބޮޑުވުން ފާޅުކުރަމުން އަންނައިރު، މިއީ ހަމަ ކޮންމެ އަހަރަކުވެސް ބެލެވިވެރިންނަށް ބޮޑު ތަކުލީފަކަށް ވެފައި އޮންނަ ކަމެއް
ސްކޫލްކުދިންތަކެއް ސްކޫލުގައި އިތުރު ހަރަކާތްތަކުގައި ބައިވެރިވަނީ: ދިރާސީ އައު އަހަރުގެ ކިޔެވުން ފެށޭއިރު، ދަރިވަރުންގެ އެކްޓިވިޓީ ޔުނިފޯމް ނުލިބޭ މައްސަލަ ވަނީ ބޮޑުވެފަ
ދިރާސީ އަހަރު ފެށެން ދެ ދުވަހަށް ވީއިރުވެސް ސްކޫލު ކުދިންގެ އެކްޓިވިޓީ ޔުނީފޯމް ގަންނަން ނުލިބޭތީ ބެލެނިވެރިން ކަންބޮޑުވެއްޖެއެވެ.
ރާއްޖެ އެމްވީއަށް މައުލޫމާތު ދިން ދަރުމަވަންތަ ސްކޫލުގެ ބެލެނިވެރިއަކު ބުނީ ސްކޫލުގެ ކިޔެވުން ފެށެން ވަރަށް ގާތްވެއްޖެ ކަމަށާއި ނަމަވެސް އަދިވެސް ސްކޫލު އެކްޓިވިޓީ ޔުނީފޯމް ނުލިބޭ ކަމަށެވެ. އޭނާ ބުނީ މާލޭގެ ވަރަށް ގިނަ ތަންތަން ބަލައިފިން ކަމަށާއި އެކްޓިވިޓީ ޔުނިފޯމުތައް އާންމުކޮށް ލިބޭ ޑޮނާޑް ފަދަ ފިހާރަތައް ވެސް ބެލި ކަމަށެވެ. ނަމަވެސް އަދިވެސް ބޭނުންވާ ސައިޒް ނުލިބޭ ކަމަށް އޭނާ ބުންޏެވެ.
އަޅުގަނޑުވެސް އަޅުގަނޑުގެ ދަރިފުޅަށް އެކްޓިވިޓީ ޔުޏިފޯމެއް ގަންނަން ވަރަށް ގިނަ ތަންތަނަށް ދުއްވިއްޖެ، އާންމުކޮށް ޔުނީފޯމު ވިއްކާ ތަންތަންވެސް ބަލައިފި. ނުލިބުނު އެއްވެސް ތާކުން. އެދެނީ އކްޓިވިޓީ ޔުނީފޯމެއް އޮތް ބެލެނިވެރިއަކު ނަމަވެސް އަޅުގަނޑަށް އެކަމަށް އެހީއެއް ވެދިނުމަށް. ގަންނަން ވިޔަސް އޯކޭސްކޫލުކުއްޖެއްގެ ބެލެނިވެރިއެއް
ރާއްޖެ އެމްވީ އާއި ވާހަކަދެއްކި އިތުރު ބެލެނިވެރިއަކު ބުނީ އޭނާގެ ދަރިފުޅަށް ވެސް ބޭނުންވާ ސައިޒުގެ އެކްޓިވިޓީ ޔުނީފޯމެއް ގަންނަ ނުލިބުނު ކަމަށާއި މިއީ ހަމަ ކޮންމެ އަހަރުވެސް ހާލަތު ކަމަށެވެ. އަދި މިކަން މިއަށްވުރެ ފަސޭހަވާނޭ ރަނގަޅުގޮތެއް އެޑިއުކޭސަން މިނިސްޓްރީން ހަމަޖައްސައިދޭން ޖެހޭ ކަމަށް ވެސް އޭނާ ބުންޏެވެ.
ސްކޫލު ހުޅުވެން އެންމެ ދެ ދުވަހަށް ވެފައިވާއިރު ދަރިވަރުންގެ އެކްޓިވިޓީ ޔުނީފޯމު ގަންނަން ނުލިބި، ގިނަ ބެލެނިވެރިން ކަންބޮޑުވުން ފާޅުކުރަމުން އަންނައިރު، މިއީ ހަމަ ކޮންމެ އަހަރަކުވެސް ބެލެވިވެރިންނަށް ބޮޑު ތަކުލީފަކަށް ވެފައި އޮންނަ ކަމެއް ކަމަށް ގިނަ ބެލެނިވެރިން ބުނެއެވެ.
މައުލޫމާތު ލިބިފައިވާ ގޮތުގައި ދަރިވަރުންގެ އެކްޓިވިޓީ ޔުނީފޯމުގެ ތެރެއިން މިވަގުތު ބެލެނިވެރިން ނުލިބިގެން އެންމެ ބޮޑަށް ކަންބޮޑުވުން ފާޅުކުރަމުން ގެންދަނީ އެކްޓިވިޓީ ޔުނީފޯމުގެ "ސްމޯލް ސައިޒް" ނުލިބިގެން ނެއެވެ،
މީގެ އިތުރުން ސްކޫލު ފޮތްތައް ދޫކުރުމުގައި ލަސްތަކެއް ކުރިމަތިވެފައިވާ ކަމަށާއި، ބައެއް ޓެކްސްޓް ފޮތްތައް އަދިވެސް ނުލިބޭ ކަމަށް ބުނެ، ބައެއް މީހުން ދަނީ ސޯޝަލް މީޑިއާގައި އެކަމުގެ ކަންބޮޑުވުން ފާޅު ކުރަމުންނެވެ. އަދި ބައެއް ސްކޫލުތަކުގެ ވައިބާ ގްރޫޕްތަކުގައި ވެސް ދަރިވަރުންގެ ފޮތްތައް ނުލިބޭ ކަމަށް ބުނެ ބެލެނިވެރިން ނުރުހުންފާޅު ކޮށްފައިވެއެވެ.
ސްކޫލުތަކުގެ ދަރިވަރުންގެ އެކްޓިވިޓީ ޔުނީފޯމާއި ޓެކްސް ފޮތްތައް ނުލިބިގެން ގިނަ ބެލެނިވެރިން ކަންބޮޑުވުން ފާޅުކުރަމުން އަންނަ އިރު، ދިރާސީ އައު އަހަރުގެ ކިޔެވުން ފެށެންވާއިރަށް، ފޮތްތައް ހަވާލުކޮށް ނިމޭނެ ކަމަށާއި، ވަރަށް ފުރިހަމައަށް ތައްޔާރު ވަމުންދާ ކަމަށް އެޑިޔުކޭޝަން މިނިސްޓަރު ޑރ.އިސްމާއީލް ޝަފީއު ވަނީ މީގެ ކުރިން ވިދާޅުވެފަ އެވެ.
މިމައްސަލައާ ގުޅިގެން ރާއްޖެއެމްވީއަށް އެޑިޔުކޭޝަން މިނިސްޓަރު ޝަފީއު ވިދާޅުވީ ދިރާސީ އައު އަހަރަށް ތައްޔާރުވުމުގެ މަސައްކަތްތައް މިނިސްޓްރީގެ އިތުރުން ސްކޫލުތަކުން ވަރަށް ފުރިހަމައަށް ކުރަމުންދާ ކަމަށާއި، ޕްލޭންއާ އެއްގޮތަށް ފޮތްތައް ދޫކުރަމުންދާ ކަމަށެވެ. އަދި މިހާރު ސްކޫލުތަކުން ދޫކުރަމުންދާނީ އެންމެ ފަހު ބެޗް ކަމުގައިވާ ގްރޭޑް 4 އަދި 5 ގެ ދަރިވަރުންގެ ފޮތްތައް ކަމަށް މިނިސްޓަރު ޝަފީއު ވަނީ ވިދާޅުވެފަ އެވެ.
މިނިސްޓަރު ޝަފީއު ވިދާޅުވީ ސްކޫލުތައް ހުޅުވުމުގެ ކުރިން ހުރިހާ މަސައްކަތެއް ނިމޭނެ ކަމަށާއި، ފޮތްތައް ދޫކޮށް ނިންމަން ކަނޑައެޅި ތާރީހަށްވުރެ ދެ ދުވަސް ކުރިން ނިންމާލެވޭނެ ކަމަށެވެ. އަދި ވިދާޅުވީ ބެލެނިވެރިންނަށް ވެސް ތައްޔާރުވުމުގެ ފުރުސަތު ލިބޭނެ ކަމަށެވެ.
ރަމާޟާން މަހާ ދިމާކޮށް ދިރާސީ އަހަރުގެ ކިޔެވުން ނިންމައި, ރާއްޖޭގެ ހުރިހާ ސުކޫލެއްގެ ދަރިވަރުންގެ ޗުއްޓީ ފަށާފައިވަނީ 27 ފެބްރުއަރީ 2025 ގައެވެ. ޗުއްޓީ ނިންމައި ސްކޫލުތަކުގެ ކިޔެވުން ފެށޭނީ އޭޕްރީލު މަހުގެ ހަތްވަނަ ދުވަހެވެ. އަދި އަންނަ ޑިސެމްބަރު މަހުގެ 25 ވަނަ ދުވަހަށް ދިރާސީ އަހަރުގެ ކިޔެވުން ނިންމައި، ޗުއްޓީއަށް ދާނެއެވެ. އެއަށްފަހު އައު ދިރާސީ އަހަރު ފަށާނީ 2026 ވަނަ އަހަރުގެ ޖަނަވަރީ 27 ގައެވެ.
