އޮމަދޫ ބަނދަރުގެ މަސައްކަތް ހުއްޓިފައި އޮންނަތާ 2 އަހަރު!
މިމަޝްރޫއުގެ މަސައްކަތް ވަކި ހިސާބަކުން ހުއްޓުމަކަށް އައިސްފައިވަނީ ކޮންސެޕްޓަށް ބަދަލުތަކެއް ގެންނަން ބޭނުންވެގެން
އޮމަދޫ ބަނދަރު ތަރައްޤީކުރުމުގެ މަސައްކަތް ވަނީ ހުއްޓިފައި - 05-04-2025
އދ. އޮމަދޫ ބަނދަރު ތަރައްޤީ ކުރުމުގެ މަސައްކަތް ހުއްޓިފައި އޮންނަތާ 2 އަހަރު ވެފައިވާ ކަމަށް އޮމަދޫ ކައުންސިލުން ބުނެފި އެވެ.
ރާއްޖެއެމްވީ އާއި ވާހަކަ ދައްކަވަމުން އޮމަދޫ ކައުންސިލްގެ ރައީސް އިބްރާހިމް އާދިލް ވިދާޅުވީ 2023 ވަނަ އަހަރު މޯލްޑިވްސް ޓްރާންސްޕޯޓް އެންޑް ކޮންޓްރެކްޓިންގ ކޮމްޕެނީ (އެމްޓީސީސީ) ހަވާލުކޮށްގެން ކުރިއަށްގެންދިޔަ މިމަޝްރޫއުގެ މަސައްކަތް ވަކި ހިސާބަކުން ހުއްޓުމަކަށް އައިސްފައިވަނީ ކޮންސެޕްޓަށް ބަދަލުތަކެއް ގެންނަން ބޭނުންވެގެން ކަމަށެވެ.
އެގޮތުން ނިމިދިޔަ ސަރުކާރުން މަސައްކަތް ފެށި ނަމަވެސް ކޮންސެޕްޓަށް ގެންނަން ބޭނުންވާ ބަދަލުތަކާއި އެކު މަސައްކަތް އަލުން ނުފެށި ވަނިކޮށް ވެރިކަން ބަދަލުވެގެންދިޔުމުން، ކޮންމެވެސް ވަރެއްގެ ޑިލޭތަކެއް އައުމަށްފަހުން، ކައުންސިލުން ބޭނުންވާ ގޮތަށް ކޮންސެޕްޓަށް ބަދަލު ގެނެސް މިސަރުކާރުން ފައިނަލްކޮށްދިން ކަމަށް އާދިލް ވިދާޅުވި އެވެ. ނަމަވެސް އަނެއްކާވެސް މިނިސްޓްރީން ބޭނުންވީ ފައިނަލްކުރި ކޮންސެޕްޓް ބާތިލްކޮށް އައު ކޮންސެޕްޓަކަށް ދާން ކަމަށާއި އެއީ ކައުންސިލުން ބޭނުންވި ގޮތެއް ނޫން ކަމަށްވެސް އާދިލް ވިދާޅުވި އެވެ. ސަބަބަކީ ސަރުކާރުން ފަހުން ބޭނުންވި ކޮންސެޕްޓްގައި ބަނދަރުގެ ބޭރު ތޮށި ބޭނުން ނުކުރެވޭ ކަމަށާއި އޮމަދޫއަކީ ލޯކަލް ޓުއަރިޒަމް ފުޅާވަމުން އަންނަ ރަށަކަށްވެފައި ބޭރު ތޮށީގެ ބޭނުން އެކިއެކި ކަންކަމުގައި ބޭނުންކުރަންޖެހޭނެ ކަމަށް އޭނާ ވިދާޅުވިއެވެ.
މަސައްކަތް ހުއްޓިފައި އޮންނަތާ 2 އަހަރު. އެމްޑިޕީ ސަރުކާރުގައި ހުއްޓާލީ ކޮންސެޕްޓަށް ބަދަލު ގެނައުމަށް. ކޮންސެޕްޓް ފައިނަލް ނުވެ ވަރަށް ގިނަ ދުވަސްތަކެއްވި. ކޮންސެޕްޓަށް ބަދަލު ގެނެސް އަލުން މަސައްކަތް ފައްޓަންވެސް އުޅުނު. ނަމަވެސް އަނެއްކާވެސް އިތުރު ކޮންސެޕްޓެއް ހެދި އިރު ކައުންސިލުން ބޭނުންވާ ގޮތަކަށް ނޫން އޮތީ. މަސައްކަތް ލަސްވެގެންދަނީ މިސަބަބާއި ހުރެ.އޮމަދޫ ކައުންސިލްގެ ރައީސް އިބްރާހިމް އާދިލް
އޮމަދޫއަށް ދިމާވެފައިވާ ބަނދަރުގެ މައްސަލައާއި ގުޅިގެން މީހުން ދިރިއުޅޭ ރަށަކަށް ލިބޭނެ އެންމެ ބޮޑު ގެއްލުން މިހާރު އެރަށުގެ ރައްޔިތުން ތަހައްމަލު ކުރަމުންދާ ކަމަށާއި އެގޮތުން ރަށުގެ މަލަމަތި ފެންނަނީ ވީރާނާވެފައިވާ ތަނެއްގެ ގޮތުގައި ކަމަށް އާދިލް ވިދާޅުވި އެވެ. އަދި ބަނދަރުގެ ޖާގައިގެ ދަތިކަން އިންތިހާއަށް ގޮސްފައިވާއިރު މޫސުމް ގޯސްވެއްޖެ ނަމަ ބަނދަރު ބޭނުންނުކުރެވޭ ކަމަށްވެސް އާދިލް ވިދާޅުވި އެވެ.
އެގޮތުން މޫސުމް ގޯސްވާ ދުވަސްވަރު ރަށުގެ ރައްޔިތުން ނުނިދާ ބަނދަރުގައި އަޅާފައިވާ ލޯންޗާއި ދޯނި ފަހަރުތައް ސަލާމަތްކުރުމަށް މަސައްކަތްތަކެއް ކުރާ ކަމަށާއި، މިހާތަނަށް އައި އިރު ތިން ލޯންޗެއް އަޑިއަށް ގޮސް މިލިއަނުން ގެއްލުންތައް ލިބިފައިވާ ކަމަށްވެސް އޭނާ ވިދާޅުވި އެވެ. އަދި އޮމަދޫ އަކީ ކަންނެލި މަސްވެރިކަންވެސް ފުޅާ ދާއިރާއެއްގައި ކުރަމުން އަންނަ ރަށެކެވެ.
އދ. އޮމަދޫ ބަނދަރު ތަރައްގީ ކުރުމުގެ މި މަޝްރޫއުގެ މަސައްކަތް އެމްޓީސީސީއާ ހަވާލު ކޮށްފައިވަނީ 630 ދުވަހުގެ ތެރޭގައި ނިންމާ ގޮތަށް 72،322،592.58 ރުފިޔާއަށެވެ.
މި މަޝްރޫއުގެ ދަށުން 49،765 ކިއުބިކް މީޓަރުގެ ސަރަހައްދެއްގެ އައު ބަނދަރު ފުން ކުރުމާއި 12،105 ކިއުބިކް މީޓަރުގެ ނެރު ފުން ކުރުމާއި ބްރޭކްވޯޓަރ ޖެހުމާއި ރިވެޓްމަންޓް ޖެހުމާއި އެއްގަމުތޮށި ލުމުގެ މަސައްކަތް ކުރާނެއެވެ. އަދި ސްކޯރިން އޭޕްރަން ޖެހުމާއި މޫރިންގ ރިންގު ހަރުކުރުމާއި ރޭމްޕު ހެދުމާއި އެކްސެސް ޕްލެޓްފޯމް އެޅުން ވެސް މި މަޝްރޫއުގެ ތެރޭގައި ހިމެނެއެވެ.
މީގެ އިތުރުން 150 މީޓަރުގެ ދެ ކޮންކްރީޓް ޖެޓީ ހެދުމާއި ނެވިގޭޝަން ލައިޓްހަރުކުރުމާއި މަގު ބައްތި ހަރުކުރުމާއި ޕޭވްމަންޓު ހެދުމުގެ މަސައްކަތް ވެސް އެމްޓީސީސީން ކުރާނެ ކަމަށް މިއެއްބަސްވުމުގައިވެ އެވެ.
އާދިލް ވިދާޅުވީ މަސައްކަތް ހުއްޓިފައިވާއިރު، މުޅި ބަނދަރު ސަރަހައްދުގައި މިމަސައްކަތްކުރުމަށް އެމްޓީސީސީން ގެނައި ދަނގަޑާއި އެނޫންވެސް ގިނަ އަދަދެއްގެ ސާމާނު ޖަމާކޮށްފައި ހުރުމުން، ތަކްލީފްތަކާއި އެކު ބަނދަރު ބޭނުންކުރަމުންދާ މީހުންނަށް އިތުރު ތަކްލީފްތަކާއި ކުރިމަތިވެފައިވާ ކަމަށެވެ.
17 އަށްވުރެ ގިނަ ގެސްޓްހައުސް މިވަގުތުވެސް އޮޕަރޭޓްކުރަމުންދާ އޮމަދޫގެ ގެސްޓްހައުސްތަކުގެ ވެރިންވެސް ވަނީ، ބަނދަރުގެ ދަތިކަން ހުރުމުން އެކަމުގެ ކަންބޮޑުވުން ފާޅުކޮށްފަ އެވެ.
