ރައީސް ޑރ. މުޙައްމަދު މުއިއްޒުގެ މި ސަރުކާރުން ރައްޔިތުންނަށް ދޮގުހަދައި އޮޅުވާލާ ވާހަކަ އަކީ ވަރަށް އާންމުކޮށް ދެކެވެމުން އަންނަ ވާހަކައެކެވެ. ދުވަހަކަށްވުރެ ދުވަހަކު މި އަޑުތައް އަންނަނީ ގަދަވަމުންނެވެ.

މި ސަރުކާރުގެ ވެރިން ދިވެހިރައްޔިތުންނަށް އޮޅުވާލުމާއި މަކަރު ހެދުމުގައި ހައްދުންނައްޓައިފި ކަމަށް ގިނަ ބަޔަކު އަންނަނީ ބުނަމުންނެވެ. ގިނަފަހަރު ރައްޔިތުންނަށް އޮޅުވާލައި މަކަރުހަދާކަމުގެ އަޑު ފެތުރެނީ ސީދާ ރައްޔިތުންނާއި ގުޅުން ހުރި އަސާސީ ޚިދުމަތްތަކާއި ކަންކަމުން ނެވެ.

އެކަމުގެ އެއް މިސާލަކީ ފެން ބިލާއި ކަރަންޓު ބިލުން ޑިސްކައުންޓް ދިނުމުގެ ނަމުގައި ސަރުކާރުން ގެންގުޅޭ މަކަރުވެރި ވިސްނުމެވެ. ބޮޑު ޑިސްކައުންޓެއް ދޭނަމޭ ބުނެ ވާ ވައުދެވެ. ކޮންމެ ރޯދަމަހަކާއި ދިމާކޮށް ކަރަންޓާއި ފެނުން ރައްޔިތުންނަށް ޑިސްކައުންޓް ދިނުމުގެ ނަމުގައި ސަރުކާރުން ދައްކާ ވާހަކަތެކެވެ. ނަމަވެސް މި ވާހަކަތަތަކީ މި ސަރުކާރުން ރައްޔިތުންނަށް އޮޅުވާލުމަށް ދައްކާ މަކަރުވެރި، އަމަލަކާއި ބަހާއި ދިމާ ނުވާ ވާހަކަތަކެކެވެ.

ކުރީ ރޯދަމަހެކޭ ވެސް އެއްގޮތަށް މިއަހަރުގެ ރޯދަ މަހުގެ ކަރަންޓު ބިލާއި ފެންބިލުން ވެސް ކޮންމެ ގޭބީސީއަކަށް މަދުވެގެން %10އާ ހަމައަށް ޑިސްކައުންޓު ލިބޭނެ ކަމަށް ސަރުކާރުން އިއުލާން ކުރި އެވެ.

އެހެން ނަމަވެސް ރޯދަ މަސް ނިމި ގޭގެއަށް ކަރަންޓް ބިލު އައިއިރު، ސަރުކާރުން ދޭނެކަމަށް އެބުނާ ކަރަންޓު ބިލުގެ"ޑިސްކައުންޓް" އަށް ވީނުވީއެއް ވެސް ނޭންގުނެވެ. އެ ބުނާ ޑިސްކައުންޓެއް ހަމަ ނުފެނުނެ އެވެ.

މިކަމާއި ކަންބޮޑުވުން ފާޅުކޮށް ގިނަ ބަޔަކު އަންނަނީ ނުރުހުން ފާޅުކުރަމުން ނެވެ. އެއްބަޔަކު އެމީޙުންގެ ނުރުހުމުގެ އުދާސްތައް ސޯޝަލް މީޑިއާއަށް ބަންޑުން ކުރަމުން އަންނައިރު، އަނެއް ބަޔަކު އެކަމުގެ ޝަކުވާތައް ހިފައިގެން ދަނީ ކަމާއިބެހޭ އިދާރާތަކަށެވެ.

މިކަމާއި ނުރުހުންފާޅުކުރި މީހަކު ބުނީ ސްޓެލްކޯއިން ދިން ޑިސްކައުންޓެއް ނުފެންނަ ކަމަށާއި ޑިސްކައުންޓް ދޭނެ ކަމަށް ވިދާޅުވެ އޮޅުވާލީ ކަމަށެވެ. އަދި އެހެން މަސްތަކަށް ވުރެ، ކަރަންޓު ބިލް ވީ ދެގުނަ ބޮޑު ކަމަށް ވެސް އޭނާ ބުންޏެވެ.

ބައެއް ގޭބީސީތަކުން ޑިސްކައުންޓް ލައިގެން ވެސް ކަރަންޓު ބޭނުންކުރި މިންވަރު ދެ ގުނަވުމުން، އެކަމުގެ ޝަކުވާކޮށް އެހެން މީހަކު ބުނީ "ކަރަންޓް ބިލް ބޮޑު ކުރުމަކީ ސަރުކާރުގެ މަކަރުވެރި ރޭވުމެއް ކަމަށާއި ދައުލަތުގައި ލާރި ނެތިއްޔާ ރައްޔިތުން ފެލާގެން ވެސް ދައުލަތް ހިންގަން ލާރި ހޯދުނުގޮތަކަށް ހޯދާނެ ކަމަށެވެ.

ރޯދަމަހު ކަރަންޓު ބިލާއި ފެން ބިލުން ޑިސްކައުންޓް ދެއްވާނެކަމަށް ރައީސުލްޖުމްހޫރިއްޔާ ޑރ. މުހައްމަދު މުއިއްޒުގެ ވައުދާއި ޚިލާފުވިކަން ހާމަކޮށް އިތުރު މީހަކު ބުނީ ހަމަ ހަގީގަތުގަވެސް މި ފަހަރުގެ ކަރަންޓު ބިލް ވަރަށް ބޮޑު ވެގެން ގޮސްފި ކަމަށާއި މިއީ ރައީސް މުއިއްޒުގެ މި ސަރުކާރުން އޮޅުވާލި ބޮޑު އޮޅުވާލުމެއް ކަމަށެވެ.

މި ރޯދަމަހު ވެސް ކަރަންޓާއި ފެން ބިލުން ޑިސްކައުންޓު ދީފައިވާކަމަށާއި ކަރަންޓަށްދޭ ޑިސްކައުންޓަށް ގާތްގަނޑަކަށް 160 މިލިއަން ރުފިޔާ ހޭދަ ކުރަންޖެހޭނެ ކަމަށް ސަރުކާރުން ބުނި ނަމަވެސް އެކަން މިއަދު ގަބޫލް ކުރާ ދިވެއްސަކު ނެތެވެ.

މިކަން ހާމަ ކޮށް ކަރަންޓް ބިލުގެ ޝަކުވާ ކުރި މީހަކު ބުނީ ސަރުކާރުން އިންތިހާ އަށް ބިލް ބޮޑުކުރަނީ ގަސްތުގައި ކަމަށާއި ރައްޔިތުން ހަޅޭ ލަވައި އަޑުގަދަކުރަން ފެށުމުން 25 ރުފިޔާގެ ޑިސްކައުންޓެއް ރައީސް ހާދަ ހެޔޮފުޅޭ ބުނުއްވަން ސަރުކާރުން ދޭ ކަމަށެވެ.

ސަރުކާރުން ފެން ބިލާއި ކަރަންޓު ބިލުން ވެސް ރޯދަމަހު ޑިސްކައުންޓު ދޭން ނިންމާ އެކަން ހާސިލް ނުވެ ގޭބިސީތަކުގެ ބިލް ބޮޑުވުމުގެ ޝަކުވާ ރައްޔިތުން ކުރަން ފެށުމުން މިހާރު ސަރުކާރުން ބުނަނީ ކަރަންޓު ބިލުތައް ބޮޑީ ހޫނު މޫސުމާ ދިމާވެ، ރައްޔިތުން ކަރަންޓު ބޭނުންކުރި މިންވަރު އިތުރުވުމުން ކަމަށެވެ.

ރައީސް ޑރ. މުއިއްޒު އެވެ. މަނިކުފާނުގެ ދޮގު ވައުދުތަކުގައި ރައްޔިތުން ޖައްސައި ތި ދެއްވަނީ ކޮންފަދަ ބޮޑު އަނިޔާއެއްތޯ އެވެ. ތި އޮޅުވާލައްވަނީ ކޮންފަދަ ބޮޑު އޮޅުވާލުމެއް ތޯއެވެ. މަނިކުފާނުގެ ތި ދޮގާއި މަކަރުވެރި ވައުދުތަކުގައި ޖެހި ރައްޔިތުން މިހާރު ހަނާވެ ނިމިއްޖެ އެވެ.

މަނިކުފާނެވެ. ދައުލަތް ހިންގުމަށް ރައްޔިތުންނަށް އޮޅުވާލައި ނިކަމެތި ރައްޔިތުންގެ ލޭ ބުއިން ހުއްޓާ ލައްވާށެވެ. މިއަދު ސަރުކާރުން ރައްޔިތުންނަށް ހެޔޮ ނޭދޭކަން ތިޔަ ބޮޑު ކުރާ ޑެކްސްތަކުން ވެސް އެނގިސާފެވެ. ޓެކްސް ބޮޑު ނުކުރާނެ ކަމާއި ޑޮލަރު އަގު ކުޑަ ކުރާނެ ކަމަށާއި މަސްވެރިން ނަށް ޑޮލަރުން ޕޭމެންޓް ހަދާނެ ކަމަށާއި މުދަލުގެ އަގު ހެޔޮކުރާނެ ކަމަށާއި ސިޔާސީ މުސާރަވެރިން މަދު ކުރާނެ ކަމަށް އިންތިހާބުގައި ވީ ވައުދުތަކަކީ މަނިކުފާނު ރައްޔިތުންނަށް ވީ ދޮގު ވައުދުތަކެއް ކަން ރައްޔިތުން މިއަދު ގަބޫލްކޮށްފި އެވެ.

މަނިކުފާނެވެ. މަނިކުފާނު މި ގައުމުގެ ވެރިކަމަށް ވަޑައިގަތީ ރައްޔިތުން ގުނބޯހައްދައިގެން އެތަކެއް ދޮގު ވައުދުތަކެއް ވެގެންނެވެ. ނަމަވެސް މަނިކުފާނު ވެރިކަމަށް ވަޑައިގަތްތާ ދޮޅު އަހަރުވެގެން ދިޔައިރުގައިވެސް ވެވަޑައިގަތް އެއްވެސް ވައުދެއް މިހާތަނަށް ފުއްދިފައި ނުވެއެވެ. އަދި އެ ވައުދުތައް ނުފުއްދުނުތާ ތި ގެންދަވަނީ ދިވެހި ގައުމަށާއި ރައްޔިތުންނަށް އިންތިހާއަށް އަނިޔާވެރިވެ އޮޅުވާލަމުންނެވެ.

އަދި މަނިކުފާނުގެ ތި ދޮގުވައުދުތައް ނުފުއްދުނުތާ އެކަން އިތުރަށް ތަފްސީލުކޮށްދޭނެކަމަށް ވިދާޅުވެ، ތިއަ ބާއްވާ ޕްރެސްތަކާއި ޕޮޑްކާސްޓްތަކުން މަނިކުފާނު ތިދަނީ އިތުރަށް ފަލީހަތް ވަމުން ނެވެ.

ރައީސް ޑރ. މުއިއްޒު އެވެ. ބޭފުޅާ އަށް އޮތީ ހަމައެއްމެ ހައްލެކެވެ. މި ސަރުކާރުގެ އަމަލުން ގައުމާއި ރައްޔިތުންނަށް ލިބިދާނެ އިތުރު ގެއްލުމަކަށް ފުރުސަތު ނުދެއްވާ އަވަހަށް އަމިއްލަ ފުޅަށް އިސްތިއުފާ ދެއްވާ ދުރައްވަޑައިގަތުމެވެ.

މަކަރާއި ހީލަތުން، އަމިއްލަ މަންފާއަށް ރައްޔިތުންނަށް އޮޅުވާލައިގެން ތިޔަ ދޭ ގޮތަށް ކަރަންޓާފެނުން ޑިސްކައުންޓް ނުދިނަސް އެންމެ ރަނގަޅެވެ. ދިސްކައުންޓުގެ ނަމުގައި ދިވެހިން ހަނާނުކުރައްވަވާށެވެ،