ކ. މާލެ
|
4 އޭޕްރިލް 2025 | ހުކުރު 13:31
އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
ރާއްޖެ އެމްވީ
އިގްތިސާދީ ހާލަތު
ނިމުނު ރަމަޟާން މަހު ދަނޑުވެރިންނާއި، ވިޔަފާރިވެރިންނަށް ފައިދާ ނުވެ، ގެއްލުން ލިބުނީ ޑިމާންޑު ނެތުމުން: އަމްރު
އިގްތިސާދު ވަރަށް ބޮޑަށް ހީނަރުވެފައިވެ، މިއަދު ވިޔަފާރި ކުރާނެ މީހުން ނެތް
މި ރަމަޟާން މަހު މާރުކޭޓުގައި ތަކެތި ގަންނާނެ މީހުން ނުވެ، ބައެއް ބާވަތްތައް ހަލާކުވެ އުކާލަން ޖެހުނު
ގައުމުގެ ހާލަތު ރައީސް މުއިއްޒަށް ބަދަލު ނުކުރެއްވޭނެ

ނިމުނު ރަމަޟާން މަހު ދަނޑުވެރިންނާއި، ވިޔަފާރިވެރިންނަށް ފައިދާ ނުވެ، ގެއްލުން ލިބުނީ އިގްތިސާދު ދަށްވެ، ޑިމާންޑު ނެތުމުން ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.

ރާއްޖެޓީވީގެ ''ޓީވީ ޓޯކް'' ޕްރޮގްރާމްގައި އަމްރު ވިދާޅުވީ އެމްޑީޕީގެ މިދިޔަ ފަސް އަހަރުގެ ވެރިކަމުގައި ރޯދަ މަހު ތަކެތީގެ އަގު ބޮޑު ނުވާ ކަމަށާއި، އެއްވަރެއްގައި ހިފެހެއްޓި، ދަނޑުވެރިންނާ ވިޔަފާރިވެރިންނަށް ވެސް ފައިދާވި ކަމަށެވެ.

ރާއްޖޭގެ އިގްތިސާދީ ހާލަތަށް އިޝާރާތް ކުރައްވައި އަމްރު ވިދާޅުވީ އިގްތިސާދު ވަރަށް ބޮޑަށް ހީނަރުވެފައިވެ، މިއަދު ވިޔަފާރި ކުރާނެ މީހުން ނެތް ކަމަށެވެ.

އަމްރު ވިދާޅުވީ ނިމުނު ރަމަޟާން މަހު މާރުކޭޓުގައި ތަކެތި ގަންނާނެ މީހުން ނުވެ، ބައެއް ބާވަތްތައް ހަލާކުވެ އުކާލަން ޖެހުނު ކަމަށެވެ. މީގެ ކުރިން މިރުސް، ކަރާ، އެކިކަހަލަ ތަރުކާރީގެ ބާވަތްތައް ރަމަޟާން މަހު ރަނގަޅު އަގެއްގައި ވިއްކޭ ކަމަށާއި، ނަމަވެސް މިފަހަރު އެ ގަންނާނެ މީހުން ނެތް ކަމަށް އޭނާ ވިދާޅުވިއެވެ. އަދި ވިދާޅުވީ މި ސަރުކާރާއެކު ރައްޔިތުންގެ އަތުން ފައިސާ ހުސްވެ، ޑިމާންޑް ގެއްލެމުންދާ ކަމަށެވެ.

އެމްޑީޕީގެ ސަރުކާރުގައި މިފަސް ރޯދަ މަހު ތަކެތީގެ އަގު ބޮޑެއް ނުވޭ. ތަކެތީގެ އަގު ބޮޑުވެގެން މީހަކު ވާހަކައެއް ވެސް ނުދައްކާ. އެކަމަކު މިސަރުކާރުގައި އެވާހަކަ އެބަ ދެކެވޭ. ދެން މިފަހަރު އިގްތިސާދީ މިނިސްޓަރަށް ވަރަށް ފަސޭހަކޮށް ދިމާވީ. އެއީ އިގްތިސާދު ވަރަށް ބޮޑަށް ހީނަރުވެ ދަށް ވެގެން ގޮސްފައި އޮތީމަ ވިޔަފާރި ކުރާނެ މީހުންނެއް ނެތް. އެހެންވީމަ މާރުކޭޓުގައި އެއްޗެހި ކިތަންމެ ވަރަށް ހުއްޓަސް ގަންނާނެ މީހަކު ނެތީމަ ދެން ކިހިނެތްތޯ އަގުބޮޑު ކުރަނީ. އެހެންވީމަ އަގުހެޔޮ ކޮށް އެހެންވީމަ އެވަރަށް އަގުހެޔޮ ކޮށްގެން ހަލާކު ވެގެން ވެސް އެ އެއްޗެހި އުކާލާ ވާހަކަ އަޅުގަނޑުމެން ކައިރީގައި އެބަ ބުނޭ. ފެނިފައި ވެސް އެބަހުރި. މިރުސްވެސް. އެހެން ނޫނީ ރޯދަމަހު މިރުހަކީ އަގުބޮޑުކޮށް ވިކޭ އެއްޗެއް. މިފަހަރު ހަލާކުވެގެން އުކާލީ. އެހެންވީމަ ތަކެތީގެ އަގު ކުޑަކޮށް ބެހެއްޓުމަކީ އެއީ ސަރުކާރަށް ލިބޭ ކްރެޑިޓަކަށްވުރެ ބޮޑަށް ސަރުކާރުން ގެންގުޅުނު ސިޔާސަތުގެ ސަބަބުން އިގްތިސާދު ހަލާކުވެގެން ދިޔާމަ ވީ ކަމެއްގެ ގޮތުގައި.

އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު

އަމްރު ވިދާޅުވީ ގައުމުގެ ހާލަތު ރައީސް ޑރ.މުހައްމަދު މުއިއްޒަށް ބަދަލު ނުކުރެއްވޭނެ ކަމަށެވެ. އެމަނިކުފާނު ވެރިކަމުގައި ހުންނަވާ ކަމަށްވާނަމަ، ރާއްޖެ ނުދެކޭވަރުގެ ބޮޑު އިގްތިސާދީ އަނދަވަޅަކަށް ވެއްޓޭނެ ކަމަށް އަމްރު ވިދާޅުވިއެވެ.

ރައީސް މުއިއްޒު މިތާގައި ހުންނަވާގެން މިފަސް އަހަރު ހިނގައްޖެ ކަމަށްވާނަމަ މިރާއްޖޭ ނުދެކޭވަރުގެ ބޮޑު އިގްތިސާދީ އަދަވަޅަކަށް ވެއްޓިގެންދާނެ. އެއީ މިދައްކަވަނީ ބިއްލޫރިން ޓަނަލް އަޅާ ވާހަކަ، މިދައްކަނީ މާލެއިން ފުނަދޫއަށް، ފުނަދޫއިން އެއާޕޯޓަށް ކޭބަލް ކާރު އަޅާ ވާހަކައާއި، މިދައްކަނީ އައްޑޫގެ މުޅި ސަރަހައްދުގައި ބްރިޖު އަޅާ ވާހަކައާއި، ރަސްމާލެ ހިއްކައިގެން ބޮޑު ސިޓީއެއް ހަދާ ވާހަކައާއި، މިކަހަލަ ބޮޑެތި ހުވަފެންތަކެއްގެ ވާހަކަ މިދައްކަނީ. މި ވާހަކަ ދައްކާއިރު އައްޑޫގައި ކަރަންޓެއްނެތް. މާލޭގެ މަގުތަކުގައި ފެން ބޮޑުވާ މައްސަލައަށް ހައްލެއް ނެތް. އެއްވެސް ކަހަލަ އާއްމުންނަށް ފައިސާއެއް ލިބޭނެ އެއްވެސް ކަމެއް ނުކުރޭ.

އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު

ރާއްޖެއިން ބޭރުން ފައިސާއެއް ވަންނާނެ އެއްވެސް ގޮތެއް ނެތްކަން ފާހަގަކުރައްވައި އަމްރު ވިދާޅުވީ މި ސަރުކާރުގެ ސިޔާސަތުގެ ސަބަބުން ބޭރުގެ އިންވެސްޓަރުންގެ އިތުބާރު ގެއްލިފައިވާ ކަމަށާއި، އިންވެސްޓަރުން ވެސް ރާއްޖެއާ ދުރަށް ޖެހެމުންދާ ކަމަށެވެ. މިއީ ގައުމަށް ހުރި ވަރަށް ބޮޑު ނުރައްކަލެއް ކަމަށް އޭނާ ވިދާޅުވިއެވެ.

- ކޮމެންޓް