އިސްރާއީލުން ސީރިއާގެ ސަރަޙައްދުތަކަށް ދިން ހަމަލާތައް ސައުދީ އިން ކުށްވެރިކޮށްފި

ސައުދީ އަރަބިއްޔާއިން އިސްރާއީލުން ސީރިއާ އަށް ދިން ހަމަލާތައް ކުށްވެރިކޮށްފިއެވެ.

ސައުދީ އަރަބިއްޔާގެ ފޮރިން މިނިސްޓްރީން ބުރާސްފަތި ދުވަހު ނެރުނު ބަޔާނެއްގައި، ސީރިއާގެ ފަސް ސަރަޙައްދަކަށް އިސްރާއީލުން ދިން ހަމަލާތައް ހަރުކަށި އިބާރާތުން ކުށްވެރިކޮށްފައިވެއެވެ. މި ހަމަލާތަކުގައި ގިނަ އަދަދެއްގެ އާންމު ރައްޔިތުންނާއި ސިފައިން މަރުވެފައިވެއެވެ.

ސައުދީ އަރަބިއްޔާއިން ބުނެފައިވަނީ، ބައިނަލްއަޤްވާމީ ޤާނޫނުތަކާ ޚިލާފަށް ސީރިއާގެ މިނިވަންކަމާއި ސަލާމަތަށް އިސްރާއީލުން ކުރަމުންދާ ނުރައްކާތެރި ޢަމަލުތައް އެ ޤައުމުން ބަލައިނުގަންނަ ކަމަށެވެ.

އދ. އިން ސީރިއާއަށް ކަނޑައަޅާފައި ހުންނަވާ ސަފީރުގެއިރް ޕެޑަރސަން ވެސް އިސްރާއީލުގެ މި ހަމަލާތައް ކުށްވެރިކޮށް، މިފަދަ ޢަމަލުތަކުން ސީރިއާގެ ހަމަޖެހުމަށް ބުރޫއަރާނެކަމަށް ވިދާޅުވެފައިވެއެވެ. ސީރިއާގެ އެއާޕޯޓްތަކާއި އަސްކަރީ މަރުކަޒުތަކަށް އިސްރާއީލުން ހަމަލާދެމުންދާކަމަށް ސީރިއާއިން ތުހުމަތުކޮށްފައިވެއެވެ.

ސީރިއާގެ ދެކުނު ސަރަޙައްދުގައި ހިންގި އޮޕަރޭޝަނެއްގައި 13 މީހުން މަރުވެފައިވާކަމަށް ސީރިއާއިން ބުނެފައިވެއެވެ. ނަމަވެސް އިސްރާއީލުން ބުނެފައިވަނީ އެއީ އެ ޤައުމުގެ ސިފައިންނަށް އަމާޒުކޮށްފައިވާ ހަމަލާތަކަށް ދިން ޖަވާބެއްގެ ގޮތުގައެވެ.

ޕެޑަރސަން ގޮވާލާފައިވަނީ އިސްރާއީލުގެ މި ހަމަލާތައް ހުއްޓާލުމަށާއި، ސަލާމަތީ ކަންކަން ހައްލުކުރުމަށް ޑިޕްލޮމެޓިކް މަގުތައް އިސްކުރުމަށެވެ. އަދި އިތުރަށް ކަންކަން ގޯސްވިޔަ ނުދިނުމަށް އެންމެހާ ފަރާތްތަކުން މަސައްކަތްކުރުމަށް އޭނާ އިލްތިމާސްކޮށްފައިވެއެވެ.