ހުޅުމާލޭގައި މީހަކު ރަހީނު ކުރުމަށް ފަހު އޭނާގެ އިނގިލި ބުރިކޮށްލަން އުޅުނު މައްސަލައިގައި ހައްޔަރު ކުރި މީހުންގެ ތެރޭގައި ހިމެނޭ މީހަކު އަނެއްކާ ވެސް ހައްޔަރުކޮށްފި އެވެ.

މީޑިއާތަކަށް ފުލުހުން ހިއްސާ ކުރި މެސެޖެއްގައި ވާ ގޮތުން، ވައްކަމުގެ މައްސަލައިގައި ހައްޔަރުކޮށްފައިވަނީ މ. ކޮޅުފުށި، އާރެސް، ހަސަން ގާލިބް (38އ) އެވެ. ފުލުހުން ބުނީ އޭނާގެ ބަންދާ މެދު ގޮތެއް ނިންމުމަށް ކްރިމިނަލް ކޯޓަށް ހާޒިރުކުރުމުން، އެ ކޯޓުން ވަނީ އޭނާގެ ބަންދަށް 15 ދުވަސް ޖަހާފަ އެވެ.

ވައްކަމުގެ މައްސަލަ އަކާއި ގުޅިގެން ގާލިބް އަނެއްކާވެސް ހައްޔަރުކޮށްފައި މިވަނީ ހުޅުމާލޭގައި މީހަކު ރަހީނުކުރި މައްސަލަ އާއި ގުޅިގެން އޭނާ ހައްޔަރުކުރުމަށް ފަހު އޭނާ ދޫކޮށްލާފައި ހުއްޓާއެވެ.

އޭނާގެ މައްޗަށް މީގެ ކުރިން ތުހުމަތު ކުރެވުނު ރަހީނު ކުރުމުގެ މައްސަލައަކީ ހުޅުމާލޭގެ ދެވަނަ ފިޔަވަހީގައި ހުންނަ ހިޔާ ޓަވަރުގެ H9-20-11 އެޕާޓްމަންޓުގައި 2024 ވަނަ އަހަރު ނޮވެމްބަރު މަހު 12 މީހުން ވެގެން މީހަކު ރަހީނުކޮށް އިނގިލި ބުރިކޮށްލަން އުޅުނު މައްސަލައެވެ. ފުލުހުން ބުނީ، ރަހީނުކޮށްފައިވާ މީހާ ސަލާމަތްކުރީ އޭނާގެ ބޯ ބޭލުމަށްފަހު، އިނގިލި ބުރިކުރަން އުޅެނިކޮށް ކަމަށެވެ. އަދި އެ މީހުންގެ މައްޗަށް ދައުވާ ކުރުމަށް ފޮނުވާފައި ވަނިކޮށް އޭގެ ފަހުން ގާލިބް ވަނީ ބަންދުން ދޫކޮށްލާފަ އެވެ.

ގާލިބަކީ ކުށުގެ ރެކޯޑް އޮތް މީހެއް ކަމަށް ވެސް އޭނާ ބަންދުކުރަން އަމުރުކޮށް ނެރުނު ކޯޓު އަމުރުގައި ބުނެފައިވެ އެވެ.