ބޭސް ގެނައުމަކީ އެންމެ ކުންފުންޏަކަށް ކުރެވޭނެ ކަމެއް ނޫން، މިހާތަނަށް އާސަންދައިން ދޫކުރަން ޖެހޭ ފައިސާ ދޫކޮށްފައިނުވޭ: އަމްރު
މީގެ ކުރިން ބޭސް އެތެރެ ކުރަމުންދިޔައީ ޕްރައިވެޓް ކުންފުނިތަކާ ގުޅިގެން އެއްބަސްވުމެއްގެ ދަށުން
ޓީވީ ޓޯކް ޕްރޮގްރާމްގައި އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު ވާހަކަދައްކަވަނީ
ރާއްޖެއަށް ބޭނުންވާ ބޭސް ގެނައުމަކީ އެންމެ ކުންފުންޏަކަށް ކުރެވޭނެ ކަމެއް ނޫން ކަމަށާއި، ނަމަވެސް މި ސަރުކާރުން އާސަންދައިން ދޫކުރަންޖެހޭ ފައިސާ ޕްރައިވެޓް ސެކްޓަރތަކުގެ ބޭސް ފިހާރަތަކަށް ދޫކޮށްފައިނުވާ ކަމަށް ސްޓޭޓް ޓްރޭޑިން އޯގަނައިޒޭޝަން (އެސްޓީއޯ)ގެ ކުރީގެ މެނޭޖިން ޑިރެކްޓަރ ހުސެއިން އަމްރު ވިދާޅުވެއްޖެ އެވެ.
ރާއްޖެޓީވީގެ ''ޓީވީ ޓޯކް'' ޕްރޮގްރާމްގައި އަމްރު ވިދާޅުވީ މި ސަރުކާރުގެ ކުރިން އެސްޓީއޯއިން ރާއްޖެއަށް ބޭނުންވާ ބޭސްތައް އެތެރެ ކޮށްފައިވަނީ ވަރަށް ހަރުދަނާ އުސޫލެއްގެ ތެރެއިން ކަމަށާއި، ރައްޔިތުންނަށް ބޭސް ލިބުމުގައި ދަތިކަމެއް ކުރިމަތިނުވާ ކަމަށެވެ.
ރާއްޖޭއަށް ބޭނުންވާ ހުރިހާ ބޭހެއް އެންމެ ކުންފުންޏަކުން ގެނައުމަކީ ކުރެވޭނެ ކަމެއް ނޫންކަން ފާހަގަކުރައްވައި އަމްރު ވިދާޅުވީ މީގެ ކުރިން ވެސް ހުރިހާ ބަލިތަކަށް ބޭނުންވާ ބޭސް އެތެރެ ކުރަމުންދަނީ ހަމަ އެކަނި އެސްޓީއޯއިން ނޫން ކަމަށެވެ. އަދި އެ މަސައްކަތް ކުރަމުންދިޔައީ ޕްރައިވެޓް ކުންފުނިތަކާ ގުޅިގެން އެއްބަސްވުމެއްގެ ދަށުން ކަމަށް އަމްރު ވިދާޅުވިއެވެ.
ބޭހުގެ އަގަށް ގެނައި ބަދަލަށް އިޝާރާތް ކުރައްވައި އަމްރު ވިދާޅުވީ އެއްވެސް މަޝްވަރާއެއް ކުރުމެއްނެތި ސަރުކާރުން ގެނައި ސިޔާސަތުގެ ސަބަބުން ޕްރައިވެޓް ސެކްޓަރގެ ފާމަސީތައް ހިންގަން ޖެހުނީ ގެއްލުމުގައި ކަމަށާއި، ފައިދާއެއް ނުވާ ކަމަށެވެ. އަދި ވިދާޅުވީ އާއްމު ރައްޔިތުންނަށް އެފާމަސީތަކުން އާސަންދައިގެ ޚިދުމަތުން ބޭސް ކޮތަޅު ދިން ނަމަވެސް އެ ފާމަސީތަކަށް އާސަންދައިން ދޫކުރަންޖެހޭ ފައިސާ މިހާތަނަށް ދޫކޮށްފައިނުވާ ކަމަށެވެ.
ސަރުކާރުން މިކަނޑައެޅީ ބޭސް އާސަންދައިން އިންނަ އަދަދު ވިއްކާ އަދަދު ވަރަށް ކުޑަކޮށްލަން ޕްރައިވެޓް ސެކްޓަރއަށް ގެންނަ ބޭސްތަކަށް. އެހެންވީމަ ވާ ގޮތަކުން 2 ރުފިޔާއަށް ގެންނަ ބޭސްގުޅަ އެ މިވީ ގޮތަކީ އެ ވިއްކަނީ 5 ރުފިޔާއަށް އާސަންދަ ޕޯޓަލްގައި. އެ ވިއްކަމުން ދަނިކޮށް މި ވައްޓާލަނީ ދެރުފިޔާ ބަޔަށް. އެ ބައި ރުފިޔާ ލިބިގެން ޕްރައިވެޓް ސެކްޓަރއަށް ފާމަސީއެއް ނުހިންގޭ. އެއް ކަމަކަށް. އެނެއް ކަމަކީ މިސަރުކާރު އައިފަހުން އަދި އެއްވެސް ފާމަސީއަކަށް ފައިސާ ދޫކޮށްފައިނުވޭ. ދެން ބަލި ވީމަ ބޭސް ސިޓީ ހިފައިގެން ދާ މީހާ ފާމަސީއަށް ދިޔާމަ ބޭސް ކޮތަޅެއް ތާ މިދެނީ. އެމީހާ މިދަނީ ބޭސް ކޮތަޅު ހިފައިގެން. އެކަމަކު ފާމަސީ މީހާ ދާން މިޖެހެނީ ބޭސް ސިޓީ ހިފައިގެން އާސަންދައަށް ލާރި ހޯދަން. ދިޔާމަ އެ ލާރިއެއް ނުލިބޭ އާސަންދައިން. ނުލިބުނީމަ އޭނަ މިދާންޖެހެނީ ބޭންކްތަކަށް ގޮސްގެން އަނެއްކާ ލޯނު ނަގައިގެން ބޭސް އެތެރެ ކޮށްގެން، އެ ލޯނު ނުދެއްކިގެން މިހާރު އެއުޅެނީ.އެސްޓީއޯގެ ކުރީގެ މެނޭޖިން ޑިރެކްޓަރ ހުސެއިން އަމްރު
އަމްރު ވިދާޅުވީ ރައްޔިތުންނަށް ބޭނުންވާ ބޭސްތައް މިހާރު ނުލިބެނީ މިސަރުކާރުގެ ސިޔާސަތުގެ ސަބަބުން ކަމަށެވެ. އަދި ސަރުކާރުން ބޭނުންވަނީ ހަމައެކަނި އެސްޓީއޯއިން ރާއްޖެއަށް ބޭސް އެތެރެ ކުރަން ކަމަށާއި، އެކަން އެގޮތަށް ނުހިނގާނެ ކަމަށް އޭނާ ވިދާޅުވި އެވެ.
މިސަރުކާރާއެކު، ދާއިމީ ބަލިތަކަށް ބޭސް ބޭނުންކުރާ މީހުންގެ ބޭސް ނުލިބުމާއި، އާއްމުކޮށް ކުރިން ލިބޭ ބޭސްތައް ވެސް ނުލިބޭ މައްސަލަ ބޮޑެވެ. ކުރިން އާސަންދައިން ދޫކުރަމުންދިޔަ ބޭސްތައް ވެސް އާސަންދައިން ނުލިބޭ ކަމުގެ ޝަކުވާ ވަނީ ބޮޑުވެފަ އެވެ.
