ގައުމީ އެއަރލައިން މޯލްޑިވިއަން އިން މުއްދަތު ހަމަވެފައިވާ ޖޫސް އަދި ފެން ޕެކެޓް ފަސިންޖަރުންނަށް ދިން މައްސަލައެއް ފެންމަތިވެއްޖެ އެވެ.

މިކަމާ ގުޅިގެން ސޯޝަލް މީޑިއާގައި މީހަކު ކޮށްފައިވާ ޕޯސްޓެއްގައި ބުނެފައި ވަނީ އާދިއްތަ ދުވަހުގެ ރޭ ހަނިމާދޫ އިންޓަނޭޝަނަލް އެއަރޕޯޓުން އިންޑިޔާގެ ޓްރިވެންޑްރަމް އަށް ދަތުރުކުރި މޯލްޑިވިއަންގެ ފްލައިޓް Q2708 ގައި ދަތުރުކުރި ފަސިންޖަރުންނަށް މުއްދަތު ހަމަވެފައިވާ ޖޫސް އަދި ފެން ޕެކެޓްތަކެއް ދީފައިވާ ކަމަށެވެ.

މި މައްސަލަ ފާހަގަކުރެވުނީ ފްލައިޓުން ދަތުރު ކުރި ފަސިންޖަރަކަށެވެ. އަދި އޭނާއަށް އެކަން ފާހަގަ ވެގެން ޕެކެޓެއްގެ މުއްދަތު ހަމަވެފައިވާކަން ފްލައިޓް ކްރޫއަށް ވެސް ވަނީ އަންގާފައެވެ. އަދި މި މައުލޫމާތު ލިބުމާއެކު، ކްރޫ މެންބަރުން ވަނީ ޕެކެޓްތައް ބުއި ހުރިހާ ފަސިންޖަރުންގެ ކިބައިން މަޢާފަށް އެދިފަ އެވެ. އަދި ޕެކެޓްތައް ނުބޮއެ ތިބި މަދު ފަސިންޖަރުންގެ އަތުން އެ ޕެކެޓްތައް އަލުން އަނބުރާ ނަގާފައިވެ އެވެ.

މިކަމުގައި މޯލްޑިވިއަންގެ ބަހެއް ވަނީ ލިބޭގޮތް ނުވެފައެވެ.

މޯލްޑިވިއަންގެ ފްލައިޓުތަކުން ދަތުރުކުރަމުން އަން ފަސިންޖަރުންނަށް މުއްދަތު ހަމަވެފައިވާ ޖޫސް އަދި ފެން ޕެކްޓުތަކެއް ބަހާފައިވާ މައްސަލައެއް ފެންމަތި ވެފައިވާއިރު، އެ ފަރާތްތަކުން ދަތުރު ކުރުމަށް ނަގާ ޓިކެޓުތަކުގެ ގަޑިތަކުގެ ދުވަހާއި ގަޑިތައް ވެސް އެ ފަރާތްތަކަށް އެއްވެސް އެންގުމަކާއި ނުލައި މޯލްޑިވިއަން އިން ބަދަލުކުރަމުން އަންނަ މައްސަލަ ވެސް ވަނީ ބޮޑުވެފައެވެ.

މިފަދަ ކަންކަމާއި ގުޅިގެން ރާއްޖޭގެ ގައުމީ އެއަރލައިން ދޭ ހިދުމަތުގެ ފެންވަރު ދަށްވުމުގެ ޝަކުވާ ގިނަ ބަޔަކު އަންނަނީ ކުރަމުންނެ އެވެ.