ބޮކި ބަހަން މިނިސްޓްރީ އެއް ހެދި ހިސާބުން މި ސަރުކާރުގެ ކަންކަން ރަނގަޅަށް ނުދާނެކަން އެނގިވަޑައިގަތް ކަމަށް އެމްޑީޕީގެ ޤާނޫނީ ޓީމުގައި ހިމެނިވަޑައިގަންނަވާ، ޤާނޫނީ ވަކީލް އައިކު އަހުމަދު އީސާ ވިދާޅުވެއްޖެއެވެ.

އައިކު އެފަދައިން ވިދާޅުވީ ރާއްޖެޓީވީގެ ފަލަ ސުރުހީ ޕްރޮގްރާމްގައި ވާހަކަދައްކަވަމުންނެވެ. އޭނާ ވިދާޅުވީ ލޯކަލް ގަވަރމެންޓް އޮތޯރިޓީން ކުރާ މަސައްކަތް ކުރުމަށް އިތުރު ވުޒާރާ އެއް ރައީސް މުއިއްޒު އުފައްދަވާފައިވާ ކަމަށެވެ. އެލްޖީއޭ އިން ކުރާ މަސައްކަތުގެ އިތުރުން އެ ވުޒާރާ އިން އިތުރަށް ކުރާ ހަމައެކަނި ކަމަކީ ބޮކި ބެހުމުގެ މަސައްކަތް ކަމަށް އޭނާ ވިދާޅުވިއެވެ. އެ ހިސާބުން މި ސަރުކާރުގެ ކަންކަން ދާނީ ގޯހުން ގޯހަށް ކަމަށް ހާމަވި ކަމަށް ވެސް އައިކު ވިދާޅުވިއެވެ.

ސަރުކާރުން ދުރާލާ ބުނަމުން އައީ އީދަށް ރާއްޖެ ދިއްލުމަށް 28 މިލިއަން ރުފިޔާ އެކަމަށް ހޭދަކުރާނެ ކަމަށެވެ. އަދި ކުރީ ފަހަރަށް ވުރެ އިތުރުކޮށް އަތޮޅުތެރޭގައި ބޮކިދިއްލާ ރަށްތައް އިތުރުވެސް ކުރާނެ ކަމަށް ސަރުކާރުން އައީ ބުނަމުންނެވެ. މިހާ އިގްތިސާދީ ހާލަތު ދަށުގައި އޮތް ދުވަސްވަރެއްގައި 28 މިލިއަން ރުފިޔާ ހޭދަކޮށްގެން އީދުބޮކި ދިއްލަން ސަރުކާރުން މިހާބޮޑު އިސްކަމެއް ދިން ދިނުމުން އާއްމުން ދަނީ އެކަމަށް ފާޑުކިޔުން އަމާޒުކުރަމުންނެވެ. އައިކު ވެސް ވަނީ ރާއްޖެ އޮތް ހާލަތަށް ބަލާ އިރު ބޮކި ދިއްލުމުގެ ނަމުގައި ކުރާ ޚަރަދުތަކަކީ އެންމެ އެކަށީގެންވާ ގޮތަށް ކުރާ ކަމެއްތޯ ސުވާލު އުފައްދަވާފައެވެ. އަދި ބޮކިތައް ދިއްލަން ހޭދަކުރާ މިންވަރަށް ވުރެ އިތުރަށް އެ މަސައްކަތް ކުރާ ވުޒާރާގެ ސިޔާސީ މުވައްޒަފުންނަށް ހޭދަކުރާތީ އެކަމަށް އޭނާ ވަނީ ފާޑު ވިދާޅުވެފައެވެ.

ފިތުރު އީދާ ގުޅިގެން ސަރުކާރުން އީދު ބޮކި ފޮނުވާ ރަށްތަކުގެ ލިސްޓުން އޮމަދޫ އުނިކޮށްފައިވާތީ އެކަމަށް ވެސް އައިކު ވަނީ ފާޑު ވިދާޅުވެފައެވެ. އޮމަދޫ ރައްޔިތުންނަށް ފެނުނީ އެ ރަށު ރައްޔިތުންނާއި މެދު ރައީސް ދެއްވާ އަހައްމިއްޔަތުކަން ކުޑަ މިންވަރު ކަމަށް އައިކު ވަނީ ވިދާޅުވެފައެވެ.

އޮމަދޫ ކައުންސިލުން ބުނެފައި ވަނީ މި އަހަރު ފިތުރު އީދުގައި ކުލަ ބޮކި ދިއްލަން 28 މިލިއަން ރުފިޔާ ހަރަދުކުރުމަށް ނިންމާ، ބޮކިތައް ފޮނުވަން ސަރުކާރުން ނިންމާފައިވާ 36 ރަށުގެ ލިސްޓުގައި އދ. އޮމަދޫ ކުރިން ހިމެނިފައިވީ ނަމަވެސް އެ ރަށުގެ ނަން އެ ލިސްޓުން އުނިކޮށްފައިވާ ކަމަށެވެ.

އެކަން ހާމަކޮށް އޮމަދޫ ކައުންސިލުން އާއްމު ކުރި ބަޔާނެއްގައި ބުނެފައި ވަނީ ސަރުކާރުގެ މި އަމަލު އެ ކައުންސިލުން ކުށްވެރިކުރާ ކަމަށް ބުނެފައެވެ. އެ ބަޔާނުގައި އިތުރަށް ބުނެފައި ވަނީ ފިތުރު އީދަށް ބޮކި ފޮނުވާ ރަށްތަކުގެ ލިސްޓުގައި އޮމަދޫ ހިމެނޭ ކަމަށް ލޯކަލް ގަވަމަންޓު މިނިސްޓްރީން ކުރިން އެ ކައުންސިލަށް އަންގާފައިވާ ކަމަށެވެ.

އެކަން ހާމަކޮށް އެ ވުޒާރާ އިން އެ ކައުންސިލަށް ސިޓީއެއް ފޮނުވާފައި ވަނީ މާޗު 6 ގައި ކަމަށް ވެސް އޮމަދޫ ކައުންސިލުން ބުނެއެވެ. އެހެންކަމުން އެ ސިޓީއާ ގުޅިގެން މިކަމަށް ވާންޖެހޭ ހުރިހާ ތައްޔާރީއެއް އެ އިދާރާއިން ވި ކަމަށްވެސް އޮމަދޫ ކައުންސިލުން ބުނެފައިވެ އެވެ.

އަދި، އެގޮތަށް އެންގުނީ އޮޅުމަކުން ކަމަށް ބުނެ މިނިސްޓްރީން އޮމަދޫ ކައުންސިލަށް ދެވަނަ ސިޓީއެއް ފޮނުވީ އިއްޔެ ހަވީރު 5:30 ހާއިރު ކަމަށްވެސް އެ އިދާރާގެ ބަޔާނުގައި ބުނެފައިވެ އެވެ.

"ނަމަވެސް، މި ކައުންސިލަށް ލިބިފައިވާ މައުލޫމާތަށް ބަލާއިރު ބުރަވެވެނީ ސިޔާސީ ގޮތުން ނުފޫޒު ހުރި ފަރާތްތަކުން ބާރުވެރިކަމުގެ އޮއިވަރުގައި ޖެހި ލައިޓުތައް ގެންދިއުމަށް ކަނޑައެޅިފައިވާ ލިސްޓަށް ބަދަލު ގެނެސް މި ރަށުގެ ނަން އެ ލިސްޓުން އުނިކޮށް އެހެން ރަށަކަށް އެ ލައިޓުތައް ބަދަލުކޮށްފައިވާ ކަމަށް،" އޮމަދޫ ކައުންސިލުން ބުނެފައިވެ އެވެ.

އީދަށް އަލަށް ދިއްލާ ރަށްތަކުގެ ތެރޭގައި އދ. އަތޮޅުން ހިމެނުނީ މާމިގިލި އެވެ. އޮމަދޫ ކައުންސިލުން ބުނެފައި ވަނީ މިއީ އެ ރަށުގެ ރައްޔިތުންނަ ލަދުގަންނަވާލަން ކުރި ކަމެއް ކަމަށެވެ. މީގެ އިތުރުން އެ ރަށުގެ ބަނދަރުގެ މަސައްކަތްވެސް ކުރިއަށް ނުދާ ކަމަށް އެ ކައުންސިލުން ވަނީ ބުނެފައެވެ. އެހެންކަމުން އެ މަސައްކަތް ފަށާ ލައިޓުތައް އެ ރަށަށް ފޮނުވުމަށް އޮމަދޫ ކައުންސިލުން ވަނީ ސަރުކާރަށް ގޮވާލާފަ އެވެ.