ބާސެލޯނާއިން ބުރާސްފަތި ދުވަހުގެ ރޭ ކުޅުނު ލީގު މެޗުގައި އޮސަސޫނާއާ ދެކޮޅަށް އިނީގޯ މާޓިނޭޒް ކުޅުވީ ގަވާއިދާ ހިލާފަށް ކަމަށް ބުނެ، އޮސަސޫނާއިން ރޯޔަލް ސްޕެނިޝް ފުޓްބޯލް ފެޑަރޭޝަނަށް މައްސަލަ ހުށަހަޅައިފި އެވެ.

އިނީގޯ މާޓިނޭޒް މި މެޗުގައި ކުޅެފައިވަނީ މިދިޔަ ހަފުތާގައި ޔުއެފާ ނޭޝަންސް ލީގުގައި ނެދަލަންޑްސްއާ ދެކޮޅަށް ސްޕެއިން ކުޅުނު މެޗު ނިމުނުތާ ހަތަރު ދުވަސް ފަހުންނެވެ. އަދި ނޭޝަންސް ލީގުގެ މެޗުތަކަށް ސްޕެއިންއިން އެކުލަވާލި ސްކޮޑުގައި އޭނާ ހިމެނުނު ނަމަވެސް، ބަލިވުމުގެ ސަބަބުން ކަމަށް ބުނެ އޭނާ ގައުމީ ޓީމުގެ ސްކޮޑުގައި ހިމެނިފައެއް ނުވެ އެވެ.

އެހެން ނަމަވެސް ފީފާގެ ގަވާއިދު ބުނާ ގޮތުން ކުޅުންތެރިއަކު ގައުމީ ޓީމަށް ނެގުމަށްފަހު ކޮންމެ ސަބަބަކާ ހުރެ ނަމަވެސް ޓީމުން ވަކިވެއްޖެ ނަމަ, އެ ޓީމެއް އެންމެ ފަހުން ކުޅޭ މެޗުގެ ފަސް ދުވަސް ފަހުން ނޫން ގޮތަކަށް ކުލަބަށް ނުކުޅެވޭނެއެވެ. އަދި އެ މުއްދަތުގެ ތެރޭގައި ކުލަބަށް މެޗެއް ކުޅޭނަމަ އެ ގައުމެއްގެ ފުޓްބޯޅަ ފެޑަރޭޝަނުން ޚާއްސަ ހުއްދައެއް ނަގަން ޖެހޭނެ އެވެ.

އޮސަސޫނާ އަތުން 3-0 ގެ ނަތީޖާއަކުން ބާސެލޯނާ މޮޅުވެ އެއްވަނައިގައި ތިން ޕޮއިންޓުގެ ލީޑެއް ހޯދި މި މެޗުގެ ފުރިހަމަ 90 މިނެޓުގައި އިނީގޯ މާޓިނޭޒް ވަނީ ކުޅެފައެވެ. އޮސަސޫނާއިން ނެރެފައިވާ ބަޔާނެއްގައި ބުނެފައިވަނީ އިނީގޯ މާޓިނޭޒް ގައުމީ ޓީމުން ވަކިވީ މެޑިކަލް ސަބަބަކާ ހުރެ ކަމަށް ބުނެފައިވާއިރު، އޭނާ މި މެޗު ކުޅެފައިވަނީ ފީފާއިން ކަނޑައަޅާފައިވާ އުސޫލުތަކާ ޚިލާފަށް ކަމަށެވެ.

މާޓިނޭޒް ރޭ އޮސަސޫނާއާ ދެކޮޅަށް 90 މިނެޓް ކުޅެފައިވާ އިރު، އޮސަސޫނާއިން ބުނީ މާޓިނޭޒަށް ރޭގެ މެޗުގައި ކުޅެވިގެން ނުވާނެ ކަމަށާއި، ގައުމީ ޓީމުން އެކަމަށް ހިތްވަރު ދީގެންވެސް ނުވާނެ ކަމަށެވެ. އަދި މުބާރާތުގައި ހުރިހާ ޓީމަކަށްވެސް ހަމަހަމަ ގޮތަކަށް ކަންތައް ކުރުމަށް މައްސަލަ ބެލުން އަވަސް ކޮށްދޭން ޖެހޭ ކަމަށެވެ.

މިދިއަ ބުރާސްފަތި ދުވަހުގެ ރޭ ބާސާއިން އޮސަސޫނާއާ ދެކޮޅަށް ކުޅުނު މެޗަކީ ކުރިން މާޗު އަށްވަނަ ދުވަހު ކުޅެން އޮތް މެޗެއް ނަމަވެސް، އެމެޗު ކުޅޭ ގަޑި ރެއަށް ބަދަލުކުރީއެވެ. އެކަމަށް ބާސާ ކޯޗު ހާންސީ ފްލިކް ފާޑުވެސް ކިޔާފައިވެއެވެ.

އެއީ ބްރެޒިލްގެ ގައުމީ ޓީމަށް ކުޅޭ ރަފީނިއާއަށް ރޭ ބާސާ މެޗުގައި ނުކުޅެވުމުންނެވެ.