ޑިއުޓީ ފްރީން ވަގަށް ސިނގިރޭޓު އެތެރެކުރަން އުޅުނު ފުލުސް މީހާ ސަސްޕެންޑް ކޮށްފި
27 މާރިޗު 2025 | ބުރާސްފަތި 07:49އޭނާ ސަސްޕެންޑް ކުރީ މުސާރަ ނުލިބޭ ގޮތަށް
ޑިއުޓީ ފްރީން ވަގަށް ސިނގިރޭޓު އެތެރެކުރަން އުޅުނު މައްސަލާގައި ހައްޔަރުކުރި ސާޖަންޓް ޔޫސުފް ނަޒީރު
ވެލާނާ އިންޓަނޭޝަނަލް އެއާޕޯޓު (ވީއައިއޭ) ގެ ޑިޕާރޗާ ހޯލުން ވަގަށް ގިނަ އަދަދެއްގެ ސިނގިރޭޓް އެތެރެ ކުރަން އުޅުނު ފުލުސް މީހާ ވަޒީފާއިން ސަސްޕެންޑް ކޮށްފިއެވެ.
ޑިއުޓީ ފްރީން ވަގަށް ސިނގިރޭޓު އެތެރެކުރަން އުޅުނު މައްސަލައެއް ފެންމަތިފައިވަނީ 25 މާރޗް 2025 ވީ އަންގާރަ ދުވަހުގެ ރޭގެ ވަގުތެއްގައެވެ. މި މައްސަލައާ ގުޅިގެން އަންގާރަ ދުވަހުގެ ރޭ ކޯޓު އަމުރެއްގެ ދަށުން ދެމީހުން ހައްޔަރުކުރި އެވެ.
މި މައްސަލާގައި ހައްޔަރުކުރި، ދަފްތަރު ނަންބަރު ރސ 14358، މާލެ، 38 އަހަރުގެ ޔޫސުފް ނަޒީރަކީ ފުލުހަކަށްވާތީ ގިނަ ބައެއްގެ ފާޑު ކިޔުން އެ އިދާރާއަށް އަމާޒުވެގެން ދިޔައެވެ.
ބުރާސްފަތި ދުވަހު ފުލުހުން ބުނީ މި މައްސަލާގައި ހައްޔަރުކުރި ސާޖަންޓް ޔޫސުފް ނަޒީރު ވަނީ 26 މާރިޗް ވަނަ ދުވަހުން ފެށިގެން ސަސްޕެންޑް ކޮށްފައިވާ ކަމަށާއި، ސަސްޕެންޑް ކޮށްފައިވަނީ މުސާރަ ނުލިބޭ ގޮތަށް ކަމަށެވެ.
ކަސްޓަމްސްއިން މިތަކެތި އަތުލައިގަތީ އެއާޕޯޓުގެ ޑިޕާރޗާ ޓާމިނަލުން ނެރެގެން ގެންދަން އުޅުނު ޑަސްބިން ބޭގްތަކެއް އެ އިދާރާއިން ޗެކްކުރިއިރު ފެނިގެންނެވެ. ނަމަވެސް ޑަސްބިން ބޭގުތަކުން ފެނުނު ކާޓަންތަކުގެ އަދަދެއް ހާމަކޮށްފައެއް ނުވެއެވެ.
މި މައްސަލަ ކަސްޓަމްސްއިން ފުލުހުންނަށް ރިޕޯޓު ކުރުމާއި ގުޅިގެން ކޯޓު އަމުރެއްގެ ދަށުން ޔޫސުފް ނަޒީރުގެ އިތުރުން މ. ސިލްވާ ނެސްޓް، 45 އަހަރުގެ އަހުމަދު އަފްސަލް އަންގާރަ ދުވަހުގެ ރޭ ހައްޔަރު ކުރިއެވެ. އަދި 26 މާރޗްވީ ބުދަ ދުވަހު މުއްދަތު ޖެހުމަށް ކޯޓަށް ހާޒިރު ކުރުމުން ޝަރުތުތަކާއެކު އެ ދެމީހުން ވަނީ ބަންދުން ދޫކޮށްލާފައެވެ.
މި މައްސަލަ ފުލުހުން ގެންދަނީ އިތުރަށް ތަހުގީގު ކުރަމުންނެވެ.
